40個月的成長報告! (正式返學前的最後省覽)

體重：28磅 

身高：91cm, 呢幾個月好似高左, 上次度有91cm (不過著埋鞋)

衣服尺碼: 90-110, 18M - 6Y 都有, 視乎牌子與質地

鞋碼: 24-25, 大左半碼左右, 唉, o的舊鞋唔知點處置好?!

飲食習慣方面: 

晨早morning milk 260ml (o係床上嘆奶用奶樽果隻), 仍然係用奶樽,
我諗返學之前都唔會戒到了。
我認我有d情意結, 我鍾意見到佢拎奶樽飲o野個樣,
感覺好似BB, 我諗要直到佢戒奶果日先會戒到奶樽?
好彩佢飲其他o野都唔會用奶樽的~

早餐: 主要仍然係同公公婆婆飲茶,
不過都係飲多幾個星期咖咋, 之後要返早學冇得咁嘆咖喇~

零食: 仍然都係愛食糖, 好彩我買左本"蛀牙蟲家族大搬家"比佢睇,
佢有dd 引以為戒, 不過細路仔始終係細路仔,
想食糖時真係千軍萬馬都阻唔到佢, 唔比佢食佢又會喪喊好似我虐待佢咁...

認知能力方面: 

英文: 我keep 住同小齊一齊睇書, 佢o既識字量都穩步上揚, 雖然冇正式計有佢識幾多,
不過感覺到佢o既理解力有進步。書展時我買左套ROALD DAHL BOX SET, 呢套書我打算比佢大D先睇,
 但有一晚我忽發奇想, 試下讀比佢聽睇下有咩反應, 
初次試驗我揀左CHARLIE AND THE CHOCOLATE FACTORY (中文即朱古力掌門人),
我用LAPTOP KINDLE版, 開住LAPTOP個SCREEN比佢睇, 
完全唔用中文解釋咁讀完CHAPTER ONE 比佢聽, 到我讀完喇,

我就問: "你明唔明呀?"
小齊: "我明, 佢話聞到D味呀嘛"
我心諗(真係有聽到喎): "咩味呀?"
小齊: "朱古力味囉" 

真係聽得明噃!

雖然我知佢應該只係聽得明D片言隻字而估到個大概, 不過都比左D INDICATION我,
我自此之後讀英文書比佢聽時就減省左中文翻譯果PART, 咁我讀得都流暢好多。 

數字: 數數字, 數物件大致上冇問題, 0-9都認得, 開始引進加數概念,
不過睇得出小齊唔係咁喜歡, 所以基本上係冇乜進度, 也好, 樂得交比學校教了

中文:　中文同英文一樣, 我地都係通過閱讀o黎學習。
 中文字比較難認, 所以小齊係認一個個詞語比較理想,
統計返36-39個月呢4個月, 我地一個月睇5-9本中文書,
多數o係圖書館借, 一部份係我o係台灣同香港買,
但所有都係繪本類, 小齊非常喜歡, 繪本內容記得好清楚,
一見到封面就講得出書名同埋故事,。
有d中文繪本媽媽自己都好喜歡! 敗家媽媽雖然敗家, 不過都唔會買好多繪本,
 多數都o係圖書館借, 但好多名家作品我地呢邊圖書館冇,
媽媽二話不說$2.5 transfer 過o黎, 所以每星期總會駛10蚊8蚊o係transfer d 書度~

日文 :日文7月起轉左暑期班, 一星期兩堂, 模式大致一樣。
呢個月發現佢又有進步, 開始可以用完整句子作答o的簡單問句。
例如問姓名, 年齡, 或者係問呢個係咩o黎? 咩色? 幾多個?之類o既問題

因為進度唔錯而且小齊好開心, 仲o係度識到朋友仔(仲同我地一間幼稚園),
所以九月開學後都會keep 住返呢個日文班~

另外見小齊對shimajiro 咁喜愛, o係taobao 搵到一千零一set 日版巧虎bb set,
小齊大愛日日玩!

