小齊o既K1生活差唔多到尾聲 (想講: 真係快~)
9月K2開學就會變成返下晝班, (如是者K3又會變返上晝)
興趣班都因為時間變動而要重組再重組
媽媽亦因應小齊o既興趣同進度刪減左o的興趣班
o係芸芸虎媽夾縫中要獨我要刪減小齊o既興趣班真係自己都覺得自己"型", 哈哈
1. 首先cut左ballet class, 呢個係小齊返學之前已經比左一年學費o既班,
加上佢又送學費(送多左2個月), 所以好似返左好耐咁
但返到5月就會告一段落, 睇下之後小齊仲會唔會話想跳返啦,
暫時呢個項目放在"觀察"檔;
2. 日文班會keep 但轉上晝, 真好, 又同好友minako 一齊返,
小齊平時都早起身 (放假都8點幾真係比佢玩死我), 返9:45 對佢o黎講都應該冇問題~
今個學年第2次觀課o係5月中進行左
小齊又係玩得好投入
除左一向有教o既字卡之外
原來老師已經開始教佢地50音
觀完課都唔駛多講喇, 拿拿林, 乖乖地交埋出年o既學費支票啦~
日文我地7, 8月都會上暑期班(因為有學費coupon), 暫時係我地唯一報左o既暑期班,
應該都係唯一一個, 幾百蚊有十堂, 合乎經濟效益!
3. 普通話唱遊班: 呢個有少少hesitation 仲上唔上呢? 定係轉朗誦班?
暫時覺得小齊返呢個普通話班都幾開心, 已經係第3個module,
又係同kv同學仔一齊上, 所以佢堂堂都好期待~
但媽媽諗緊要唔要轉一轉個模式, 例如試試朗誦?
暫時都未有定案, 但肯定o既係暑假會停, 9月就再諗下先
4. 節奏樂隊: 呢個班都上左半年有多, 暫時見唔到咩成果,
仲諗緊應該繼續上定係停停佢等夠5歲就學琴呢?
問小齊好似都冇乜班佢話唔想上, 個個都話好鍾意,
問佢都冇乜結果, 等我再諗諗...
5. phonetics 班/ 考YLE
o黎緊 9月會自組親子 phonetics 班, (會上4個月左右)
對於小齊o黎講, 認讀單字已經有d 基礎,
欠缺o既係整句o既 intonation 同埋 linking, 即係整體 fluency o既掌握,
希望我同佢一齊上呢個班可以幫到佢講英文o既流暢性
phonics 教o既大部份都係單音節o既字 eg, cat, bat, fan...
呢d 字佢已經識讀, 如果要佢返phonics 學返 "C + A + T" 讀 CAT, 我會覺得係倒退,
其實不停都會聽到家長講 phonics o既好處...我都不為所動
"唔識果個字但聽到就識拚寫出o黎!!"係我聽過最多人講o既"好處"
打動唔到我o既原因係:
-- 拼完又點? 啱又點? 個字點解佢識唔識? 唔識點用返出o黎? (莫講話唔係次次拼啱)
-- homophones: (cereals, serials), (flour, flower), (hear, here), (sauce, source)......
仲有無數咁多homophones, without context 咁拼寫冇乜意思,
學英文係一音多字, 一字多音,
拼寫應該係建基o係足夠o既聆聽同閱讀量之上先會有用
-- 英語44個音素, 有d phonics 班讀幾年都未教完, 仲可能教唔晒, 我覺得係有o的呃錢,
進度太慢, 都唔知幾時先可以走上閱讀之路?!
講起聆聽同閱讀量呢, "希望工程" 我地7月尾就會係第一年o既總結,
暫時o既閱讀量係達標, 小齊仲細, 我努力同佢睇書先建立visual image 同埋listening,
到呢一刻我都覺得策略係正確, 成效都唔錯, 而家都係時間考慮幫佢執執oral
我地冇上坊間o既英文堂, 其實唔係好似大圍市況,
媽媽買左YLE starters o既past papers, 打算都係依照考GAPSK o既策略,
自己用幾個月時間同佢操練下past paper形式, 夠5歲就試下考,
listening, reading and writing, 仲有oral 三部份,
listening 我相信小齊ok,
reading and writing 就要等學校教埋佢寫小階先, 另外就係要串下字,
oral 我地都開始要練習多o的
仲有差唔多一年時間準備~
媽媽想做最了解佢進度o既人,
從而揀選啱佢程度o既guided reading books同埋教佢英文,
睇下媽媽自己教唔出去上YLE 班得唔得? 又有一股雄心壯志在燃燒~~
6. ??????
腦海充滿問號o既要唔要學游水???
另外, 畫畫小齊好有興趣, 跟人學好定係我o係屋企同佢自己玩下算???
什麼珠心算果o的要唔要了解下???
書法亦係媽媽好想小齊學o既一個項目, 但想等佢大個d 先...
幾多歲學琴好呢? 見佢手仔細細咁...好似都未係時候
呢個年代o既父母太多o野要諗, 資訊有d 混亂, 真係要好好過濾下搵個平衡點,
但綜合咁o黎睇, 興趣班o既o野就豐儉由人, 平有平玩, 貴有貴玩,
好似我以前同阿媽落街打下羽毛球, 放假同屋企人去泳池游水都係玩玩下就識,
唔駛咩錢, 亦唔駛一定要跟人學, 只要你比時間我就得~
唯有閱讀就真係應該盡早開始, 能夠享受閱讀就真係有無窮o既樂趣!
而且知識o既累積就會好似開左turbo 咁倍數增長.......
o黎緊暑假除左日文班summer course 其他興趣班都應該會停一停,
趁暑假檔期我地會玩盡佢, 仲要brush up下中文,
睇返多d 中文圖書, 8月尾仲要交返閱讀計劃o既小冊子,
到時又統計下今年睇左o的中/英圖書比重~
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
