11 JANUARY 2014(SAT)
今日係小小豬學校舉行上學期家長日，由於我日日都見到老師關係，所以其實我心情都真係唔多緊張，因為其實日常小小豬發生啲咩特別事，老師都會即日同我講(當然即係投訴)。
不過，大肥豬就非常緊張，佢好擔心老師唔知老師會講啲咩，怕會另到佢自己唔開心哦~
一入到課室，老師向我地講嘅第一句說話就係：小小豬真係進步左好多！比起初初入學時，小小豬聽教左好多呀！
之後老師就同我地講返上學期小小豬嘅評估~
老師話小小豬係學算性方面真係發展的唔錯，認字、概念依啲都冇問題，教幾次就可以完全做得到，話佢係有啲小聰明嘅小朋友。
說話方面都仍然比較弱，最大問題就係小小豬嘅情緒控制都唔係幾好，老師話佢有啲怪脾氣，所以老師都講開學初時小小豬都真係幾難攪呀！
不過，老師話近依兩月小小豬都有好明顯嘅改善，上堂會乖乖坐好，專心左同埋冇乜點發脾氣。不過，做手工勞作都係仍然唔多肯做，但比學期初好左啲啲，參與度多左呀！
評估表仲有兩張學校生活剪影，點解得兩張相咁少呀？唉...我明白呀，因為學期初小小豬咁攪事，老師又點同到佢影相呢~
不過睇見依兩張相入面嘅小小豬都笑得咁開心，睇嚟小小豬都好鐘意返學呀！
其實成個面談過程都只係大約五分鐘，雖然老師嘅說話唔算多，但我地都感覺係好正面。感覺到老師都已經諗到一個好辦法嚟教依個百厭嘅小小豬，同時老師亦知道我地家長方面係好作出配合，大家行徑一致，目的都係為小小豬好嘛！
坦白講，開頭我地都怕小小豬係攪事份子，加上課室內又有咁多小朋友，所以都曾經擔心老師會討厭佢，唔理佢。不過今日見到老師讚賞，加上又可以同我地講到好多小小豬嘅口頭禪，依一刻我都會覺得原來老師係好留意小小豬，証明老師都冇離棄到小小豬。
雖然老師對小小豬評價都係一半好一半壞，不過從老師同我地面談過程嘅笑容，同埋對小小豬的評語，我地內心都已經好滿足啦！
我地會繼續好好教導小小豬，希望可以好快咁改埋佢啲怪脾氣，咁就可以成為一個好好好嘅學生，老師就會更加愛鍚佢啦！
============================================
感謝 小肥豬 提供以上資料
小肥豬的網誌: http://kinseymama.mysinablog.com/
============================================
