食飽飽，就開始我地既行街購買日程，沿住條行人街行，藥房、鞋鋪、ＤＶＤ鋪、雜貨鋪、布行全部都有。雖然熊本既行人街唔算好長，但帶住小朋友都好難行得哂。就係酒店對面就有間超大百貨公司－鶴屋百貨店。
行左幾個鐘，真係頂唔順。加上今日晚上熊本市有火祭，所以市中心黃昏就封路同埋好多人。我地對火祭又冇興報，所以６點半就試下去今晚ＢＯＯＫ左個間食店撞下有冇位，就係我地叫湯布院旅館姐姐幫我地ＢＯＯＫ８點鐘個間。入到去，滿哂人．．．冇計，再行下啦。
去到熊本，就一定要試下佢地既主要食糧，馬肉。馬肉原來係好好食既，同牛肉差唔多味道，但食落好似冇牛肉咁油。熊本馬肉料理出名多旅客去既係菅乃屋同馬料理專門天國。我地去個間係地道名店，むつ五郎，９成既客人都係日本人。むつ五郎熊本県熊本市中央区花畑町12-11 熊本グリーンホテル地下1階Tel: 096-356-6256
個鋪唔係好大，一眼見哂。Menu全係日文，唔怪得旅館姐姐怕我地唔識睇同講。我地渣住姐姐譯既英文本，落Order都一樣有難度，好彩坐隔離既日本大叔幫我地做翻譯。
地魚料理，都唔駛講架啦，都係新鮮。
霜降馬肉刺身
馬心
馬串(5本)
馬肉球
馬肉鹽燒
好可惜，馬舌、馬根刺沽清。小朋友就每人食多個燒飯團。
食飽飽就通街行一行，諗住番酒店，點知見到一蘭拉面，咁唯有去試下啦。間鋪冇咩人，日本人唔多，反而香港人就見到幾批。今次係第一次食一蘭拉面，香港個間要排3個鐘，你排埋我份算。我同大公子食一碗，又真係幾好味。但我點單時唔識睇日文，唔知係唔係點錯野，碗面係冇叉燒既??我老婆個碗都一樣冇。食完大公子話可唔可以食多碗? 飽到暈..算把啦。
上到酒店，見到只有一張大床。心諗，唔通我book時冇講明有2個小朋友?睇番個booking，原來我真係冇寫到。奇怪呢間酒店職員冇出聲...今晚就4個人一齊訓一張床....勁!
ホテル日航熊本
熊本県熊本市中央区上通町２−１
Tel: 096-211-1111
============================================
感謝 龍人遊記 提供以上資料
龍人遊記的網誌: http://dragonman-t.blogspot.hk/
============================================
