今晚小豬媽又去左街街，所以又有機會入廚房玩煮飯仔啦！
我今日都好叻呀，整左兩餸一湯，仲要由諗至買都係我一個人負責！哈哈哈~~又向難度挑戰。
講起買餸又真係幾嬲，買豬骨嗰個老細竟然呃我。一買完餸返屋企就俾小豬媽睇吓D餸啦，點知小豬媽話個豬骨老細呃我枰，俾少好多我....聽完又真係幾激氣，點解做生意咁唔老實，下次都唔洗指意我會再幫襯佢呀！好在都夠我煲湯，如果唔係都唔知點算！
睇完D餸，就開始煲我個愛心靚湯啦！
由於見天氣開始乾燥，所以就想煲番個潤少少嘅湯，所以就諗到煲蘋果雪梨豬骨湯啦！都好容易煲，不過就成日要入廚房睇火！
另外兩個餸都係第一次煮，尤其係個炒油麥菜，之前都完全冇學過點整，所以都心大心細煮唔煮好。不過有一次大肥豬係街食飯時食過話好好味，所以一定要學整嚟煮俾佢食，所以就問左小豬媽大約點煮法，好在都算易整，所以就決定整依樣啦！
我今日嘅成功之作！
今日晚餐又可以俾我地三個人清晒，真係勁呀！
我成日問佢地D餸好唔好味，點知大肥豬答左我一句：你見我地不停咁夾嚟食就知啦！
聽完之前真係係好開心，尤其見大肥豬同LULU妹飲左幾碗湯，就真係特別開心呀！
煮飯雖然都幾倦，不過見食嗰D人食得開心，都真係值得呀！
============================================
感謝 小肥豬 提供以上資料
小肥豬的網誌: http://kinseymama.mysinablog.com/
============================================
