今日係我地嘅拍拖紀念日，計吓..原來唔經唔覺我地都一齊經歷左十個寒暑。
為左依個拍拖紀念十週年嘅值得紀錄嘅好日子，所以放工就約左大肥豬去慶祝一番。其實都唔係什麼大型慶祝，都只係簡簡單單去食餐飯咁啦！
次次有乜喜慶慶祝，都一定去食我最鐘意嘅日本嘢，其實我知道大肥豬唔係咁鐘意食壽司，只不過係知我鐘意先陪我去食。所以今次就去食大肥豬都鐘意嘅嘢，我地去左太子嗰間金鳳据扒啦！
金鳳咁出名，不過我都係第二次去，上一次係同大肥豬嘅朋友去尖沙咀嗰間，我就覺得麻麻地。不過今次我係去太子嗰間總店。
唔知係唔係太出名關係，我地七點都未夠就已經見到坐滿晒人，我地好好彩咁坐埋最後張枱，如果遲少少都有排等呀！
好啦......開餐啦！
先嚟一個勁有味嘅羅宋湯.......好味呀~
依個就係我地個牛扒同豬扒，真係好大份，個味仲唔好正添。大肥豬勁讚佢個牛扒好味呀~
兩杯蚊形凍檸茶，成餐最唔滿意就係依個，因為太細杯，飲兩啖就冇啦~
因為大肥豬依排好忙，成日都要拎嘢番屋企做，所以我地食完個簡單晚餐之後就返屋企。
就係咁就過左一個簡簡單單但又好開心嘅十週年拍拖紀念日啦！
============================================
感謝 小肥豬 提供以上資料
小肥豬的網誌: http://kinseymama.mysinablog.com/
============================================
