搭巴士

由過氣年青人於 2013-12-27 00:00:00 發表 | 累積瀏覽 574

分類：

喺我嗰個年代一提起搭巴士就眉頭皺，嗰陣時嘅巴士無冷氣設備不在講，班次又少。喺繁忙時間，如果能夠廹到上車，尤其係喺中途站，你嗰晚返屋企睇怕都要劏雞還神，雖然誇張少少，但你可以想像一下搭車嗰種辛苦法。
我讀書嗰間中學係喺上水區，所以我讀中學嘅時候開始要搭巴士返學。嗰陣時有架巴士由元朗開出，經過錦田，蕉徑，粉嶺高爾夫球場，然後到上水終點站，呢段路啲風景幾靚架!

嗰架巴士冧巴係18號。我每日都要搭呢架巴士去上水，然後轉搭另一架巴士冧巴17號，先至可以返到學校。

嗰陣時雙層巴士都重未面世,所有行駛嘅都係單層巴士。

以前搭車要俾CASH,

唔似得依家用八達通咁方便。

跟住會有張車飛俾番你,

千祈唔好揼咗佢 ,因為會有人查飛。

我好鐘意收集啲靚冧把嘅車飛，尤其係每一叠嘅第一張，因為由零開始。

有時為咗要張心頭好，不惜買多一張甚至幾張。

學生搭車有津貼，只須俾一半價錢，但係要隨身帶住個半價証。就算你著住校服，有啲賣飛佬（即巴士售票員）都要你攞出個學生半價証俾佢睇睇，所謂認証唔認人。如果唔記得帶，唔好意思，要俾全費。不過大部份買飛佬見你著住校服，都費鬼事問你攞証睇。

早期行駛嘅巴士，

有司機負責揸車，售票員負責賣飛，佢哋孭住個布袋，拎住個打窿機，嗰陣時搭車有分段收費，咁點樣識別你落車嘅地區呢？原來車票上面有兩行數目字。一行順序由1-12,另一行由12-1。例如由元朗到上水,你落車嘅次序由1 開始;相反,如果由上水開返元朗,你落車嘅次序則由12 開始,如此類推。

當你買咗飛嘅時候，買飛佬會喺你張飛上面嘅數目字打個窿,表示你將會落車嘅地方。車飛背後寫得好清楚,不得轉交別人。

好喇，我噏早幾個站落車咁咪慳番幾粒神<幾毫子嘅俗稱>!所謂你有張良計，我有過牆梯。九巴除咗有司機，售票員之外，重有稽查員，啲稽查嘅製服好有型，白色短袖裇衫同埋白色短褲，長祙黑皮鞋，成個衞生幫咁嘅LOOK 。佢哋負責查吓啲乘客有無買飛；學生有冇帶半價証，重有就係有冇乘客搭全程俾分段錢等等。

佢哋通常會喺中途站上車作特擊檢查，如果捉到嘅話要罰錢，至於罰幾多就太耐唔記得咗囉！由於啲稽查嘅制服好易認，試過有一次唔記得帶半價証，咁啱見到有稽查上車查証，無計，唯有趁佢重未查到之前落車。嗰次都幾慘，落早咗成4個站，足足行咗超過30分鐘先至返到屋企。

嗰陣時啲巴士無冷氣設備，有前門同埋後門，車門設計好獨特，主要靠幾枝鐵通嚟欄住。你睇吓下面兩張照片,就會明白以前車門點樣設計架喇!

當啲乘客上晒車嘅時候，賣飛佬會企喺尾門,用手將鐵通門向後拉埋，咁前門跟住會自動關上;到埋站落車嘅時候,佢將鐵通門向前推,前面鐵通門又會跟住開番,呢啲用槓杆原理設計嘅開關,真係好有特色。好喇,講番個賣飛佬先,佢會逐個乘客咁行去賣飛，之後會企番喺車嘅尾門，用隻左腳踏住其中一條鐵通，主要防止有人喺開緊車嘅時候拉開車門，做成危險！同時亦方便賣飛佬喺巴士埋站時，開門俾啲乘客上落車。點解叫賣飛佬呢？因為我從來未見過有女人賣飛。查實賣飛佬除咗賣飛同埋拉閘關門之外,佢哋嘅工作重包括通知司機有乘客落車。嗰陣時同依家唔同，家陣落車咪自己鐘囉，但以前如果要落車就要同賣飛佬講話有落，佢就會拉拉條綁住個冷鐘嘅繩，個司機聽到鐘聲就會停車落客。落完客之後，個賣飛佬用個打窿機喺車頂部份敲兩下，司機跟住會識得開車。吓？乜話？如果個客係啞嘅，佢點落車？係喎！真係唔知喎！我咁耐都未見過啞嘅乘客。不過就算遇到,佢唔出聲我都唔知佢係啞個喎!
以前搭巴士，冬天就涷死，夏天就熱死,唔似依得家,九成九係空調巴士。落雨時架車好似水瓜棚咁，四圍都漏水。舊款巴士嘅坐位係用綠色藤編織嘅，我相信好多朋友都未見過。由於用藤織嘅坐位好難清潔，過咗一段時間，就會滋生木蟊，我細個嘅時候鐘意著短褲，個大脾俾啲木蟊咬到一撻二撻，非常之得人驚。最慘係喺大熱天時，架巴士同個焗爐無乜分別，巴士嘅引擎又熱又嘈，搭巴士真係好辛苦！

如果揸開車嘅朋友都知道，汔車除咗入油之外，重要周不時check 吓有冇水,啲水係用嚟將架車嘅引擎冷卻,嗰陣時啲車嘅散熱系統無依家咁先進,尤其係啲老爺巴士.個引擎隨時因太熱而令到水箱裡面啲水都滾埋.有經驗嘅司機都會擺定樽水喺側邊,不過呢樽就誇張少少,俾你到上車都無地方擺.

