1 DECEMBER 2013(SUN)
今日小小豬終於都可以開開心心咁打鞦韆啦~其實打鞦韆對其他小朋友可以話係一見好容易嘅事，不過唔知點解由細細個開始，小小豬都抗拒打鞦韆，去到公園一見到個鞦韆就已經話要去另一邊玩。
小小豬咁抗拒我地都相信應該唔係佢對空間感有問題，因為佢都成日係玩滑梯時都扶住個扶手搖動佢個身體，就即係好似係咁~
雖然都知唔鐘意玩鞦韆都唔係啲咩大問題，不過我地都好希望小小豬可以試多啲唔同類型嘅遊戲，所以我地當去到有鞦韆玩嘅公園時，都一定會行過去睇吓其他小朋友，之後又慢慢玩開始同小小豬一齊玩。
當然，開初都真係有一定難度，尤其係叫小小豬坐上鞦韆上面，因為小小豬都一定喊得好利害，唔知嘅人仲以為我地係拐子佬呀。
經過大肥豬不斷努力，小小豬開始對鞦韆少左啲戒心，由初時唔抗拒行埋去，到可以抱住佢坐係我地大脾上坐，之後坐住我地大脾上搖，再過多一陣就可以自己一個人坐係鞦韆上面。睇住小小豬依個慢慢改善，其實我同大肥豬都已經好開心。
不過，真係估唔到小小豬今日就俾左個大驚喜我地。事緣因為我地今日上完主日學之後就趕入海洋公園玩，所以就冇去附近個小公園玩鞦韆。
點知......小小豬竟然主動話要去玩鞦韆，既然係主動，我地當然好樂意去玩一轉啦！當佢一見到個鞦韆，佢就自己走左上去，開頭都係叫大肥豬慢慢搖，玩左一陣就話要大力啲、搖高啲，仲玩得好開心，仲唔洗大肥豬陪添呀~
仲玩到唔願走添呀~
睇見今日小小豬依個行為，我同大肥豬都真係勁興奮，嗰一種心情真係難以形容，因為小小豬終於都克服到佢個心理障礙，可以好ENJOY咁打鞦韆啦！
============================================
感謝 小肥豬 提供以上資料
小肥豬的網誌: http://kinseymama.mysinablog.com/
============================================
