29-5-2013：釜山麗水day 5(part 2)．買手信去．期待已久的Spaland

上回提到，我哋搵搵下巴士就發現咗有間Home Plus分店係左近，既然都冇特定plan好一定要點行，我哋不如就係度辦好手信，食埋個lunch，先再過去Spaland啦~

入到去，既然未餓，先搵locker放好袋袋，輕輕鬆鬆購物去~~

我唔係諗住買超多先堆架咁大o既車o架，咁佢真係得啲咁大o既車仔嘛~

真係好搞鬼，架購物車有計算係shopping時消耗o既卡路里，乜女人買嘢本身仲唔夠boost adrenaline乎？仲要令大家更起勁？

我哋其實都冇話一定要買咩，不過有同事order咗要紫菜，家姐話要泡菜，我哋都盡量滿全期望，睇下啱唔啱啦~不過嘛，係香港買o既韓國醬料呀都唔係太多選擇，又貴貴地，睇下有咩高興o既都買下啦，反正都最後一日咯，重唔重負擔嗰啲都唔理lu~好聰明o既設計丫~一個個圈圈放住啲西瓜，就唔會碌嚟碌去啦~

之前講過，廣告天王天后絕對係佢哋﹗﹗周圍都係鐘基同埋金研兒~~冇分所謂「型」定「唔型」o既產品，午餐肉o既代言一樣有佢分，幾入屋~

蒸餾水？nonono~係韓國燒酒﹗﹗﹗可想而知佢哋有幾好此道，可以大樽到咁﹗﹗一般o既燒酒我哋冇買，香港雖然牌子唔多，但總算有得賣，我哋買咗釜山特色o既馬格利米酒，同胡家o既各位分享分享，呢個好易入口呢，甜甜的，幾好味~

除咗米酒，結果都買咗泡菜呀，係有個姐姐係度剪同埋磅嗰啲，我哋先揀咗呢區特色o既芥菜泡菜，另外一款蘿蔔泡菜係個姐姐推介的，佢話好多香港人鍾意嗰款，but…佢誤會我哋係泰國人﹗﹗莫非我哋真係曬到咁黑？﹗不過咁樣買都唔平，佢show俾我哋睇佢點樣計平俾我哋，哈，稱完貼完價錢label上去再放多三幾條落去，咁都得？怕唔怕俾人炒魷？不過雖然唔平，但番去發現都幾多，食極都有咁，不過呢，呢啲泡菜都陪伴我哋好耐(佢陣味﹗﹗)，放落day個背囊，番到屋企，大件事到佢要即刻放入洗衣機洗，至於啲泡菜放入雪櫃之後，雖然有兩層膠袋嚴密地包住，但每逢開雪櫃你都唔會忘記佢囉~哈~我哋仲買咗基哥要o既紫菜啦，買咗啲咖喱包，仲有魚乾，好高興~

我哋塞晒啲嘢入locker先~

入嚟時見到地下間西餐廳今日試業，本身想睇下有冇得食，點知去問原來未正式招呼街客呢~唯有去美食廣場啦~

環境都靚靚的，同樣係震震牌號~

我哋叫咗一份冷麵，好誇張，連較剪都預備埋，等我大剪一揮~

同埋一份好似係日式風格o既定食，好多li-lo，好多樣食物呢~好豐富~

買咗咁多嘢點去Spaland？我覺得自己好聰明囉~呵呵~我哋搭咗的士去海雲臺地鐵站，然後放啲戰利品入去地鐵站o既locker，事關我哋臨走去機場前都要返酒店拎行李嘛，唔駛放戰利品去酒店，我哋反正都要經地鐵站，放係度咪順度囉，到時係地鐵站再pack番啲嘢入喼咪得囉~呵呵~

我哋再搭地鐵過番去Centum City，今次唔逛令人眼花瞭亂o既鋪頭了，直接去Spaland入場~Spaland係新式o既汗蒸幕，我去過韓國咁多次都未去過汗蒸幕，期待已久，因為係韓劇成日都有呢啲場景嘛，何況Spaland仲係Running Man景點添~

事關都唔係太了解入到去係點，我哋俾好錢，放好鞋入男女共用o既鞋locker區，就分道揚鑣了~入到去周圍望望先，唔唔，locker區，淋浴區、浸浴區、戶外浸浴區、treatment區…其實個feel有啲似上次去日本東京o既大江戶溫泉物語，都係室內o既大地方，有好多個浴池，唔同溫度咁，我就大浸特浸啦，不過可能係平日下晝，唔係太多人，有o既都係阿豬媽居多，冇乜年輕女子or小朋友，沖好涼，試試唔同o既浴池，有啲有按摩的~瑞典式o既sauna我就冇試了，平時physical都有嘛~我都唔知時間，因為冇約好day幾點鐘等~:p

