今日終於都去左酒樓交第二次訂啦~~
因為之前都有留意其他blog友仔話個場都有幾大改變，所以今日去交訂時，都好留心佢地個佈置....好在睇完之後，我地都覺得幾好。因為佢地個場係以西式為主，個場主要用左紫色，都唔差呀~~好過之前睇紅當當呀！總係怪怪咁...
最衰今晚佢地有某間保險公司book左嚟做場，所以都唔可以太多場地相，只係影左個主台同走廊呀！
依條就係所有客人都必經嘅『愛情大道』，真係幾靚呀~~
依個就係個主場，都ok啦~簡簡單單，但個玻璃台就好靚啦！
希望嚟嘅各位親友都鐘意個佈置啦~~
除左落定之外，都有兩樣收穫呀！就係揀埋帖款同簽名佈款啦~~
講真，佢地d帖又真係少款都......好難揀，原本我建議出去自己整，不過就俾大肥豬同小豬媽阻止左。佢地都一齊話唔好洗埋d冇謂錢呀，同埋帖入面依家可以放埋結婚相落去張牛油紙入面，又唔洗額外加錢，變相都抵左啦！
諗諗吓都係呀~~結婚已經用左好多錢，既然佢地有送冇理由唔要呀！同埋我諗賓客都會俾我地張靚靚結婚相吸引住，都唔會理個封面啦！所以都算啦~~煩少一樣得一樣呀！
係簽名佈方面，我都揀左一張粉藍色底嘅，都ok靚啦！經理話依張簽名佈係長少少，會足夠我全部賓客簽呀！真係都幾開心，因為我之前仲諗緊點解決簽名佈問題，因為新天地嗰張真係好似細張左，會唔夠簽呀~~依家又解決都啦！
整體上今日好似攪好左好多野，等我9月3日book埋個註冊時間，同等埋羅浮宮d結婚相出，我就可以落實做野啦~~
============================================
感謝 小肥豬 提供以上資料
小肥豬的網誌: http://kinseymama.mysinablog.com/
============================================