自理能力方面: 

戒片成功左9成啦, 但夜晚都會用片片以策萬全...
我而家都唔心急要佢咁快戒絕了, 學汪培珽話齋冇人一世都用尿片咖,
佢未戒晒都係時間問題, 比d時間佢, 一ready 就冇問題,
而家夾硬迫佢可能會影響佢自信心

刷牙唔錯呀, 而家可以自己刷了, 有時我完全唔幫佢手,
 佢自己都刷到(不過乾唔乾淨就...)
起碼自己的事自己做, 都係好o既開始!

著鞋除鞋呢一排佢自己試多左, 但好多時都係要協助o既。

語言能力方面:

我會用牙尖咀利o黎形容佢, 呢排更加有d 失控,

o係屋企時表現得好粗魯, 有d擔心...成日講痴線...我都知佢係學我地, 所以真係要小心講o野...
有時同佢傾計真係幾好笑, 呢輪成日講d 九唔搭八o野

去ballet exam 老師幫佢set個頭用好多gel, 返o黎洗左好耐,
我話: "d 頭髮好硬, 睇o黎你老師用左好多噴髮膠..."
小齊: "emmm...可能係發泡膠..." 
三號風球舅父去長洲食海鮮,
我地話: "唔知舅父坐船有冇問題?"
小齊話: "三號風球隻船可能會去左西班牙..."
咩發泡膠, 西班牙, 呢d詞語同概念都唔知o係邊度o黎?
 "西班牙"我諗係因為呢排阿公阿婆睇FINA 世錦賽直播佢聽得多所以隨口UP

英文呢輪聽多左audio books, 覺得小齊oral 都算可以啦,
grammar 同發音都要再執, 不過唔心急,
暫時都係聽下audio books, 上playgroup 先~

其實一向都有打算借助audio books o既幫助等小齊學英文, 咁又想做得有系統o的
睇左廖彩杏本書介紹, 我都開始左呢個"希望工程"--- 一年100本audio books o既計劃
(不過我唔係完全跟書單o既內容, 我自己因應小齊o既程度同喜好做左d 調整)

廖彩杏o既推介書單都唔易搵, 唔易搵o既原因係通常只搵到書, 搵唔到cd/audio,
圖書館o既children audio books 真係少得可憐,
媽媽都係要自己比錢去世界各地o既網站order,
初步都係想買cd version, 如冇就可能要用埋audible o既音頻了
所以屋企集成o既audio books 將會o黎自五湖四海, 大陸, 歐州, 韓國, 台灣, 香港都有...

呢個就係小齊呢個星期開始聽o既mother goose,
小齊聽左三次已經可以"念口黃" 咁覆述d內容,
而最重要o既係佢~肯~聽~
而且一開cd佢就自動自覺拎埋本書出o黎睇,
我陪左佢幾次之後佢可以自己一個聽, 太感人了!!
(我可以做自己o野, 雖然只有短短10分鐘)

活動能力方面:

自己行多左好多, 有時我一日都唔駛抱一次,
雖然有時都仲係要扭抱同埋要坐BB車 (esp去旅行就一定唔少得)

跑步多左, 不過馬步好似有d唔穩, 同埋唔知點解佢跑步跑到好似競步咁??!!

ballet o既興趣班已經上完一整個學年, 九月將會升班。
老師評語係佢上堂專心, 比上期有進步, 不過比較慢熱, 要多加誘導

2/8 果日去左考人生第一個ballet exam, 大概知道佢咩水平啦,
都肯跳不過跳唔足指定動作, 但比起開頭好左好多咖喇!
我完全冇比壓力佢, 佢考完出o黎我剩係問好唔好玩,
o係我心目中呢樣真係消閒活動, 同埋滿足下佢想著靚靚o既願望,
第時佢有冇興趣/能力跳上去由佢自己話事
暫時小齊都enjoy 星期日同成班小妹妹唱下跳下, 所以九月後都會keep 住返~

============================================

感謝 敗家媽媽 提供以上資料

敗家媽媽的網誌: http://buyjiamama.blogspot.hk/

============================================