29 JANUARY 2010 (FRI)
今日既心情真係可以話搭過山車咁，一早約好左今日放工去醫生度覆診照OSCAR，雖然成日都叫自己唔好諗...唔好緊張，小小豬一定會PASS到個TEST，不過始終依個都係一個幾重要TEST，所以口就話唔擔心，不過都好緊張。
但依個心情隨住LUNCH之後就改變左，係心情仲差左...簡直係好似跌左落谷底咁。
當LUNCH後回到OFFICE如廁時，發現有流血情況出現，一見到啲血真係成個人都震晒，即刻打電話俾大肥豬同小豬媽，邊喊邊講，因為除左喊我都真係唔知自己可以點啦！
由於睇開醫生正值LUNCH HOUR，所以小豬媽就叫我即刻搭的士去養和醫院，到時再CALL主診醫生返嚟睇我。
原先我都係打算過左3個月先同老細講，不過冇辦法，我要即刻去睇醫生，所以迫住要提早同老細講我有左BB嘅事，講完之後我就一支箭咁走去搭車。
係我搭車途中，大肥豬都已經請左下半假同樣去緊醫院。小豬媽同小豬爸原本係入左新界拜神，佢地都唔繼續行程飛車去醫院陪我。
一入到醫院就即刻去登記，相信我個樣真係好慌亂，姑娘一見到我就即刻叫我放鬆唔好緊張，等左一陣，見姑娘將我個情況打電話話俾我嘅主診醫生。最後醫生叫我直接去診所，話可以順便照埋機。
既然醫生都咁決定，所以我就係醫院等埋大肥豬同小豬媽之後，再由小豬爸車我出銅鑼灣睇醫生。
一上到診所，醫生就即刻幫我檢查，瞓上婦科床上真係從未如此驚恐過。經醫生檢查後發現原來只係一個小問題，唔係小小豬嘅問題，一聽醫生咁講，我個心就即刻定一定，放心左少少。雖然係冇事，不過醫生都開左一日假俾我叫我休息多啲。
之後醫生幫我做埋OSCAR TEST，係超聲波機見到小小豬已經大個左好多，已經有可以睇到成個人仔樣，醫生話度頸皮度數好好，仲話小小豬胎身比預產期大左三日。
相信小小豬會係一個好活潑嘅小朋友，因為從超聲波機睇到小小豬手仔腳仔不停咁郁，好似打拳咁，仲表現左彈跳起身俾我地睇添，見到依個情況，真係完全放心晒，仲勁開心呀！
睇完醫生就再去化驗所抽血，做埋下半PART嘅OSCAR TEST，雖然通過左度頸皮，不過都要睇我個驗血報告先知係唔係完全PASS個TEST。
唉...要等三日先有報告出，真係攪到心情都15/16，不過想信一定會冇事，小小豬一定健健康康呀！
============================================
感謝 小肥豬 提供以上資料
小肥豬的網誌: http://kinseymama.mysinablog.com/
============================================
