3 DECEMBER 2013(TUE)
話咁快就又到左結婚紀念日，唔覺唔覺原來都已經做左大肥豬太太六年啦！
由小小豬出世開始，我地成日都話帶埋小小豬一齊去慶祝，今年終於可以做到，三口子開開心心去慶祝啦~
今日行程雖然簡單，不過就好豐富！
首先大肥豬下午放假，陪我一齊去接小小豬放學， 之後就開始我地個慶祝活動啦！
大肥豬先帶我地重遊香港公園依個重要地方，因為我地就係依度註冊~
依張相係小小豬幫我地影，估唔到又影得幾好哦...哈哈哈~
之後我地見仲有時間，所以就帶小小豬去兒童樂園玩吓，不過因為天黑黑了，所以影唔到相呀~
我都係第一次去香港公園嘅兒童樂園玩，原來嗰度個樂園真係好大，分別有好幾層，唔同種類嘅玩樂設施。今日時間少少，都玩唔晒，搵日一定要帶小小豬再嚟玩過呀！
其中有一樣小小豬都都不知幾鐘意，就係依個約三層高嘅滑梯~
開頭我地都以為小小豬會好驚，唔肯玩，點知佢一見到開心都嚟唔切，來來回回都玩左唔知幾多次呀~
夠鐘啦...我地去醫肚啦，大肥豬帶左我地去港島香格里拉酒店嘅Cafe Too食自助餐，依度我都係第一次，啲嘢食勁多種類，仲勁新鮮呀！(唯一就係貴左啲啲啦，不過大肥豬話又唔係成日食，所以豪一次啦)
依度都只係其中一部分好美嘅嘢食，仲有好多熱食我地放唔晒出嚟同大家分享呀~
勁推介小籠包，真係十個好味，我依個小小籠包控同大肥豬加加埋埋食左十幾隻呀~
開餐啦~
小小豬見我地成日行出去拎嘢食，佢又話要出去睇吓哦~
可能係臨近聖誕，所以場內小朋友可以有得去玩抽獎遊戲。唔係個個都有份，小小豬好叻仔抽到一份呀~
之後就到小小豬至愛環節，就係去食雪糕，佢仲好叻叻咁自己ORDER呀~
小小豬真係好為食，食唔停口呀~
食完仲玩陣小禮物~
之後就再去食多次雪糕呀，平日都唔係成日有得食，見今日係重要日子，放縱一吓食兩杯啦~
好明顯小小豬係唔滿意佢嗰杯係咁細啦~
最後嚟杯餐飲，就完成我地嘅自助餐之旅啦~
今日依個自助餐我真係食得勁多嘢，可以話係由頭食到尾，我自己都覺得我好利害呀！不過啲嘢食又真係好正，加上人又開心，所以真係唔覺唔覺食多左，又肥多幾磅啦！
最後係酒店下嘅聖誕樹影相，咁就完成我地周年結婚活動啦~
今日真係玩得勁開心，當然除左好節目之餘，小小豬係食自助餐時個表現又真係十分好又好合作，所以又係時候俾十個叻佢呀！
大肥豬仲話見小小豬依家出街食飯都係咁安靜又合作，所以話帶佢去多啲食自助餐添。
哈哈哈...係就好啦....因為我又有機會可以去玩玩玩食食食啦(最大得益者應該係我)！
============================================
感謝 小肥豬 提供以上資料
小肥豬的網誌: http://kinseymama.mysinablog.com/
============================================
