17-2-2007：大除夕的預備

由 Rita 於 2007-02-17 00:00:00 發表 | 累積瀏覽 410

分類：

今日失敗o左履行尋日o既承諾，我話要繼續努力溫書，點知今日溫過o既書…接—-近—-零—-﹗oh no no~年三十晚，等過新年嘛，全家人又都放假喎，放假心情特濃﹗所以就冇溫書lu，又要幫手準備下過年D o野呢~

一朝早起身本身都唔錯o架，都好乖乖咁拎o左D書入爸間書房度溫o左陣，但到11:30am左右就走o左出去執下屋咁o羅(所以都唔算浪費時間or撻皮o架~)﹗盡量盡量要丟掉一D多餘o既東東，屋企實在太多雜物了﹗o個D電子產品o既紙盒呀，舊信件呀o個D o羅~執番上次一月一號孝女會o個兩袋o野，發現D勁恐怖o既o野﹗原來…原來…當時有袋新鮮提子放o左入我個紙袋度，我一直未執，所以…哇呀，「up」住o左係度兩個月﹗太恐怖了﹗令人稍為放心o既人，人類已經有幾千年o既歷史「up」住D新鮮提子，葡萄酒咪就係咁樣釀出o黎個o羅~呵呵(安慰自己﹗)~之後即刻丟出去了﹗

執o野途中媽咪發覺一D毛冷、織針呀~~~~~~~~~~~~實在太令人高興了﹗有好多全新o既毛冷，係家姐同我三分鐘熱度所剩低o架，家姐而家都鍾情於十字繡啦嘛，所以，哈哈，我已經全部據為己有了﹗但而家都未有打算呢，香港o既冬天咁熱，都冇咩好織，好似織俾day件冷衫咁，實在過份地暖了，著o既機會反而少~

又搵番以前D相出o黎睇，懷舊一下當年去澳洲讀summer course o既時光，又睇下以前去德國旅行o個次D相，哎吔吔，o個陣果然瘦過而家好多呀~一定要變美女呀﹗

下晝家姐係屋企開工整o野食，兩款糕，一鹹一甜，分別係南瓜臘味糕同埋紅棗糕，兩款以前都未整過o架，而家淨係試o左個南瓜糕，味道都唔錯，我就覺得稍靭(點寫？)o左D，鬆軟少少更佳~下次繼續努力﹗我就煮咖啡俾大家飲啦~

左邊係紅棗糕，右邊係南瓜糕~

究竟我晏畫仲做o左D咩添呢？點解乜都諗唔番o既？唔通真係乜都冇做過？﹗

大約五點幾我o地就出門口lu，第一站要去屋企隔離o既惠民園買年花，o個度係個大大o既園藝公司，有好多花o架，桃花、桔、菊花、芍藥…我o地都要花D時間o黎揀合適o既呀，因為o個度好多都好大棵，但要揀D放得落屋企o既就困難D，結果揀o左兩盆小小粉紅菊花啦~

買o左兩棵，一棵放大門旁邊，另一棵放廚房外面﹗

之後再去市中心o個邊，逛o左一陣街，出去主要係買放全盒o既糖果﹗我同爸尋日買得少少之嘛，原來而家係屯門西鐵站有間賣零食o既舖頭，品種同價錢都ok喎，有平價版truffle ﹗$12.5一包都幾好味~之後嘛，我好強烈地表達我想買蛋散o既渴望，冇蛋散o既新年點似新年呢？係西鐵站o既美珍香(牛肉乾店)都有得賣蛋散，但個樣又少少肉酸，又賣得貴，我o地結果衝番過去市中心，奇華又關門啦，去百佳試下吧，開頭唔知賀年o野特別放開o左，失望之處諗住用「崩砂」o黎代替，後來先知道原來有呀~好o野~有得食﹗好唔好味就聽日先算啦~

夜晚都少少撻皮o架，睇下電視，入下全盒，幫媽入下利是…最有意義o既係，幫爸剪o左頭髮﹗我發覺而家越來越純熟了，速度快o左好多，又可以按照自己o既諗法剪出o黎，但我淨係識剪爸個頭o架咋，幫day剪都麻麻地~上次幫姐更加係一場惡夢﹗

家姐夜晚搓o左湯圓俾大家食呀，又係另一新嘗試﹗

係蕃薯湯丸，用桂圓做湯底，我覺得湯丸o既質地幾好，但入面冇餡始終單調o左D，要是冇餡嘛，細粒D會比較好，食起上o黎，湯o既比例會較多，一係就加下D餡落去，媽話佢o地細個時會放片糖落去喎~

咁快又一年啦~預祝大家新年進步﹗日日都開開心心 ﹗