雖然小齊而家都仲未開始返學, 但敗家媽媽不時都會思考下小齊o既學習路向應該係點走? 有時都比坊間五花八門o野學習班搞到有d 頭腦混亂~
唔比佢上呢班果班又話輸在起跑線上...個個都想小朋友叻, 考第一,
但經過三年斷斷續續o係呢個問題上思考/纏繞,
我o既"初步"結論係 -- "只上興趣班, 不上學術班"
![]()
意思係除左學校教學術o野之外, 敗家媽媽唔會o係幼稚園階段同佢安排任何"學術型" o既課外班,
什麼phonics 班, 公x數, enxpi 數之類, sorry, 我都要將佢地拒之門外!! 就算成績冇人地咁好, 媽媽只會盡自己力量去教同引導小齊~
衰d講句, 我唔信你幼稚園我教你唔掂!!
放假放學之後, 只會因應小齊o既興趣, 安排少量o既興趣班, 好似佢而家學緊o既跳舞, 日文, 最緊要佢有興趣同埋開心,
揀興趣班只選擇 "非關學業, 只關風月" 類別~ 其中繪畫, 舞蹈, 語言, 書法, 音樂, 運動等等都係考慮之列,
但一定會跟隨小齊o既興趣而行~
![]()
真心覺得幼稚園階段唔駛死操佢學術o野, 佢返學學到幾多就已足夠, 幼稚園階段媽媽只會不斷努力培養小齊o既閱讀習慣。
暫時亦欣喜佢喜歡閱讀, 有時佢固執於閱讀o既情況真係令我又好氣又好笑,
12點都唔願瞓, 係咁叫我"不如讀多一本" (但係最後一本之後又有最最後一本......)
有時我同爸爸輪流讀成兩個鐘佢都未厭...
![]()
剛拜讀屈穎妍新作 < 怪獸家長 3 >, 有借鏡之處, 亦有不少引以為戒o既地方,
其中一樣係 --- 唔好將小朋友o既"興趣" 變得太功利!
有一篇講小朋友有興趣游水, 家長就即刻話幫佢報游泳班, 但小朋友可能根本唔係咁意思,
想游水未必等於想游到入泳隊, 要比賽果d, 可能只係純粹想"嬉水", 唔係"操水",
唔好下下都想小朋友興趣提升到獎項/ 證書等層次, 純粹享受一下課外活動帶o黎o既"課外感覺" 唔係更好咩?
希望小齊o係學習路上一直會感到愉悅而唔係壓力!~
![]()
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
