肥齊26個月喇~

由敗家媽媽於 2012-06-09 00:00:00 發表 | 累積瀏覽 432

分類：

今日係9號, 肥齊今日足2歲2個月喇, 連佢自己都話自己"大個女"~

(攝於2012年6月9日)

媽媽發現原來好多媽媽都會寫"成長報告", 紀錄低BB o既進步...

我都試下寫低先:-

體重：23.5 至 25 磅 (食飽同未食飽, 日頭同夜晚會有d唔同)

身高：8x cm (應該都算係矮矮地, 記得之前成日比人問夠2歲未)

飲食習慣方面:

晨早morning milk 260ml (o係床上嘆奶果隻)

早餐 (多數跟阿公阿婆去街又食多次早餐)

午餐都係食大人o野, 阿公阿婆食咩佢食咩, 有時佢12點訓左就會等佢起身先去食tea

阿公日日都會切好幾樣生果比佢食, 最常見o既配搭係蘋果/橙/雪梨 (阿公o既愛心生果切成一粒粒, 肥齊一路睇電視一路食)

每日都會食"零食" --- 珍寶珠, m&m, 餅... (總之一見到就話要, oh~)

夜晚等埋爸媽媽放工返o黎大家一齊食晚飯, 又係食大人o野

宵夜奶奶140ml (有時)
其實而家o既齊齊已經可以完全融入我地o既生活"飯餐", 我地都好耐冇為佢預備"粥飯餐", 因為佢都唔係好喜歡,

而因為佢咁"平易近人", 媽媽都可以成日同佢出街食飯, 同朋友gathering都可以預埋佢~

我知有d 媽媽會餵左小朋友先自己食, 但我地就主張同佢一齊食, 大家平起平坐果隻, 佢係唔識夾餸啫, 但食飯果d我地都放手由佢自己,

有d佢要幫助o既我地會幫佢, 但儘量都當佢係大人唔會再主動餵飯,

媽媽睇左本育兒書叫 <<好媽媽勝過好老師>>, 當中都講得好啱,

人要食o野係生存o既本能, 點解要"追"住個小朋友, 係咁"ngai" 佢食飯呢? 又或者同佢困獸鬥食個幾兩個鐘, 又唔見5, 6年代o既小朋友要咁樣?

人肚餓自然要食, 佢唔食或者拎d食物黎玩係因為 --- 佢唔肚餓

有d 媽媽就算小朋友話飽, 都會 "食咁少點會飽呢?" / "乖, 食埋呢(啖/碗/碟)比XX 你" / 你唔食我就XXXX (罸) 你

我地而家食飯就係, 大家一齊食, 食完就問佢, 你夠未? (佢通常食唔晒我地比佢O既份量) 之後我地就會話, 你唔食o既話我/爸爸/公公就食埋咖喇!

有時都會擔心, 佢夠唔夠飽呢 ? 好似食得幾啖咋喎 ?! 但之後發現係ok o既, 個個小朋友都有自己o既成長節奏, 只要佢體重冇大跌其實就ok~

肥齊o既成長節奏就係, 正餐食 4-5 啖, 阿婆比左個花名佢"4啖公主", 又話佢係戴安娜皇妃, 食正餐食4啖就收工, 哈哈~

認知能力方面:

ABC SONG 識唱, 但A-Z 分開左就唔係個個認得, 有D佢會比較有印象
A, B, C -- 成日見, 認到;
L -- 因為大廈部LIFT 有, 認到
M -- 因為MCDONALD, 認到
P -- 因為百佳, 泊車, 同埋見到有D車有"P"牌, 認到

我唔係好主力教佢認A-Z, 第一, 佢已經識讀晒, 發音都叫OK (除左F, S, Z 唔係好清); 第二, 返學都會學咖啦; 第三, A-Z 對佢黎講冇意思, 係符號, 反而會教佢APPLE = 蘋果

