26-5-2013：釜山麗水day 2(part 3)．高雅又清新的韓式套餐

完成豐富o既行程我哋返去酒店休息休息，睇睇晚飯食咩好，嚟麗水其實好想試下生魚片，因為韓式食法同香港慣常o既日式sashimi好唔同嘛，魚o既品種都可能唔一樣，但我哋又有諗過去我哋酒店附近嗰間靚靚o既MVL酒店食大餐~

咁呀，先去視察MVL o既環境啦~

未入酒店，先見到呢個眼睛雕塑，眼中有day呢~

大堂好光潔亮麗，牆上掛咗有個screen，不斷變化，有酒店o既圖片，我哋睇到哇哇聲，好似大鄉里~ :p好在係大堂亦有酒店幾間餐廳o既餐牌，係比較貴，但都唔係高不可攀o既~

好，未夠肚餓食飯，返去酒店休息一下先，一著電視，哇，有新一集o既Running Man呀~智孝同埋鐘國都上咗我哋個鏡﹗﹗雖然冇字幕，但都好好睇~

好啦，我哋落街食飯啦，因為已經好累，打算去樓下個間小餐館食生魚片套餐，但一落去，哇，巴閉咯，佢哋自家人請客，唔開門丫，結果我哋返上樓，因為…umum…著住拖鞋去MVL食飯唔好吧，起碼都著番對鞋啦~

我哋去咗MVL大堂嗰層o既餐廳食韓式套餐~好似每款都要兩位起，我哋就揀咗標榜清新野菜o既套餐~好多道菜，睇餐牌都唔sure究竟有咩食，都係逐道菜上時先慢慢品嚐~

首先嚟個沙律，係好靚…

但我第一個反應係，兩個人食點解portion咁細o既？anyway味道係好清新好開胃，酸酸爽爽味o既~

隔得太耐，我都唔係好記得個粥係咩味，同老公討論過之後，recall番好似係啲麥味o既，我就記得有啲咀嚼o既感覺的~但係…點解又係咁細o架？

海鮮煎餅個汁好醒胃，但，好似都係比較細喎~

後來我哋明白了﹗﹗啲小菜泡菜上嚟已經好澎湃~

中間呢五堆青菜就係套餐o既其中一個亮點，咁多種菜我哋冇一種認得添~果然醃法都係同中國人o既醃菜or鬼佬o既沙津都好唔一樣~唔好叫我describe每一種o既味道了~

好似湯o既其實係酸酸地o既凍湯，入面有清脆o既蘿蔔~要特別介紹左邊紅噹噹嗰碟，係我喜愛o既明太子嚟o架，但係又愛又辣呢，要搭住飯嚟食~最左邊o既生菜同麵豉醬就俾我哋用嚟包住肉嚟食(未上菜)~勁o既係，生菜都有三款唔同o架~

好豐富~

另一主角上場了，係烤o既牛肉，雖然唔算柔軟嫰滑，但肉味幾香濃~但更加勁o既係，旁邊o既配菜都有三款﹗最特別o既係最頂o既黑色蒜頭，唔知點整出嚟，軟腍腍的，蒜頭原本鮮辣o既味道同埋脆脆o既口感完全唔見咗~

仲有荷葉飯同埋麵豉湯~呢個麵豉湯真係令人印象深刻，因為係充滿住120%o既鮮菇味，每一啖o既菇味都極濃郁，我哋估應該有將啲菇打碎落去~

超豐盛，擺到一枱都係，唔怪得之之前啲「前菜」要咁微型啦~如果唔係邊度食得落呀~

好不容易完成了，以為結束了，要埋單了，點知原來有甜品，而且係好正o既添~

有香香脆脆o既合桃酥酥同埋呢件傳統糕點，糕點紫色部份有啲豆蓉o既質感，但有提子o既香味~兩樣都高雅感覺，食到咁飽都唔嫌佢多~

最尾呢個結尾之作—-甜米露，真係尤如世外桃源o既美味，好清涼，好清新~~~~~佢o既效果就好似我哋幾年前去大阪食完烤肉之後o既柚子雪葩一樣咁令人有驚喜~

我哋結果俾咗比我哋預測多o既tips，因為實在太滿意了，好滿足o既一餐~

就係呢間餐廳了~

如果大家嚟麗水，我都會推介大家嚟MVL食一個韓式套餐~

待續

前往其他韓國旅遊blog

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================