探險家攻略 > 27-5-2013：釜山麗水day 3(part 1)．海雲台、地道豬肉湯飯

27-5-2013：釜山麗水day 3(part 1)．海雲台、地道豬肉湯飯

由 Rita 於 2013-05-27 00:00:00 發表 | 累積瀏覽 464

分類：

要離開麗水lu，去釡山繼續行程﹗我哋嚟o既時候一早買好回程o既長途巴士車票，所以只要預好時間搭的士去車站就ok啦~

食過酒店o既自助早餐，但未能滿足老公o既基本需求…佢要啡一啡﹗係車站o既7-11逛一逛，韓國人真係好鍾意飲咖啡，種類繁多，俾我哋第一次發現呢種「袋裝咖啡」，原來有得咁樣一包包買，店員會俾埋膠杯同埋冰塊你，你自己搞掂﹗咁樣係咪會節省啲儲存空間？不過day話啲味道甜咗啲，所以啲冰融啲之後就好啲了~

麗水o既長途巴士總站~

瞓醒另一個覺就到番釡山啦~係熟悉o既沙上站落車，我哋直接搭地鐵去我哋o既酒店—-海雲台~舊年去首爾嗰次買咗交通儲值咭，今次係麗水同釡山都大派用場，一早增值好，搭地鐵、巴士一嘟就ok~

去海雲台站都好漫長丫，有十幾個站﹗﹗好在我哋一人一本小說，又有位坐，時間都唔難過~到海雲台時廣播會非常醒目，因為有齊晒韓、英、日、中四種語言，凡係大站or同旅遊有關o既都會有四種語言廣播，所以都唔需要太擔心唔識落車~

我哋o既酒店距離地鐵站都好近，兩手fing fing應該五分鐘就到了，但拎住隻大喼就慢少少啦，仲要挽住上去長長o既樓梯… ><"(好在有我個男人係度~)落去毛毛細雨，我拎住把遮囉~

呢度就係我哋住o既Sunset Hotel喇﹗樓下幾層都係酒吧食肆，酒店大堂係十幾樓~今次兩間酒店都係經agoda.com，而家慣咗用agoda都覺得好方便，價錢、房型、地點、設施都一目了然，又有圖片，有之前o既客人o既評價，睇番個平均分嚟book都好叫人安心~因為呢間酒店唔算好貴，所以特別闊氣啲住咗corner suite，有海雲台海水浴場o既海景，房間又比較大~不過我哋check in時個reception男士唔知點解唔知我哋book o既係corner suite，最初俾咗普通房我哋，係佢哋掛起咗個表，顯示咩咩房號係咩咩房型，我先提早發現咋，如果上到去先知要再換又麻煩了~

雖然唔係無敵景，但都唔錯丫~

有大按摩浴缸，有海灘景，大落地玻璃，我都好滿意~

肚子餓了，出去搵嘢食~

其實因為就係旅遊區，所以附近都好多食肆，但我哋一場嚟到釡山，梗係想食啲地道食物嘛~結果揀咗食豬肉湯飯~

當然叫最basic o既豬肉湯飯啦，但都放到一枱都係，似乎有啲係豬肉湯飯特別要用o既東東喎，應該淨係中間嗰兩盤紅色o既係泡菜嘛~好在阿姐姐知道我哋係遊客，指手劃腳咁教我哋點樣食，要放邊啲落去個湯度咁，再加上參考下隔離枱o既人點食，總算唔會食錯咗啦~

左下o既係我哋平常食o既韮菜、左上係我哋掂都唔敢掂o既青辣椒(但隔離枱o既韓國人拎住一支嚟就咁咬囉~)，中間知道係蘿蔔同埋大白菜泡菜啦，右邊中間粉紅色o既係醃得鹹鹹地o既蝦毛，上面係類似麵豉味o既醬料(即是同生菜、烤肉一齊食嗰種醬呢)，最右係白麵線同埋右下o既辣椒醬(都係唔係好敢掂)~總之除咗泡菜之外，按自己口味樣樣都落啲啦~打開咗個蓋o既係鹽，原來鹽都要自己落~

yummy~

話說豬肉湯飯o既起源係，傳統o既韓式湯飯都係用牛肉熬煮，但戰後物資短缺，就用較平o既豬肉代替喇~

混合好了﹗食到人暖笠笠呢~day話，正確應該好似人哋咁逐少逐少咁加啲白飯落去，如果唔係就一次過吸晒啲湯了~哎吔，錯咗啦，就咁食啦~

行番出去地鐵站途中見到海雲台市場，呢個都係旅遊書景點嚟o架，反正旅遊書話，行一轉只需要十分鐘，咁我哋都俾得起呢啲時間o既~

只有一條街o既市場，都係食肆為主，有啲係入去食o既餐廳，但亦有啲係賣街邊嘢食，我哋之後都有幫襯呢~以前一向印象中韓國o既水果都好貴，舊年嚟時想食啲水果，去到超級市場都唔捨得買，原來係要睇咩品種的﹗呢啲莓類就超平了﹗咁大箱3000won咋~可惜我哋兩個人食唔到咁多~見到有鬼婆買咗一大兜邊行邊咬﹗﹗

待續

前往其他韓國旅遊blog