(遲來的) 36個月成長紀錄

體重：30磅 (唔知係呢幾日潮濕個磅唔準定咩, 果日佢上磅真係有30磅?!) 呢半年內pick up左5磅!!! 

我唔知其他BB 咩進度, 但以小齊o既食量都可以 ?? 我唯有"歸功" 於佢飲左保兒加營素!

身高：89 cm (比半年前高左3cm, 但我知佢仲係"落後大市"!)

衣服尺碼: 90-110, 18M - 6Y 都有, 視乎牌子與質地

鞋碼: 23-25, 比半年前大左1碼多DD

飲食習慣方面: 

晨早morning milk 260ml (o係床上嘆奶用奶樽果隻), 我都知3歲應該要戒奶樽了, 最衰佢阿媽我懶, 因為用奶樽只要比個樽佢我就可以自己刷牙洗面, 呢樣佢戒唔到係我問題!! 

早餐+ 午餐: 跟阿公阿婆去街又食多次早餐, 據講都食到半碗飯仔/通心粉

TEA: 生果 (仍然係FRUIT LOVER~  仲會揀自己想食果D生果, 果日同我講"我唔食KIWI 果D咖, 因為真係好酸咖")

或奶 160ml

DINNER: 同我地一齊食晚飯, 不過我真係覺得佢食得好少好少! 有時食5啖以內就收工!!! 再叫佢食佢就扮嘔, 真係怕左佢

宵夜: 戒左好耐, 耐唔耐會叫話想飲一支, 可能因為dinner食太少了

零食: 有自我控制o既能力了, 佢咳到飛起果幾日真係自發戒足, 呢樣我覺得佢真係成長左!

食物方面佢似媽媽喎, 都幾鍾意食sushi, 食飯最多o既時候就係食sushi, 
三文魚同蝦係最愛!

認知能力方面: 

數字: A-Z 同 數字果D識讀音好耐,
但神奇地, 無端端無師自通左d 阿拉伯數字o既"寫法",
 我o既意思係佢知邊個打邊個(因為之前一向係有音冇字),
唔係真係識"寫"
我問左幾個主要照顧者都話冇教佢, 但有一日佢無啦啦讀出寫o係van仔櫈背o既廣告電話比我聽, 我之後再測試佢, 原來唔知佢o係邊"自學"左了

日文 :日文keep 住有返pg, 一星期一堂, 食下o野做下手工咁, 老師教咩我睇返佢d教材大概知, 但上堂o既實際情況就不得而知了。
都叫幾欣慰係佢有心機記下d vocab,

好好笑就係我玩candy crush 比佢見到, 佢指住粒cherry 話: "yeee,　さくらんぼ!”

上個月媽媽買左幾本　"しま次郎"　(中文有人叫巧虎) o既兒童書, 

小齊好喜歡呀, 因為又有d pop up同活頁咁, 小朋友覺得好有趣! (其實連我都覺得好有趣), 如是者佢睇日文書o既機會多左, 仲係咁一路睇書一路自己配音: 

”こんにちは”　”ありがとう” 咁

以下呢個係小齊上日文o既情形

英文方面我都keep 住讀書比佢聽, 佢偏愛ORT 系列, 睇晒stage 1-5 就開始睇其他series, 剛買呢set 叫first experiences

新買左一套peter rabbit o既圖書, 又要考媽媽o既耐性去讀比佢聽了

內容有d深, 所以小齊暫時未"愛上"佢

o係fishpond 買o既"無敵破壞王" 故事書, 小齊當然有興趣, 因為睇左戲啦嘛

仲有買左幾本pop-up 圖書, 太有趣了, 等我遲d 影左相再分享~

因為keep 住睇書佢d 英文vocab都build up得幾理想,
有時都可manage到我讀一句佢讀一句

開始同小齊用呢d 形狀積木玩, 一來strengthen 返佢已經識o既形狀, 

二來簡單地引進d數學概念比佢, 大家一齊數下數字呀, 玩下密鋪咁樣

戒片成功左9成啦, 係夜晚未100% 冇失誤同埋有時公公婆婆同佢出街唔敢"搏", 呢方面又係幾奇怪, 好似突然有頓悟咁開口同我地講要去toilet, 我都有信心佢一返學就可以自己調節唔再用片

著鞋除鞋呢一排佢自己試多左, 但好多時都係要協助o既。

小齊暫時幾"喜歡"做家務咁喎, 人地去倒垃圾佢又話要一齊, 洗碗佢又話要一齊, o係佢能力範圍內又安全o既情況下我地會比佢參與, 等佢知道做家務係點。

幾開心o既係佢可能從中學到整潔, 而家佢除左d鞋仔會自動自覺放好或者排好, 替換o既衫佢亦知道要放o係洗衣籃, 食唔晒o既食物就放雪櫃

語言能力方面:

小齊一向o係語言能力方面都唔錯, 我地都當佢大人咁同佢講o野, 講道理, 

至於佢聽唔聽就睇心情啦, 但佢一定已經明晒我地講咩仲三不五時有d搞笑回應

早排同小齊兩個人去睇"西遊", 哈哈, 個個都話我點解同個女睇d 咁o既戲,

咁重口味, 又怪獸又食細路女咁, 小齊都睇到有d驚,

中途仲問左我兩次"係咪做完咖喇?" 

不過佢都幾好o野, 冇話要走, 其實仲幾留心睇, 知道講咩

完場時我問佢: "齊齊你覺得好唔好睇呀?"

小齊: "好睇, 不過下次我睇返無敵破壞王果d得咖喇" 

呢排識得用簡單英文句子回應我o地了, 雖然有d 係錯grammar, 不過都唔心急糾正佢, 最緊要佢放膽肯講就ok了

普通話方面就有點停滯, 可能我地太少接觸, 只係得一~兩星期一次pg,
遲d再考慮是否需要再加強定由得佢

活動能力方面:

自己行多左好多, 有時我一日都唔駛抱一次, 雖然有時都仲係要扭抱同埋要坐BB車 (esp去旅行就一定唔少得)

跑步都叫"似樣"左, 雖然都係跑得唔快,

跳方面都起碼有"離地", 之前佢所謂"跳"係原地"UN"一下

返左ballet prep class 半年, 小齊暫時都仲有興趣返, 不過搞笑佢係有興趣去玩同唱歌, 老師話佢唔係好肯跳,

而家仲話七月要考試, 哈哈, 完全不敢想像到時會點