呢個post 真係跨年post, 我由蛇年寫到馬年...
講返九州旅程第6日
(我發覺我真係要快手寫返o的遊記, 之前幾次都爛尾)
第6日行程由酒店o既早餐開始
又係非常精緻!
只係早餐都咁多細細碟
第時返香港食唔返點算?!
睇怕又要等下次o黎日本先可以再食到咁靚咁有心思o既早餐
食完o野我地去左浸呢度o既大眾風呂,
呢個時候仲開始落雪~
風呂都唔差但同前一日o係黑川o既露天風呂就有d 距離
今次住呢兩間溫泉旅館各有特色,
爸爸就話鍾意由布院呢間多o的
臨離開時影張相先~
今日本來打算去別府一遊但行左冇耐上山o既路發現落雪大左
o的車都pull over 一邊綁雪鏈,
唉呀死喇, 我地唔識咖!!
早兩日拎車時店員講o既問題卒之出現喇...
咁點算呢 ?!
最後我地決定原路折返, 返返由布院行街算數
途經一個瞭望台, 落車影下相
山上望返落去見到o既由布院
呢度又落雪又吹風, 真係幾鬼凍
小齊勁話好凍, 仲發脾四
咁我地都即刻走啦
落返o黎地面暖返晒
周圍行下手信街, 去唔到別府都唔係太差,
買下手信行行食食仲好,
今次真係錯有錯著
呢度o的蜜糖好出名,
媽媽買左好多唔同味o既蜜糖
仲有土產店
有o的有得試食, 小齊食左好多,
正餐又唔見佢咁開胃
媽媽睇左o的旅遊書介紹呢度有間唔知咩視藝館
都幾偏僻, 有地圖都唔係咁易搵到
全館細細但都係影相位, 唯一係要小朋友合作擺pose
小齊你o的"戲"都幾得喎, 真係好似行緊獨木橋咁
小齊見到呢個婆婆驚到喊...
睇o黎係因為扮白雪公主入戲太深
行完呢個什麼視象館小齊就瞓左
我地跟本旅遊書介紹搵地方醫肚
o黎到一間相當唔顯眼o既餐廳
o係大街要轉入小路先搵到,
o黎o既都係本地人, 冇見到遊客喎
叫左炒雞肉同埋燒牛肉定食
望落都唔錯
正呀o的油花! 真係好味
好味到點?
好味到小齊瞓左叫極唔醒, 但當我放細細舊牛肉落佢個口佢就彈起身話要食囉!!
之後仲好開心食埋剩餘o既牛肉! 一點起床氣都沒有!
食完o野再周圍行下
hehe...卒之見到你...
B-SPEAK!
好似O黎親由布院o既人都會o黎呢度買蛋糕咁,
我睇左幾個blogger o既blog 都話一定要o黎買捲蛋
本身我係無可無不可, 捲蛋真係想像唔到會幾好食 ?!
而且拎唔到返香港, 要即晚食晒~
咁多人推介免得後悔都o黎趁下熱鬧
要排隊~
到我喇, 細o既已經賣晒, 咁就要個大咖啦唔該
下一站o黎到金鱗湖
呢度又係好鬼凍呀, 影相都影到隻手都僵埋
搵間coffer shop 坐下取暖啦
小齊睇o黎lunch 仲未食飽, o黎呢度再食過
o係呢度影金鱗湖影唔到o的咩, 但勝在唔會凍
小齊猛叫我影o的鴨仔
byebye 喇金鱗湖~
byebye喇由布院~
我地返車站還車喇~ 多謝呢架車車陪左我地3日!
o係車站望出去o既風景~ 寧靜o既小鎮
希望有機會再o黎
離開由布院我地係坐呢架車 -- 由布院之森
由布院返博多每日都有幾個班次, 但唔係所有班次都係由布院之森,
想坐的話要留意下時刻表
搭到尾站就可以返返博多喇
開頭見人地話要坐呢班車都唔知有咩特別
原來都幾多o野"玩"的
車上服務員會o黎搞o的花臣o野
好似借o的道具比人影相呀
又送紀念品(鐵路圖) 比小朋友, (仲有糖派!!)
hehe...仲有mini 制服比小齊著
hehe...一齊o黎個合照啦!
坐左兩個鐘o黎到博多喇, 今晚係行程最後一晚啦
今次唔係住第一晚間酒店, 住祗園呢邊, 離博多一個站
o黎到酒店第一件事係食b-speak, 哈哈,
再唔食驚夜o的食唔落
打開就係咁~ errr...我真係覺得一般
比一般食o既捲蛋係好食o的, d cream 唔漏, 蛋糕幾鬆化,
但再好食都係捲蛋...唔會變成和牛...
試一次就算~
o係酒店又再hea 多陣等小齊瞓醒, 無錯, 佢又瞓左!
始終晏晝果陣掛住食牛肉搞到瞓唔夠, 哈哈!!
跟住o係車站拎o既美食指南o黎到附近o既居酒屋食晚餐
我地叫左2人餐3個人食, 最後發現係more than enough, 3個人都飽到攬住個肚
黑mung mung估唔到係豚肉, 唔係好靚賣相但原來呢味菜我最欣賞
呢個鍋開頭以為係雞肉
原來係柚子牛腸鍋, 又係牛腸, 果然係博多名物,
係肥膩左o的, 不過柚子湯真係幾惹味,
我都買左幾樣柚子調味料返香港用
小齊同呢度o的姐姐有傾有講, o的姐姐有點驚訝於佢識得知講日文同英文,
請佢食薯條, 小齊當然開心啦~
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
