我喺錦田長大,大家可能唔知錦田喺邊,但一講吉慶圍,相信大家都聽過.
![]( "tbnail")
![]( "thumbail")
錦田係一笪好細嘅地方，我細個時部份鄉村連電力供應都無，落後嘅情況可想而知！但你哋勢估唔到咁落後嘅地方，居然係新界嘅紅燈區！
![]( "thunail")
成條大街 都係得嗰300米，但酒吧就有6至7間，我依稀記得其中幾間酒吧嘅名稱，喺伯裘書院大門前右手邊嘅係英華酒吧，再過少少有間叫月光；左手係月宮，斜對面錦田戲院地舖叫翠河，重有幾間添！不過就諗極都諗 唔起！酒吧門口掛咗好多五顏六色嘅燈泡，日頭唔會開門營業，但到咗夜晚6點鐘左右就會著晒燈。我嗰陣時好細個，以為酒吧即係餐廳，不過有埋酒飲嘅啫！我每次經過啲酒吧門口，都俾嗰啲五顏六色嘅燈泡所吸引，駐足觀看，我覺得啲一閃一閃嘅燈泡俾人有一種溫馨嘅感覺，好似聖誕節佈置嘅燈飾一樣！我會戇居居咁企喺門口望住啲燈泡發呆。
每間酒吧門口都坐咗1，2個化咗濃裝嘅女仔，嗰陣時去幫襯嘅大部份係嚟自石崗軍營嘅鬼佬英兵，嗰班鬼佬飲大咗兩杯就會嚇啲細路仔，所以我好驚同埋好憎呢班鬼佬。
我讀小學時有個同學花名叫阿細，你唔好以為佢真係好細粒，查實佢7歲左右
![]( "DSC01629")
已經喺錦田一間武館學功夫，細細個已經有幾舊腹肌。
佢唔係虛有其表，我哋班同學，就算高大過佢，都唔夠佢打。佢讀書就麻麻，但寫字同畫公仔就好有睇頭。佢好有義氣，周不時同我哋講，如果有牛屎飛恰我哋，出句聲佢就會幫我哋出頭，所以佢係我哋班同學嘅偶像。
佢同我哋一樣，好憎啲鬼佬英兵，主要原因係佢哋飲大兩杯之後，除咗捉啲靚仔玩之外，重通街疴尿同埋打架。
嗰陣時錦田有間戲院，平日生意無咁好，所以間唔中推出特惠優待，買一張飛可以睇兩齣戲，即係由7點睇 到11點。講時講呀，嗰陣時興偷片，乜野叫偷片呢？即係將部份片段以快鏡播映，原先要播10分鐘嘅，依家播1分鐘就搞掂，咁班友咪可以早啲收工囉！啲觀眾睇睇吓突然變快鏡，根本唔知噏乜？大家習慣咗，知道個放映員偷片，咁咪一齊噓佢囉！我哋差唔多晚晚都走去睇戲，睇完戲之後，大約晚上11點左右，阿細就同我哋幾個同學
![]( "DSC01634")
![]( "DSC01633")
![]( "DSC01630")
![]( "DSC01631")
爬上錦田街市頂。
![]( "DSC01626")
![]( "DSC01627")
搞邊科呢？咪執啲石仔擲啲醉西鬼佬囉。咦？幾剌激喎！我哋幾條靚仔，每人住十幾粒石仔就爬上街市頂，見到啲醉酒鬼佬，就用石仔擲佢哋。
啲鬼佬梗係勞氣喇，但佢哋肥屍大隻，唔係咁容易爬上屋頂捉我哋。到佢真係爬到上嚟嘅時候，我哋就會喺另一邊鬆人，真係幾好玩架！不過如果俾啲鬼佬捉到，唔死都一身潺。但係我哋嗰陣時身手靈活，點會咁易俾佢哋捉到呀！如是者一星期我哋有一兩次搵啲鬼佬嚟玩吓,點知啲鬼佬走咗去報警，但我哋一啲都唔知道，重玩得唔知幾開心添！
有一晚正想鼠出去睇戲，點知俾老豆睇到唔準去。嗰晚唯有乖乖咁留番喺屋企。
第日見到班FRIEND，問吓佢哋禽晚玩得過唔過癮！點知班FRIEND話我一世夠運。禽晚差佬進行反罪惡運動，約莫7點鐘左右，有兩架豬籠車停咗喺大馬路 ，跟住有成幾十個藍帽子警員落車，見到靚仔就捉，結果捉咗幾十人，帶
晒返八鄉警署。![]( "thumbnailCAL4MO1J")
佢哋心諗都無犯事,所以咪大模斯樣行去睇戲囉。點知班差佬有殺錯無放過，結果無一倖免，全部捉晒返警署。班差佬同佢哋每人開咗個快佬，跟住揸住一張卡紙，寫住《本區飛仔》，然後拍照。負責嗰個幫辦話啲快佬主要係向上頭交差，6個月之後會自動銷毀。係真唔係呢？真係無人知！
嗰個年代真係做乜都得，連審都唔駛審，就拉晒你班靚仔返警署，同埋要你哋揸住個牌嚟影相添！比著依家就大件事囉！既妨礙司法公正又衰濫用權力，個幫辦肯定俾人插到暈！以後想升級？睇怕都幾難喇！但嗰個時代都重未成立
ICAC，啲雜差俗稱有牌爛仔，包娼疪賭樣樣齊！我有個小學學兄，佢畢業之後，做咗幾年工廠，之後去咗做差佬。佢平時都鐘意同班陀地有講有笑，不過勢估唔到佢有社團背景。有次佢扯行馬同另一個社團講數嘅時候，由於對方人多勢眾，佢見勢色唔對，拎咗支槍出嚟示威,
結果俾人報寸,最後炒咗！所以嗰陣時差佬嘅質素，大家心中有數。
自此以後，我哋都唔敢夜媽媽四圍盪，更加唔敢攪啲鬼佬，費事一吓唔覺意，俾差佬咗上差館，無端端留咗個案底，咁就邊處都唔駛去喇！
============================================
感謝 過氣年青人 提供以上資料
過氣年青人的網誌: http://philipchutingkai.blogspot.hk/
============================================
