呢篇POST 又拖遲左先寫,
2月尾係家長日,
媽媽返學校拎左小齊人生中第一張學校成績表,
真係有o的感動, 話咁快就一個學期了!
老師評語話小齊各樣都OK (放心晒!)
但試過上堂唔專心玩手指 (呢樣佢自己一早同我備左案, 所以我問老師係咪經常咁樣, 好在老師話唔係)
BEING CHEERFUL 方面做得最好, 其他都係AVERAGE,
我覺得KV要求都幾高, 有o的估唔到幼稚園o既評估比分都會咁"手緊"
小齊成績都幾好, 做PAPER o既部份全部100分拎A,
術科方面就中中挺挺啦, 多數係B,
打拍子唔係咁得, 老師叫我o係屋企可多o的教下佢 (errr......我盡力啦)
今個學期有小齊有清潔獎, 據了解K1 o既獎只有清潔獎同出席獎,
出席獎要 attendance 100% , 連病假都冇請過先有, 我地請過假就拎唔到喇
清潔獎就會睇小朋友上堂, 食茶點, 去toilet o既清潔,
有冇拎手巾仔, 頭髮整唔整理呢o的...
朝早有時間的話都會幫小齊紥靚個頭o既,
而家媽媽更加練成左"地鐵紥辮神功" -- 多數o係車上先紥
上學期功課唔多, 一星期一樣所以應付OK,
下學期變左每日一樣,
所以媽媽叫左小齊最好下晝o係婆婆屋企做左先,
唔係夜晚先做就會搞到好夜啦。
經過幾星期練習寫字都有進步
比起功課進度, 現階段我更注重佢做功課o既態度,
同埋寫字執筆o既姿勢,
為左幫佢練習手指小肌肉玩多左泥膠。
功課情況暫時都可以, 有時我未返屋企佢已經做好(做得都可以),
係有時下晝出左街或者上日文班先將功課推到晚上做,
可幸佢做功課o既時間都唔太耐。
只要態度認真, 就算寫得唔靚我都唔會話佢,
我只會問佢你覺得呢個寫成點?
佢對自己滿意的話就ok。
小齊對自己都有o的要求, 佢成日都要擦過o的字重寫,
我都搞唔清佢係真係覺得唔靚想重寫定係佢想"擦o野" (唔知點解好鍾意用擦膠?!)
學校開過3次生日會, 小齊其中兩次有去,
有一次請左假冇參加, 兩次都拎左大量禮物零食返o黎,
開心到不得了! 相信小齊都好期待學校開生日會
下次就會到小齊o既生日月
之前o係學校拎返o黎鳳仙, errr...經過左幾個月, 都仲係得葉...
不過o的葉都叫多左o既, 唔知有冇機會開花呢?
有幾位同學果盤都開左花了!
暫時學校唔係太多手工要做,
但有個專題研習就要家長同小朋友一齊做,
3月頭我地交左第一份 -- 衣服真有用
小齊同媽媽一齊揀相, 小齊又幫手貼相,
搞左2個鐘卒之完工,
整完呢個仲有兩期研習要交~
其他仲有咩賀年吊飾, 春天吊飾, 整毛毛蟲, 拎石仔返學校果o的,
都係非正式要求但小齊話要比老師睇,
咁我都幫佢手搞搞佢啦
好彩敗家媽媽除左敗衫之外其實都敗唔少 papercraft 用品
呢個時候都幫到手阿女交勞作o既
唔理三七廿一, 整個圓筒貼晒o的花上去
慳水慳力o既春天吊飾 -- 完成!
都有o的春天FEEL呀, 遠睇都可以,
近睇就會見到好多膠紙, 我地連膠水都嫌難乾
HURHUR 聲用膠紙貼就算
雖然呢o的小手工唔係硬性規定要交,
但如果有交老師又會比o的鼓勵
期間小齊得到好多貼紙呀, 仲有呢d 簿仔咁樣,
所以小齊都主動左報告老師講o既野
新年用bigshot 機整左賀年卡比老師
茶點方面媽媽儘量日日新款啦,
小齊呢個學期重左, 但冇乜高到喎, 點解呢?!
總括呢一個學期小齊適應得好好, 學校學術方面程度唔太深, 功課亦唔多,
小齊跟進方面冇問題, 特別係中文方面更加係極滿意!
學校每兩星期會派3本圖書比小朋友睇,
當然兩星期3本唔算多, 我地自己會睇其他圖書,
呢個時候功課不忙我地盡量多閱讀~
學校培養小朋友常識同自理等生活習慣係冇得頂,
學校都當佢地大個仔大個女, 要求佢自己做自己o既事,
主動同家長報告, 我覺得小齊呢方面都做得幾好,
我地每日都會溝通下學校發生o的咩,
事無大小都會傾下, 佢心情靚時會講多o的,
有時冇mood又唔會講太多, 都係睇心情,
但起碼我都從佢口中知多左上堂o既情況
知道佢上堂都有留心, 咁媽媽已經好滿意了
最近睇緊汪培珽本新書, 自己都不斷調整心態,
只要小齊學習態度認真, 對學習同閱讀有熱情,
成績如何我唔應該太在乎了, 始終讀得幾多, 都係靠佢自己, 我擔心都係冇用
唔好比佢覺得我緊張佢o的功課多過佢自己, 讀唔讀到書真係個人問題,
唔想做o係學業上過份緊張o既媽媽,
媽媽在努力中 -- 努力壓抑會形成壓力o既過度關心, 得一個女, 我真係要努力control下自己~
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