動物: BABY CAN READ 有教果D都認得, 最叻o既係冇圖認字都ok

1-10 -- 識 (廣東話, 英文, 日文都識, 普通話就識1-3)
日文五十音 : 最叻 "あいうえお”, 因為PG有教50音歌仔, 有時佢唱左出黎阿公都唔知佢講咩, 好彩有我o係度我就知佢唱緊日文

顏色: 大部份都OK, 無論見字 "PINK" 或見粉紅色都識

形狀: 識TRIANGLE, SQUARE, CIRCLE, (PENTAGON 同 HEXAGON 有時會撈亂), 但聽到HEXAGON會識講BEE HIVE
認人: 財經資訊台d 股評人, 認得9成, 咩藺大師, 連敬涵, 郭思治識晒, 最奇係連畫象都認到, 李兆富寫左本書<<家長起義>> 封面係佢個樣o既Q版畫, 肥齊見到問我: 呢個係咪李兆富黎咖? (好o野!!)

娛樂台: (1) 最LIKE 劉德華, 佢第一次見劉德華(金像獎頒獎)就問我:"呢個邊個黎咖, 咁靚仔O既?"

之後無論劉德華咩造型 (O係電影台睇到) eg. 決戰紫禁之巔, 刀劍笑, 法內情....都認到, 仲會話:"我好鐘意劉德華哥哥" (阿女, 劉德華個女仲細過你咖!)

(2) 汪東城: 佢陪我煲劇見到又問我邊個黎, 自此之後就話鐘意"大東哥哥", 仲識唱兩句 "假裝我們沒愛過"~

新聞台D 常客認到溫家寶, 胡錦濤, 奧巴馬, 梁振英, 唐英年, 仲有唐英年老婆 ... ETCETC....

肥齊會話: 我好似唐英年個老婆呀~

唱歌 : 肥齊最常唱o既歌頭5位 - (1) ABC SONG, (2) TWINKLE TWINKLE LITTLE STAR, (3) 國歌, (4) 媽媽I LOVE YOU, (5) 青蛙媽媽 (國語版)

國旗: 認得中國同日本

自理能力方面:
仲未戒片, 著緊L碼, 但開大就一定會講, 仲會叫我幫佢整個POTTY, 小便就唔會講, 就算講都係痾緊先講, 仲要奸笑 (激死)

識除襪, 唔識著, 開始教佢著拖鞋, ( 之前o係seibu 未執前買落o既拖鞋卒之可以拎出黎著喇)

除完襪會自己擺返好o係鞋仔, 鞋仔會擺返好o係鞋架

有時佢會幫我摺衫 (當然係求其摺埋一pat咁, 不過我都欣賞佢嘗試幫手做o野)

刷牙要協助, 而且成日食晒d牙膏, 仲話"好涼呀"

沖涼已用花灑, 洗頭唔再喊, 而且會自己"捽"下個身同埋肚腩仔

沖完涼識得拎 mustela 搽面同搽身

識得”分享” -- 但只限於同大人, 同棋棋表哥就會大家爭o野

語言能力方面:

媽媽覺得非常好, 基本上已經係對答如流, 日日都會同返緊工o既媽媽傾電話

夜晚媽媽返到屋企肥齊會講返當日做過o既o野比我聽, 而且9成係真!

但唔係好識分 "你", "我", 成日講錯~

上pg 老師教o既字會"覆述"到, 但之後就未必記得喇, 最叻o既日文係 "食べる” （食)~

活動能力方面:

自己行多左, 但唔係好想自己行, 18個月先識行o既肥齊到而家都未識跑同跳, 最多都係急步行 (呢樣都幾好, 起碼唔駛看得佢咁緊)

行樓梯佢一定會拖住大人, 十分保險

佢o係安全意識都幾好, 去到停車場佢會叫我地抱, 仲話: "費事有車危險"

同阿公阿婆出街多數都會拎bb車, 同媽媽出街就多數唔拎

嘗試自己"手禁"lift

喜歡做"環保份子" 收集可回收物資放落樓下回收箱

============================================

感謝敗家媽媽提供以上資料

敗家媽媽的網誌: http://buyjiamama.blogspot.hk/

============================================

鐘意SeeWide的分享，給我們一個Like吧！