我唔係導人迷信，但人嘅一生，真係冥冥之中自有主宰，所謂生死有命。如果上天要你走嘅話，你根本就冇得選擇留底。喂！我有大把錢，啲錢都未駛完，唔係好捨得走喎，可唔可以俾多啲時間我，遲啲走得唔得？唔好意思，答案係唔可以。
我相信好多人喺一生之中，遇到過唔少意外，好運嘅，就
大步過；唔好運嘅，佢哋人生就 係咁先，提早玩完。如果重有未完成嘅宏願或理想，唔該留番下一世喇。所以有陣時見到啲車禍，成架車撞到散晒，
![]( "th")
心諗個司機唔死都重傷，點知啱啱相反，個司機竟然一啲事都無；倒番轉頭，一啲唔起眼嘅意外，往往造成嚴重嘅傷亡。人生係好奇妙嘅，由於某啲嘅延誤，可能救咗你一命，又或者奪去你嘅寳貴嘅生命。你話係咪好玄妙呢？
原先我都唔係好信命運嘅人，但發生喺我身上嘅事，諗番轉頭，你話唔相信人嘅一生，食幾多，著幾多，係整定嘅話，就真係自己呃自己。
時間過得好快，貶吓眼我已經轉換咗幾個工作地點。呢次我喺係邊境某個衙門上班，平時我都有揸車番工。我好記得嗰日，架車拎咗去整，收工後惟有搭巴士由上水番屋企。嗰陣時啲車係冇冷氣設備嘅，即係依家俗稱嘅熱狗巴士。當時係七月中，又焗又熱，嗰日重落埋雨添。上到架車度，大部份嘅窗都冇關妥，啲坐位差不多全部都濕晒。車裡面得小貓三兩隻。
![]( "6")
我搵到飛起，都搵唔到有個位喺唔濕嘅。好彩行到最後嗰排位,發現車尾後排最右手面嘅坐位係乾嘅。嗰陣時巴士嘅座位係用玻璃纖維制造。後面啲位冇分隔開,有時啲阿巫似熟賣熟，一聲唔該就夾硬塞埋嚟坐，結果6個人嘅位7個人坐。你話點頂。所以我唔鍾意坐後排，加上啲車如果開得快，你會喺個位度跣嚟跣去，如果坐滿人嘅話，一齊跣向你嘅方向，分分鐘因為搭車而被人廹死，你話咁樣死咗係咪眼都唔閉吖 ？
![]( "3")
不過當時冇乜選擇，唔通唔坐咩？架車開咗冇幾耐，前面坐喺打横位嘅婆婆好似唔係好妥，猛咁捽葯油，
![]( "2")
我最怕聞啲葯油味。本嚟冇乜唔妥，但聞多幾吓真係有啲反胃，但係無乜辦法，惟有死忍。過咗大約十分鐘，架車啱啱經過古洞，婆婆突然拎個膠袋出嚟，跟住向住個膠袋猛咁嘔，
![]( "1")
啲酸宿味同埋啲葯油味，彌漫著整個車廂，加埋夏天超過三十度嘅濕熱天氣，我個陣時嘅感受，簡直唔識形容，總之就隨時嘔埋一份。當時惟一可以做嘅就係儘量閉氣，同埋用隻手揞住個鼻，個腦就儘量諗其他嘅野，分散注意力，當冇事發生。做人就咁架喇，頂得一時得一時．
時間過得鬼死咁慢。啲酸宿味愈嚟愈濃。再過十分鐘，架車就快接近新田個陣時，開始出事喇。突然之間， 我見到黃色嘅液體，夾雜住隔夜嘅食物渣滓，有啲好似飯同埋腐肉嘅物體，從阿婆個口噴射出嚟,一地都係，阿婆個身都黏咗唔少。嗰啲嘔吐物，臭氣薰天,喺車廂內徘徊不散。我依家諗起，都有少少反胃感覺,你可以想像我當時嘅感受。
就喺嗰個時侯，我覺得有啲野喺個胃度湧出嚟，我再唔走就真係頂唔順會嘔架喇！話知你前面啲位濕定乾，總之離開阿婆愈遠愈好。去到近車頭位置，求其搵個位坐低算啦。啱啱坐低咗約莫三分鐘，架車去到逢吉鄉。
![]( "5")
話時話，呢條鄉個名安得非常差，何解呢？因為逢係《吉利嘅野》都《香》，你話係咪大吉利是呀！
就喺嗰個時候有人落車，司機正想埋站，點知見到有條貨櫃車拖架擺正係個車站嗰度。
![]( "7")
司機冇乜辦法，惟有將架車儘量泊入個站，但車尾部份始終突出咗少少出嚟，咁就出事啦。架車啱啱停低，突然澎一聲，成架車向前衝咗一吓,乜樹干? 原來有架貨櫃車殺唔切制，直砍入巴士嘅右邊車尾位嘅位置。啲撞擊力將我成個人拋咗落地，撻到我攤攤腰。
![]( "1")
跟住好多野從天而降，原來係車窗啲玻璃，喺猛烈撞擊下，變成碎粒。啲玻璃碎好似啲雨咁飛過嚟，我成個頭嘅頭髮都滲滿玻璃碎，最慘連個身同埋褲管裡面都有碎片，整到我成身損晒。
驚暈甫定，望吓車尾，發覺右邊位置已經被撞毀，整條由玻璃纖維做嘅座位部份變成碎片。而原先我坐開嘅位置,被撞到凹晒!如果我仍舊坐响嗰個位置,我嘅人生已經可以劃上句號!如果阿婆唔嘔，我唔會離開個座位,如果我唔離開個座位,又有無架貨櫃車隊埋嚟呢? 老老實實,我唔識點樣答你!
之前個心猛咁怨阿婆，點知原來阿婆係我嘅救星。
![]( "2")
唔通呢啲就係叫塞翁失馬，焉知非福? 撞完車之後，因為無乜傷，所以我無等救傷車嚟就撘咗小巴走咗。至於阿婆傷成點？我冇留意噃！吓？你問我究竟有冇個阿婆係架車度？係喎，事後真係無乜印象喎！
完
============================================
感謝 過氣年青人 提供以上資料
過氣年青人的網誌: http://philipchutingkai.blogspot.hk/
============================================
