呢篇係脫稿過期文章,
因為觀課已經係一月中o既事
隔左成個月先post 返文
雖然慢左o的, 但我覺得都需要寫返o既
話晒都係通識班上左一個學期o既小結
由playgroup 開始, 小齊返呢度o既日文已經年半
由親子playgroup 上遊藝坊再到而家o既通識班
除左playgroup 媽媽係可以一齊上之外,
其餘都係小齊自己上
唔係咁易知道上堂實況
好彩, 學校方面安排左一年兩次o既觀課,
等家長可以了解下小朋友上堂情況同進度,
為左呢日觀課媽媽都請左半天假
未齊人我地影下相先
由playgroup 到遊藝坊都係比較輕鬆,
一星期只一天, 1個鐘多o的, 叫做初步接觸下日文
但由2013年9月中開始上呢個通識班, 課程變得密集
一星期返兩天, 時間都加到每次2個鐘,
進度都會寫落教材
開頭都擔心小齊會唔會辛苦,
因為星期二同五上晝返完學下晝就返日文
未開學之前驚佢休息唔夠應付唔o黎
好彩佢都好乖, 返日文前都會瞓下晏覺,
精神充沛完全冇問題而且好開心
小齊上日文之所以咁開心因為次次都有好朋友minako一齊
大家亦都係因為上日文playgroup 先認識到,
後來大家又一齊考到根德園好巧合 (不過這是後話)
上堂喇!
點名, greetings 同報天氣 (大家都好踴躍爭住報)
之後有運動環節
呢樣我睇到小齊好大進步,
我同佢返playgroup 果陣佢唔肯做體操咖!
而家就玩得好開心
小朋友都非常投入, 玩得好高興咖
(除左一位小朋友大半場都在啜泣, 不知何故,
我問小齊, 佢話: "係呀, 佢係咁咖佢")
睇o黎佢唔係好想上堂咁, 見佢媽媽就有點黑面...
但小朋友情緒o既o野真係唔係咁易控制到...
體操然後老師會問下小朋友問題, 認下字卡,
小齊認字卡相當理想, 我平時o係屋企冇乜同佢溫習,
但佢都認到90%, 表現幾好
其實呢度o的小朋友o既學習進度都唔錯的
佢地多數都可以回答老師問題
學生有兩類:
1. 已經上左一輪日文playgroup, 有少許日文底;
2. 家中有日本人, 有日文語境
或者係上述兩者加埋
學生都係通過左評估先可以返學, 確保跟得上進度
跟住有唱歌同遊戲時間
佢地都玩到熟晒, 老師彈琴佢地就跟音樂玩,
行行下全部扮瞓覺...
老師琴聲一響又起返身
大家跟住老師講o既內容o黎做動作,
玩得好投入
見小齊上堂咁開心又學到o野,
媽媽都放心了~
家長觀課o既部份只有一小時, 之後家長就退場,
小朋友上埋下半場, 下半場會包括食茶點, 講故事同做手工,
有時見佢地會睇下卡通片
次次接小齊放學果陣佢都玩到塊面紅卜卜
通識班雖然話係日本人幼稚園o既模式,
不過冇功課亦唔駛抄寫,
小朋友只會o係課堂上做下美勞,
我覺得咁樣幾好, 因為小齊返幼稚園已經有功課要做,
如果課外活動都要做功課未免辛苦,
而家咁樣輕鬆愉快學習好理想!
原來校方除左安排觀課仲預備左一本關於小朋友o既課堂剪影,
包括有上堂o既相同埋手工勞作 (相當有心哦!)
婆婆一齊o黎接放學 (因為約左朋友食飯)
食飯仲有禮物
風騷得你~
是日靚衫:
ROBERTO CAVALLI + BURBERRY + PAUL SMITH JUNIOR +
GAULTIER JUNIOR
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
