23 JUNE 2009 (TUE)
見到是日晚餐依個環節，即又係我煮飯仔嘅時候。真係勤力，日日都煮飯。
哈哈....冇法啦，天氣咁悶熱，我地都唔想四周去，留係屋企就係最舒服。
雖然煮飯嘅時候都幾熱同攰攰地，不過煮俾大肥豬食都冇計啦！
由於今日係初十五要食齋，所以就煮左兩個冇肉嘅菜式，睇吓我地個是日晚餐~
先嚟一個仍然煮得唔係太好嘅蕃茄炒蛋，不過比起之前都已經有進步，起碼啲蛋唔太碎嘛~
再嚟一個冇失手嘅芝士什菇西蘭花，好味~
原本都只係預備整依兩個餸，為怕大肥豬冇肉落肚會唔飽，所以就加料買左廿蚊叉燒。原本打算大肥豬自已一個人就食一半，另一半就留番聽日用嚟炒其他餸，不過點知都係得咁少呀~
雖然今日我係食齋，但都非常滿足，仲可以留少少餸做明天個便當添。最開心就係食完飯大肥豬叫我坐定定睇電視，佢就幫我洗晒啲碗呀！
============================================
感謝 小肥豬 提供以上資料
小肥豬的網誌: http://kinseymama.mysinablog.com/
============================================
