暑假旅行第2浪係同屋企人一齊去台灣
今次有未出過城o既團友-- 羲羲表弟
佢第一次坐飛機去玩, 我地6大3小,
理論上係2對1,
三老表第一次一齊去旅行,
唔知今次旅程又會ok 嘛?!
我地今次坐HK EXPRESS 去台中,
冇飛機餐食, 行李逐件計, 不過去台中咁短程都冇乜所謂,
一落機小齊就話肚餓, 婆婆比左個飽佢~
婆婆好強, 成日都隨身有o野食
兩年前o黎過台中, 個機場十分豆泥,
而家唔同晒, 又大又新!
到埗第一站就係租車, o係香港已經book好左車款,
o黎呢度比埋錢同辦手續就可以出車
租車用HSBC 白金卡比錢有75折
車款多數係日本車
今次我地9個人租左兩部車, 一部日產 TEANA , 一部TOYOTA CAMRY
每部 5日大概10000 台幣 (路費, 油費另計)
攞左車之後第一站去食o野, 唔係好熟地頭,
求其set左個導航諗住搵個地方有得食有得行街,
最後o黎到勤美誠品
食左個唔係幾好食o既拉麵之後去行街
一場o黎到買杯試下
飲後感: 比起香港果d冇咁重奶味, 反而有陣涼粉味
可能飲慣左, 我比較喜歡香港o既改良版~
之後我地9人分開行街,
我, 小齊, 棋棋表哥同舅父去左行誠品,
婆婆公公去行DAISO,
多得舅父幫手湊仔講故事佢地聽,
我先有得睇下書,
好似呢d 香港好少見o既手作雜誌, 今次買左一本ONLY
帶小齊去左兒童專區
小齊指住本 "John Patrick Norman McHennessy, the boy who was always late"
係, 我地睇過, 係希望工程100本之一
見到FROZEN 繪本佢開心到呢, 執到金咁o既樣!
行完誠品揸車o黎買手信, o黎到台中車站附近,
附近有好多賣台中特產太陽餅o既舖頭
起初大家聽到話去宮原眼科都有d懷疑
婆婆問: "去睇眼呀?"
大家又點估到其實呢度係賣鳳梨酥太陽餅等手信呢?!
因為選址在台中車站附近一棟名為「宮原眼科」的古蹟改建而成。
這棟早在日據時代已建的「宮原醫院」，變身成手信旗艦店﹗
仲有ice cream~
o係門口排晒隊買雪糕!! 何其壯觀
五花八門o既手信, 全部要先搵店員落order
憑單埋counter 比錢, 最後先去提貨部拎貨 (好有系統!!)
仲有好多唔同chocolates
揀好packing 之後可以包裝得靚靚先送比人
仲有個counter 有postcard 拎同埋蓋紀念印章
大人睇手信, 小朋友就o黎蓋章
買埋手信都係時候食飯
訂左呢間食藏燒肉居酒屋
睇comment 都ok
仲懶醒買埋抵折卷,
點知唔用得!!! 因為係七夕喎!! 特別日子!!
完全冇留意囉 ~ 七夕真係唔多為意
anyway, 冇得用抵折卷, 唯有返香港搞退款
叫左3個2人餐, 都夠我地9個人食
表弟仲食食下...開大....仲要係瀨果隻...
OMG! 阿姨即刻好唔得閒...
仲話成餐飯蒙上陰影
今次事件我地會講足10年, 羲羲你慘喇~
飯後都成10點幾, 我地去今晚住宿o既MOTEL CHECK IN
台中好出名住MOTEL, 我地上次o黎都有住過一間沐夏,
上網睇佢d 設備幾掂, 點知service 勁唔掂
都唔知係個online agent 唔掂定佢唔掂, 去到居然話搵唔到我地booking,
我地5月已經full paid晒!! 比埋單佢睇
輾轉成個鐘先比到房我地, 仲係比住一間先~
但呢間冇泳池, 我地訂左間泳池房打算比小朋友玩水咖~
又折騰多成個鐘先拎到泳池房
本身係打算比小朋友游下水, 而家都成12點都唔知游唔游好?!
問小朋友: 游!
如是者12點開始游到凌晨1點鐘!! 成班細路有得玩就得,
簡直係玩三項鐵人o既體力!!
是日靚衫: Monnalisa, Microbe, Miss Blumarine, Lelli Kelly
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
