返學返到第五日
今日送小齊返學o既"團隊"可謂人強馬壯
婆婆同爸爸都加入, 即係3個送1個
全程都係爸爸抱住咁滯
理應好開心, 點知反而係今日小齊入課室時喊左出o黎~
是咁的,
由於只以一位家長送入校園, 咁為左方便婆婆第時接放學,
媽媽就指左班房位置叫婆婆送
但呢個moment 小齊就開始喊喇~
話要媽媽
咁我就拖返佢入班房啦, 今日連玩具都唔想玩
呢個時候小齊就向我傾吐: "其實我真係唔係好鍾意返學咖咋"
"我想跟你走呀, 我唔捨得你地"
講到媽媽心都酸埋
唯有安撫下佢啦
經過尋日食茶點食到嘔之後, 佢變得好驚要食茶點
老師好好人, 都安撫佢話唔食就剩係飲d水啦
小齊一路用紙巾拭淚一路叫: 媽媽, 你走啦
但我起身想走時佢又垂淚
媽媽睇得出佢都係想堅強o的, 不過忍唔住眼淚
等到最後一刻, 媽媽要走喇
我叫小齊不如"僕"o係枱面冷靜一下
小齊都話好, byebye 喇
好彩小齊都唔係大喊果o的,
可能因為今日多人送佢, 佢以為我地唔同佢一齊去玩,
所以有d悲從中來覺得返學好慘
真係傻妹o黎, 我覺得呢個都係一個適應期,
好似之前返playgroup 同上ballet 班一樣
佢都係頭幾堂冇o野, 返返下就反而想喊,
希望你之後返學會越o黎越開心啦!
今日o既經驗似乎話比我聽都係我一個人送佢好d,
越多人陪佢佢越多"離愁別緒"~
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================