小齊今日3歲半喇~
返左學都成個幾月,
媽媽係時候紀錄下小齊o既成長進度
上次寫成長紀錄係40個月, 正式返學之前寫o既
咁又過左兩個月喇,
呢兩個月轉變都幾大喎
開左學正式讀書真係個人都大個左
一般發展:
體重：冇磅到不過估有30磅左右
身高：應該都係 91cm
衣服尺碼: 90-110, 2Y - 6Y 都有, 視乎牌子與質地
鞋碼: 25, 有部份舊鞋仔交左比學校轉交GSIS 捐比其他國家o既孤兒, 小齊即問我係咪即係madeline 咁, 我話係囉係囉
飲食習慣方面:
晨早morning milk 170 ml (o係床上嘆奶用奶樽果隻),
比之前飲260ml 而家減左奶量, 等佢食得落茶點
早餐(茶點) : 冇得同公公婆婆去飲茶喇, 10點半左右o係學校會食茶點,
呢樣有進步, 由完全唔肯食到而家食晒!!
關唔關我整得靚事 ?? 呵呵呵...
零食: 仍然都係愛食糖, 仲要揀口味~
午餐: o係婆婆屋企食
晚餐: 等埋媽媽放工一齊食, 大家都覺得小齊食多左飯!
可能係之前太少
認知能力方面:
英文: 呢兩個月開展左希望工程, 所以英文方面有唔錯發展
聆聽能力係提升左, 最重要係佢唔抗拒聽同睇英文,
有時d dvd 有中/英 雙語選擇佢都會揀英文。
兩個月以o黎聽左廿幾本audio books, 以一年100本o既plan o黎講完成左1/5
不過我知道1年100本只係個開始,
我已經寫緊下年果100本o既book selection了
我發現audio books o既選擇亦都越o黎越多, 睇o黎都有唔少家長係同道中人
英文閱讀: 暫時都仲要媽媽做伴讀書僮o係身邊佢先肯睇,
睇o黎都仲有一段路佢先可以自行閱讀,
好在敗家媽媽都幾enjoy 做小齊o既伴讀書僮
而小齊認字o既能力基本已經建立, 而家係加強識字o既深度,
希望佢keep 到閱讀英文書o既習慣, 剛開始左比小齊聽 fancy nancy o既story book
故事有趣, fancy nancy 著衫又夠fancy, 我同阿女都like...hehehe~
佢仲有d fancy words o係結尾, 呢樣我覺得幾好, 擴闊vocab o既程度
數字: 呢方面我比較懶, 交比學校教算了
仍然停留o係數數o既階段, 加數果d 等學校教
中文: 返左學之後有好大進步, 我指認字方面~
自己之前試過拎字卡教佢, 不過成效不彰,
可能係欠系統同溫習, 開學前小齊認到o既中文字應該係20個左右
但開學幾星期 (真正開始教學時間得9日) 就已經學左9個字
有o的仲係幾複雜筆劃o既, 例如: 腳, 眼, 衣...
而且小齊仲一睇就認得出 (以前唔多唔少要提下水)
覺得學校真係教得好好, 比個讚!
普通話: 9月時比小齊開始上個課外o既普通話唱遊班, 我估係好似playgroup 形式咁,
有本唱遊歌書同cd, 我play 返比小齊聽時佢可以讀返比我聽,
應該上堂都冇發夢,
不過上堂得兩個人,
小齊唔係咁喜歡, 諗緊上完一個module仲上唔上呢 ?
中文閱讀: 除左學校教之外, 媽媽仍然會借/買中文書比小齊,
剛剛就去左景行開倉買左幾本中文繪本 (我只買圖書館冇得借果o的)
圖書館o既中文繪本其實已經相當充裕, 所以買都係買得好輕手
希望學校教左o既字佢可以記得, 咁慢慢可以培養佢對閱讀中文書o既興趣
因為暫時佢都係睇英文書比中文書多, 自己揀的話多數只揀英文書
日文 :日文9月中起轉左常規通識班, 一星期兩堂每次2個鐘,
形式類似日本人幼稚園 (不過我未返過我都唔知即係點?!)
最重要係小齊返呢個班係返得好開心, 因為有死黨 minako 一齊上堂
次次都有d手工做, 暫時都只做下勞作, 未有任何抄寫
自理能力方面:
戒片成功左9成啦, 但夜晚都會用片片以策萬全...
上星期有一次媽媽唔記得幫佢著片...
瞓到3點時, 小齊叫我: 媽媽, 好濕呀~
媽媽即紮醒, 心中大叫: 大~獲~啦~
成床都係, 被單都濕埋, 成身都要換過, 仲好大陣...尿味...
所以夜片仲要d 時間先戒到
不過今次蝦碌事件都有d得著, 自此之後,
小齊試過有兩晚2點幾叫我起身同佢去toilet,
我估佢都開始sense 到夜晚急都要起身去toilet
刷牙唔錯, 而家可以自己刷了, 有時好趕時間我完全唔幫佢手都ok
因為晨早真係比較趕呢,
我又要換衫, 化妝, 同佢換衫, 整食物盒, 毛巾盒, 杯, 探熱, 紮瓣etc...
小齊能夠自己做部份我就輕鬆o的
返左學之後自理好左好多, o係學校係自己去toilet, 洗手,
返到學校佢自動自覺拎手冊出o黎, 書包會放櫃桶
kv 真係好train up到小朋友discipline,
有時我聽阿女o既report 我都覺得學校係幾嚴謹
o的人話KV train 到d 小朋友自動波做功課,
我好響往咖...
睇o黎學校真係有一套令小朋友自己做自己o既o野
活動能力方面:
自己行多左好多, 有時我一日都唔駛抱一次,
雖然有時都仲係要扭抱同埋要坐BB車 (esp去旅行就一定唔少得)
因為佢(有時)都仲要午睡/小休差電
我起初有d擔心佢返學有d地方要上落樓梯會唔會有問題,
但佢似乎又ok, 識自己扶住上落
放學時佢坐校車返屋企, 上落都有校工睇住,
校車仲有老師跟車, 唔可以玩同埋傾計,
咁我問小齊你o係度做咩, 佢話: 我睇風景囉~
ballet o既班升左一級, 不過未有觀課安排未知佢上成點,
但肯定佢係返得開心, 因為上完又有貼紙又有糖派
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
