18-2-2007：大年初一

大年初一，祝大家新年快樂﹗身體健康﹗心想事成﹗讀書o既學業進步﹗(<–我強烈需要呢個﹗)

一朝早去行個大運先，同爸媽姐去o左屋企附近行o左一陣山，其實只係麥理浩徑o既一小段o者，大概行o左一個鐘左右啦，出去行下，個人都舒服D﹗

拿拿聲番屋企沖個涼就要出去聖堂望彌撒lu，適逢今年年初一o岩o岩又係星期日喎~費事跟爸媽坐去送聖體員o個邊好似故意逗利是咁啦，所以今日坐o左過去choir o個邊，咦，居然又會因為咁又有多D第D利是喎~謝~好耐冇坐過係choir中間lu，原來唱得都幾雄偉o架，夠大聲之餘，D男聲和音o既幾首彌撒曲非常好聽，特別係「福音前歡呼」o既亞肋路亞呀~george同埋郭謙坐o左係我正後方，我諗聲音o既來源主要就係佢o地了﹗因為佢o地咁落力唱，我又更加落力唱了﹗係「答唱詠」o個度少少lao-gao啦，大家都唔係好識o個首短頌~

lunch番屋企食，嫲已經準備好餸菜俾我o地了﹗

下晝唔知點解大昏迷呀，唔通嫲落o左眼眼藥落D飯餸度？係廳度呼呼大睡﹗全屋得姐一個完全冇瞓過，因為佢係度落力地繡花呢~哎吔吔，瞓醒時已經差唔多要出發去婆婆度啦~

近年新年去婆度人都少o左好多lu，好多個阿姨都移o左民嘛，早幾年大姨又去o左柬埔寨，今年佢番來了﹗但人數o既多少同埋聲浪係完全冇關係o架﹗我媽o個邊o既家族係超吱喳超吱喳o架﹗每次我媽去完D家庭聚會，佢把聲係必定必定會沙﹗好誇張﹗因為為o左搶住發言，一定要夠大聲，要大叫出o黎﹗下晝時主要係媽、大姨同三姨媽係度吱喳o羅，康(大我一個月o既表哥)、卓(康o既細佬，即是我表弟)、菊姨(最細o既阿姨)同埋舅母(舅父排第五，o岩o岩細過我媽)就打牌，姐同爸係度睇下雜誌，我居然係呢個嘈雜o既環境都溫到DD書喎~入唔到腦都叫做俾對眼見o左一次丫，好過冇~

睇到菊姨同佢隻肥貓玩，佢真係「玩」隻肥貓o架﹗﹗﹗肥貓好恐懼咁呢~陰公了﹗

夜晚餐飯好豐盛呀，家姐話阿mi(婆o既印傭)廚藝進步o左好多﹗唔知全部係佢整o架丫定係都有D有婆親自下廚呢？我鍾意食茄汁蝦，可惜凍o左少少呢~有好好味o既湯，可以飲滿滿o既一碗再添，有得飲咁多湯實在係人間樂事呀﹗

大約9:15pm左右就番屋企lu，要趕番屋企…睇「大話妹」﹗哈哈，mandy，呢件係重要o既事o黎o架~家姐上星期同我一齊睇o左一集之後佢都鍾意o左睇，今日都提過話番去要睇﹗都冇令我失望呢~唔知之後會點發展呢？

mi-mi-mo-mo又搞到晏晏先瞓啦~

Google+

Rita Wu

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================