識我o既朋友, 可能會奇怪, 點解你個女都差唔多兩歲你先開始寫blog 講湊女呢 ?!
其實寫就不嬲都想寫, 但我諗我寫開奶換片你唔會好大興趣下嘛, 當然如果你真係好有興趣, 我都唔介意討論o既, 始終我都做左人阿媽成兩年, 咩奶粉尿片bb食品用品, 有d咩我未用過呀, haha, 好多買到有晒vip, 連卡佛vip 可能冇, 但日本奶粉vip就有喇, 問你死未?!
係, 講返寫blog, 其實最最最重要o既原因係, 我邊有咁多時間??!!!又要返工又要湊b, 又要買野(哈哈!), 真係有血有淚~~
而家阿女差唔多兩歲, 我叫做有返d 時間, 嗚嗚...可以整理下我個湊女之路, 湊女心得(if any) o係度分享下。
仲有人老左喇, 冇記性, 寫blog都係一個好處, 等我可以記低發生過o既事。
到左我呢個年紀, 身邊有好多朋友都開始同我一樣, 繁殖左/ 緊後代, 就著呢個問題, 我想發表一下我o既個人感受。
話說肥齊尚未面世之時, 我個妹肥肥慧已經生左個bb, 係仔仔黎o既, 我地叫佢"棋棋", (我個女而家叫佢"棋棋bee波(表哥o既諧音)"。 當年o既棋棋bee波未夠一歲, 但個人話頭醒尾, 鬼鬼馬馬, 真係成日都比佢笑死, 所以當年我就諗, 如果我都生返件好似棋棋咁都幾開心喎。 就係咁, 打算二人世界一下o既我地兩公婆開始著手安排"生b"呢個議題。一切事情都進行得非常順利, 冇乜重點果part 我skip左佢喇, 時間一轉就去到照結構, 而照結構可以話係一大突破, 因為o係呢一日, 我地就會知道bb 究竟係男定係女??!!! (當然而家講返就毫無驚喜之處啦, 但當年無可否認係有d 忐忑咖, 我話晒第一次做人阿媽)
忐忑o既原因係仔同女都各有好處, 當年諗左好多pros & cons (大佬呀, 你估辯論咩?! 係, 我得承認, 大肚婆係比較多野諗)
仔: 就著中國人傳宗接代o既思想, 一索得男就ko左成件事, 好似棋棋咁都幾好呀
但o係呢個年代 "生仔冇本心", 你去醫院探下病就知, 有幾多個"仔"會探阿媽, 就算探都係兩梳蕉咁黎, 你想飲啖湯食舊橙?!真係食懵你!
以前就話娶新抱多個女, 而家唔同咖啦, hk 女權當道, 第時佢結左婚可能聽晒老婆話, 咁就冇左個仔!!
女: 就係以上仔o既粗心大意o既相反啦, 女仔又會細心d, 又多數會照顧屋企啦 媽媽又可以滿足下幫阿女扮靚o既欲望啦, 生個女好似徐x淇咁仲帶挈埋阿媽, 呵呵呵~ 我知, 我係諗多左~~ 但係而家hk 女多男少啦, 第時搵老公會唔會好難呢 ?! 仲有生女又驚佢比人呃啦, 唉呀, 真係諗多左!!
到最後結果就當然係女啦, 感謝而家科學咁昌明, bb好似一粒豆咁大都睇得出男定女, 好野好野, 醫生仲話"嗱, 都幾清楚咖喇, 係千金", 但我睇黎睇去都係一pat 野咁。
真係好難想像以前d人要到生果刻先知, 咁點買野比佢, 買咩color好 ? 人地送野又冇預算, 而家就唔同啦, 一照便知龍與鳳!
講左咁耐, 其實想講, 生仔生女都唔緊要, 我而家其實好感恩生左o既係女女, 比我好多歡樂, 包括買衫比佢時你就會覺得更加歡樂, 有經驗o既朋友就會知道, o係一間童裝店裡面, 男仔同女仔衫o既比例可以係2:8之比, 有d仲係1:9 , 而且男仔衫方面, 真係唔怕得罪講句, 係千篇一律, 最多黑/灰/藍....emmm...真係唔多開胃, 好dry下。肥齊其實係一個幾嗲o既b女, 佢成日都會擺kawaii pose, 雙手托晒腮咁, 又會成日話"攬住媽媽" 呢方面亦令我覺得生女係sweet d, 始終你生個仔如果佢成日痴住你, 你都驚佢會比人話係裙腳仔啦, 一早叫佢獨立呀, 唔係第時點養家呀?! 嘩, 你睇, 幾大責任。
奉勸所有已生/ 會生/ 想生o既朋友, 唔好事先有偏見想要某一種性別o既bb, 或者純粹想求某一種性別又去"追"多件, 咁樣唔係咁好啦, 好大壓力咖, 自己骨肉, 仔女又有乜所謂呢, 考慮o既應該係自己o既"負擔能力"-- 包括有冇財力養佢, 心力教佢, 精力陪佢, 體力湊佢, 呢個年代, 真係缺一不可咖。
~~ 棋棋bee 波, 一歲時攝
嘩, 肥齊呀~
阿媽一睇: "嘩, 咁似車淑梅o既"
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
