今日o既行程都好充實呢，因為我哋下五三點幾要搭火車返馬德里咯，上午至午飯時間之間要完成大教堂、Sevilla o既阿卡乍堡同埋鬥牛場呢幾個目的地﹗
其實時間上我哋花係大教堂唔係太耐，但為咗blog o既完整性，我都獨立一篇俾佢啦~後來聽家姐講番至知原來Sevilla o既大教堂都好威水，係歐洲之中有排名o既大教堂，我哋就懵查查咯，只覺得西班牙o既每個城鎮，無論大大小小都有大教堂，所以參觀Sevilla o既大教堂前都冇話咩特別期望咁~
入到去要哇一聲，原來內部好大，樓底好高，好宏偉丫﹗果然古典o既教堂係唔同，巴塞隆拿o既聖家堂雖然都大同令人讚嘆，但聖家堂只係100年前開始興建，而呢啲古老o既教堂要早佢好幾百年，嗰陣o既科技冇咁好，但都起到咁高﹗﹗
另一個震憾位就係個巨型風琴了﹗唔知細個時嚟歐洲有冇聽過真o既大風琴o既聲音，但今次我聽到佢響出o既樂曲之後就呆咗了，真風琴同電風琴真的不能同日而語，而且可能加埋教堂o既樓底同圓頂吧？好有莊嚴又神聖o既氣氛~裡面有儀式進行中，我哋都唔知係彌撒定係其他祈禱聚會~幾十年前梵二之前彌撒係「聽/望」的，而唔係「參與」的，教友只能夠望住神父o既背脊，唔知佢做緊乜(當然我未試過呢種彌撒啦)，以前古老o既教堂祭台都係好入面，教友席其實睇得唔太清楚(以前o既角度嚟講唔重要)，而且有啲仲會用鐵欄圍住添，記得當年去瑞士時同Anne姨姨去望彌撒，神父、輔祭都係鐵欄裡面的~(我有冇記錯？)
要影一影呢張poster，因為係「信德年」o既poster，天主教全球都係一體呢，香港2012至2013係信德年，西班牙都係﹗「fe」就係信德咁解了~
同埋無限o既雕刻天花板…
大教堂而家正每個部份陸續修復中，其中呢一part圍起咗，其實我哋冇影到，個圍板有一忽係透明玻璃嚟o架，有個工匠係入面作業中，令我記起當年去上海世博時參觀o既意大利館，有意大利裁縫係度示範~(請參閱：17-6-2010：上海世博遊day 2 (part 1)．英國館、意大利館、盧森堡館)
只能夠咁樣同(我喜愛o既)橘子庭園合照了~
講完又講都要講，好鍾意Andalucia o既橘子樹，好茂密、好青綠、加上結實纍纍，對城市好有點綴美化o既作用呢~又實用喎，新榨橙汁同雜莓雪葩飲品都加咗佢落去，正~呢度影乜？仔細睇睇，有好多鴿子係度歇息呢，真係識揀，諗起當年o既贖世主堂，有燕子家庭係外牆o既大十字架個胳肋底度築巢﹗
待續
前住其他西班牙旅遊blog
============================================
感謝 Rita 提供以上資料
Rita的網誌: http://www.wufamilyblog.com/~rita/
============================================
累積瀏覽 247473
全部攻略 705
全部回應 10
