28-6-2014：美麗香港＠熱辣辣的浪茄灣

難得有星期六放假，一早約好day一齊去行山，我哋都好耐冇去過行得長啲嘅山，平時星期六、日都好多其他事情，有時得閒又撞正天氣唔好，所以今次叫day搵條長少少嘅路線，佢就揀咗由西貢西灣亭出發，倒轉行麥理浩徑第二段至第一段，跨過西灣山落去浪茄灣，再兜番過萬宜水庫東壩完成﹗想行長少少可以沿住東壩條路出返去北潭涌，但我哋已經熱到攰到郁唔到，結果係東壩上咗的士出番西貢咯～其實出發前我都唔係好知佢講嘅係邊條路線，到咗時描述得仔細啲至知，哦，咪我同爸媽幾年前行過嗰條路倒轉囉，嗰次仲有打過blog添～請參閱：30-10-2006：重陽登高之北潭涌、萬宜水庫、浪茄、西灣亭，原來已經係八年前嘅事呢～

我哋行嘅就係最最最東邊最尾尾嗰截喇﹗我哋係西貢市中心搭咗小巴入去西灣亭，途中好多彎路，單程行車，遇到對頭車都要互相禮讓禮讓，行唔慣呢啲山路嘅司機恐怕都會有啲緊張吧～落車，出發﹗開頭一段路都算多平路，行咗大概大半個鐘就開始上西灣山啦，好多上上落落嘅梯級，如果同一條路係16-20度天氣嚟行的話應該一啲都唔辛苦，但我哋返到嚟至知原來今日係酷熱天氣警告，不過講真，有冇警告我哋都feel到超酷熱，我估最熱最熱嗰陣都有34-35度﹗而且仲要太陽超猛、萬里無雲，仲要一滴風都冇﹗﹗我哋都有啲擔心帶嘅水唔知夠唔夠，口渴都只敢飲一啖咋～一有小小樹蔭就要抖一抖～

我最近咪開始戴Fitbit Flex嘅(請參閱：7-6-2014：Fitbit Flex之我要fit fit)，戴咗先發覺自己嘅lifestyle真係超sedentary，如果正常咁返一日工，到瞓覺時只係行咗四千幾步，比起一般所講嘅active lifestyle嘅一萬步連一半都唔夠﹗今次去行山就發現行山嘅威力﹗﹗我哋去到西貢晏晏地，開始行時已經十點幾十一點，但十二點幾我個Fitbix Flex就震震我了，即是已經有一萬步﹗所以由六月頭至而家，我步數最犀利就係呢日行山咯～

假日都幾多人行山，發現鬼佬嘅比例都真係好高，可能西貢多鬼住吧？另一方面我諗佢哋都比較著重workout，香港人好多時都冇將運動成為生活必然嘅一部份，平時問病人有冇運動呀，好多都會答「平時仲唔夠運動呀？﹗」，當然explore下之後佢講嘅係工作、係勞動啦，其實講到尾，人人收工都好攰㗎啦，但有啲人真係堅持到返工前or放工後定時去運動，時間係自己bit出嚟的，決心係自己立定的，大家加油吧～

我哋慢慢的、辛苦的攀登到西灣山嘅頂，好啊，有個涼亭又有啲風，就係呢度休息，食埋午餐啦～我哋由便利店買咗三文治、飯糰同埋麥精，好在經過熱熱嘅山咁耐都未變壞啫，麥精都仲有少少涼添～

過咗山頂就見到浪茄灣啦～雖然熱、雖然辛苦，但美景當前，人就精神為之一振﹗﹗

落山嘅路就好行好多了，過咗十二點鐘越耐，對於太陽曬得冇咁正嘅盼望就越大，雖然落山嘅路比較爛，要小心奕奕，總算冇咁費勁吧～迎面不斷有一組組上山嘅人，佢哋都問，差唔多到了吧？我哋只能夠微笑同佢哋講一聲加油﹗加油﹗

終於到咗浪茄了，打個咭先～

而家要嚟浪茄唔一定要好辛苦咁翻山越嶺了，有$$的話租架遊艇都得，但辛苦嚟到應該對個海灘嘅美更珍惜吧～

個海真係好靚、沙好幼、水好清，見到呢啲天然靚沙灘時就會反問，點解要花咁多錢maintain黃金泳灘呢啲人造沙灘呢？﹗之前睇報紙講過原來黃金泳灘啲人造沙不斷流失，唔同嘅工程都成效不大，印象中幾年前去游水時其實啲幼沙都只係鋪係沙灘上面，你落咗水就發現突然好深水同埋個水底都係粗粗的感覺，所以話勉強都真係冇幸福，大家著力好好保護僅餘嘅天然沙灘更有益吧～

原來浪茄都係指定營地，如果入嚟露營，都係由東壩嗰邊過來吧，行西灣山落嚟未免太辛苦了～露營嘛，要plan得好啲，因為浪茄營地只有一個水喉一個旱廁，冇士多冇補給﹗入到嚟就要靠自己咯～比起上次我哋去貝澳露營，挑戰性應該會大少少，下次試下嚟下啦，可以盡情享受個靚靚海灘～

出返去東壩條路都比較短同易行，我哋剩番嘅水唔多，都夠用去到東壩﹗

水塘啲水嘅顏色咁靚嘅？我哋遠遠望到東壩，最醒目嘅就係排成一列嘅的士了﹗當時我哋已經決定唔行了，就呢度搭番的士出去西貢啦，呵呵～day問我要唔要影相，我二話不說，走咯走咯就上的士，原來佢叫我影嗰啲六角柱柱，哎吔，我想影呀，噢，下次啦～:p出到西貢，又餓餓地又渴渴地，要畫上完美句點，點少得滿記呀～

Google+

Rita Wu

============================================

感謝 Rita 提供以上資料

Rita的網誌: http://www.wufamilyblog.com/~rita/

============================================