完成後出去集合點，daydayday，唔見o既，等咗一陣，冇理由佢未出嚟o架？浸完浴，又入番去女浴室買支綠茶飲下先，出番嚟，ok，係度lu~我哋會合，原來佢出過嚟，見唔到我，就周圍逛一逛先~

地方好大，我哋行一行先再去焗桑拿~

地方好大，天然採光，非常舒服~

上一層有按摩椅同埋氧氣吧，見到氧氣吧有HAHA做代言人呢~

氧氣吧我就冇興趣了，按摩椅都唔錯，我哋按番個20分鐘先~呢度場內付費係嘟你個手鈪的，所以使錢好豪唔肉赤(出去先肉赤…哈~)，其實都唔係太貴o既~

好啦，試下唔同o既桑拿，有好多款式呢，係唔同場景同埋唔同溫度的，咩土窯、炭窯、金字塔、冰房…我都講唔番出嚟~

http://www.shinsegae.com/store/spa/spa02.jsp?storeCode=D09

有個網頁睇睇，不過好似冇英文的~

我哋就係咁樣係度攤~出一身汗好舒服呀~

係咪覺得呢個位置似曾相識呢？Running Man們就係中間個空地度玩，用拳套打水彈了~

金字塔窯~但我高度懷疑其實唔同造型都係純粹高興而已，應該功能上o既差異都係溫度o既唔同吧？我唔信真係有所描述o既能量甚麼甚麼嗰啲囉~

有個火窯真係超級熱，我哋係入面堅持唔到幾耐，平瞓嘛，要著地o既腳踭頂唔順，抬高腿嘛，其他地方就更用力地貼係地上，結果都係要逃走，再過去冰房冰一冰，所謂o既冰房其實都唔係認真凍，只係好似比較凍o既冷氣房，不過全部用藍色，視覺上涼爽啲o既~而且裡面有假水母魚池，睇落又更涼爽~

要真正o既涼爽嘛…

 

食冰吧﹗呢個就係我哋食o既第三個刨冰了﹗每一個刨冰都令人有驚喜，呢個都唔例外，浸完浴、焗完桑拿，好似消耗咗好多咁，要啲營養同埋熱量，呢個充滿住健康豆豆o既刨冰就啱晒了，所以嘛，三個刨冰風格都好唔同，但每一個都恰如其分地發揮佢o既作用~

咁好o既？大家分門別類咁放好食完嘢o既杯杯碟碟~

繼續焗焗焗，我要試晒17款﹗﹗

當然唔少得足浴啦，唔係話好想好想浸，因為Running Man們係度玩過踢毽子，有印象嘛？

情侶私人足浴空間~ :")

本來環境好清靜舒適，直至幾個細路係度吵吵鬧鬧，我哋就入番去了~

數之不盡o既休息空間~香港有咁o既Spaland就好lu，我一定會買月票呀嗰啲的~最後參觀埋休息室，有個人電視、雜誌任睇~我哋稍稍休息一陣就走啦，因為…嗚嗚…因為，要返香港lu~五日o既旅程結束lu~

不過返去酒店拎行李都有段小插曲，話說我哋去搭地鐵，未上車day就發現唔見咗銀包，吓？﹗不過佢話應該係漏咗係locker入面，咁呀，時間趕趕地，我呢個健婦就返酒店拎行李啦，Centum City地鐵站等~

我返到Sunset Hotel本來想叫frontdesk小伙子幫我打個電話去Spaland，叫人留意下個locker有冇銀包留低，可以keep住先，點知佢o既英文真係非常有限，係我同佢講發生咩事之際，day就message我話搵到了~搞笑o既係，個小伙子係度click呢樣click嗰樣，搵Spaland電話呀咩呀咁時，有個黑人遊客走嚟frontdesk，見我識講英文，就搭下訕，原來佢南非嚟做生意，想買啲嘢返去俾家人，問我有咩好介紹，哈，我就話買咗嘢食咋，原來佢哋買嘢係要買啲著得上身o既先係好，我哋傾談之際，唔知點解frontdesk小伙子誤會咗佢係我老公喎？﹗哈，連忙否認，哎吔，算啦，day搵到我馬上飛奔走了~雖然係健婦，但拎住大行李+超級市場戰利品，冇電梯o既地鐵站，都係有少少辛苦~好在我哋順利係Centum City站會合了~

去到機場，肚子餓，唔理了，入閘過關先啦，舊年犯過o既錯誤唔可以重犯(詳情可以自己搵下…:p)~點知入到去侯機室，冇熱嘢賣﹗﹗去便利店買杯麵，原來唔提供熱水？﹗吓？生氣中…結果買咗三文治店o既薯餅，但係冷藏翻熱o架咋，好過冇啦~

順利上機~今次個trip雖然都有啲小唔順利，但整體都好開心呀~每次有少少遺憾，下次先再去嘛~下次去韓國邊？睇Running Man，好想食下冬季泡菜，唔知幾時有機會呢？

釜山麗水trip完滿結束﹗

前往其他韓國旅遊blog

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================