由於有朋友仔問我拎D結婚資料，所以就係整理自己婚禮上嘅資料俾朋友仔之餘，都同大家作一個小小嘅分享啦！
雖然都過左成五個幾月，但當回想嘅時候，嗰種心情都仲係好似剛剛發生咁。唔怪之得好多人都話，一個婚禮係會令人一生難忘，原來係真呀！
其實係成個籌備過程中，都有好多時侯都比較迷茫，唔知點算好咁。尤其係當BOOK左之後，係ESDLIFE發現所揀嘅商舖有人讚亦有人彈，嗰時真係好驚自己會揀錯。好在...成個婚禮完成之後，個個服務都好好，冇遇到黑店，可以順順利利完成我個婚禮。
婚紗攝影 – 新天地
(化妝師 – T.LING，攝影師 – LINCON) 
依輯婚紗相係我成個婚禮第一件去辨嘅事，所以都特別緊張。基本上由BOOK至影相成個過程，佢地嘅服務都唔錯，尤其係攝影師，佢好知道點令我地笑得自然。不過唯一唔鐘意就係佢地嘅售後服務，極度唔滿意本大相簿，左右兩頁完全唔似樣，唔知點解一頁左右兩張，一張有執過，另一張又完全唔覺佢有執。就算係同一個景，D色都好似唔同，到依家見到本相簿都嬲嬲地呀！
婚紗攝影 – 羅浮宮
(化妝師 – LING，攝影師 – SK)
依輯婚紗相我真係極度滿意，佢地嘅服務真係好好。尤其係當知道我地幅油畫出現問題時，佢地好有耐心咁幫我地解決，仲好快幫我地改番幅畫。好鐘意化妝師會俾你自己選擇頭飾首飾，又會問你意見想點SET頭，所以我覺得依輯相我個妝係靚D。最驚喜就係個民族服裝，真係冇諗過影出嚟咁好，我地仲揀左嚟做油畫添。
化妝– MAGGIE YEUNG 
係試妝時都覺得MAGGIE幾好，佢好細心又好有經驗，最重要係佢好快手，又可以解決到我大細眼的嘅問題，所有就決定BOOK佢。係BD嗰日就仲正，樣樣都跟得好足，最記得就係當LUNCH時，佢因為想我班姊妹食多D野去迎戰晚上忙碌工作，所以唔洗幫手，一個人又幫我換衫、換妝又SET頭，仲要SET頭時不停叫我食野，自己就冇啖好食，真係攪到我都唔係幾好意思呀！我好鐘意佢幫set嗰幾個頭，真係個個朋友都讚我靚同個妝自然呀！
婚禮攝影 – 新婚天地
(攝影師 – 飛鴻，攝錄師 – KELVIN) 
攝影對我嚟講可以話係成個婚禮最驚嘅事，因為當我BOOK左之後係ESD見到有唔係咁好評語，所以都真係好驚搵錯，加上我又係影數碼相，只係俾左套餐錢就包晒所有野，都好驚佢地影得唔會多。不過好在最後兩位攝影師都十分專業，冇遲到，一有時間就不停咁影，所以最後我地都影左好多相，影出嚟效果仲唔錯添。
租衫 – 紫水晶
依間係我第一間睇嘅借婚紗地方，當我試左兩套之後，就決定左JOIN。佢地D職員個個都好好人，尤其係老板娘，佢知道我嘅身型著邊類嘅晚裝好睇，介紹左好多俾我，又俾好多意見。總括我都十分滿意，套套衫都有人讚靚，仲著得我好瘦呀！
租車 - 皇牌租車
依間係車車介紹俾我，所以真係完全冇擔心過。佢地D車都十分新淨，司機又執得好正冇遲到。不過好攪笑就係原本我地BOOK左一部24座嘅旅遊巴，最後因為當日佢地十分FULL，終於俾左一部58座嘅大車我地，攪到班兄弟姊妹佢地好似去旅行咁。
註冊 – 紅棉道婚姻註冊處
我地揀左以最傳統嘅方法去註冊，就係去紅棉路婚姻註冊處。我地仲貪可以影多D相先揀依度。不過個註冊時間真係好趕，係個房入面唔係影得好多相，依個就可能係揀地點唯一唔好之處啦！
晚宴 – 銅鑼灣帝延酒家
依間酒樓係我同小豬媽揀，我地就係鐘意佢個佈置，尤其係佢地嘅愛情大道，真係好靚，原來好多客人都係好鐘意依個呀！食嗰方面，我就唔係太知道(因為我都冇乜點食)，不過聽朋友講都唔錯。佢地服務都唔錯，尤其係陳經理，真係樣樣嘢都跟得好足。
花球 – ALICE’S WEDDING 
依間我係誤打誤撞下CLICK左入去個網站入面睇，見佢地D花球都好靚，打電話去問時嗰位姐姐又好有耐性解答我嘅問題，所以就決定用依間啦！依個姐姐嘅服務真係好好，好知道我想要D乜，所以就幫我整左兩個好靚嘅花球同一大批靚靚襟花呀！
============================================
感謝 小肥豬 提供以上資料
小肥豬的網誌: http://kinseymama.mysinablog.com/
============================================