記住細細樽就得架喇!如果遇啱咁嘅情況,首先要將架巴士停埋一邊,千祈唔好咁快將個水箱蓋打開，分分鐘瀨嘢,因為啲水滾咗導致水箱壓力增大,個蓋一打開,啲水就會射出嚟.試過有司機喺咁嘅情況下,淥到重傷入醫院. 嗰陣時啲舊式巴士,個水箱位置係喺司機側邊,所以如果水滾,啲蒸氣會噴哂入車廂入面,整到成架車廂都煙霧瀰漫,呢啲情景,見怪不怪.通常巴士<谷>得太緊要先至會水滾,由於行大霧山嘅巴士要<谷>斜路,嗰

嗰條線嘅巴士周不時會有水滾情況出現. 如果好運的話,加完水等個引擎冷卻之後可以開番,但有時個引擎太熱,連鍼口都燒埋，

加多多水都無用，咁就無辦法喇，大家唯有等下一班車。

企位嘅乘客都鐘意企近門口度，因為無遮無掩，啲風係咁吹埋嚟，你話幾咁爽喇！不過落雨天時就論盡啲，有時架巴士駛得太過貼近路邊，會將側邊水氹啲水唧起，好似個浪
咁冚埋架車度，企近車門嘅乘客分分鐘變落湯雞！所以以前啲人就算上咗車,死都唔肯除低件雨褸就係咁解!

搭車返學條路都算平坦，但係做暑期工我就要經過大霧山先至可以去到葵涌。

由大霧山到荃彎呢段叫荃錦公路，整段路唔係上斜就係落斜，上斜比較傷車，所以好多自己有車嘅朋友，會選擇行青山公路。

由於得一條巴士線，加上班次疏落，所以每班車都差唔多爆滿。大霧山斜路多，而啲巴士又鬼咁老爺，加上好多時超載，所以嗰條線嘅巴士特別多死火。嗰陣時啲巴士係用棍波，揸嗰條線嘅司機都知道辛苦，好多時牛記笠記。何解？原因係架車通常連企位都滿，一上斜路已經要用1波先至夠力，慢慢熬上斜，架車無風油呔，我見到個司機要成個人企起身，用力將個呔盆扭到飛起，先至轉到個細彎。上落大霧山有幾多個彎，我雖然無統計過，之不過肯定唔會少。

又熱又用力，所以揸一轉大霧山，個司機會散晒。

所謂人老精，鬼老靈。啲司機揸揸吓就會愈學愈精，佢哋一到上山，就用一條木條，大約2-3呎長，攝喺油門同司機位之間，咁個司機就唔駛成日踩住油門上斜，起碼慳番唔少腳骨力，你話係咪好聰明呢！當然咁做係觸犯交通條例，同埋好危險，因為如果遇到突發意外，都唔可以喺短時間之內殺停架車，不過以前啲人唔興投訴，加上個個司機都係咁做，大家亦見怪不怪。
我平均一個月會踫啱1次巴士死火，喺咁嘅情形下無得選擇，唯有等下一班車。不過，就算等到下一班車都唔好開心住，因為分分鐘又係滿到瀉，絕無誇張，唔信你睇吓喇！

真係插針都唔插唔落架！個司機勉強俾兩三個塞上車已經算係有良心架喇，你話趕時間返工係咪好大鑊呢！所以啲人見到有車經過都會攔截，睇吓有無好心嘅司機，載你一程。嗰陣時啲人比較有人情味，好多時見到巴士死火都會自動停低，我都搭過唔少順風車。

據當時有個司機同我講，成條行大霧山嘅巴士總數，加加埋埋都係得10部咁大把，車程起碼要個半鐘頭，約莫要成25分鐘一班車，所以嗰陣時真係嘥唔少時間喺等候巴士。試過有一次，我又踫啱巴士死火，個司機都唔知幾風騷，佢話嗰朝佢嗰架係第7部死火嘅巴士！返唔返到工呢你哋自己執生喇。點解個司機會咁風騷呢？原來架車死咗火，嗰日個司機就唔駛做，齋坐係度等收工，唔怪得之啲司機咁好人喇,滿到瀉重停車上客,原來搏死火唔駛做。不過說話要公道啲,有少部份司機好好人嘅。遇啱去到某個彎位唔夠力上斜嘅時候,佢會叫減啲乘客落車先 ,減輕重量,等架車夠力上完條斜路,先至叫番啲乘客上車。唔知你哋搭車有冇遇過咁嘅情況呢?比著依家,個司機肯定俾人插到暈!分分鐘豉椒炒魷。

巴士嘅服務到80年代初都未有大嘅改善，我嗰陣時喺荃彎返工，放5點15分，我習慣喺福來邨個巴士站等車返錦田。當時有兩條巴士線經荃彎返元朗，16號同26號，前車經青山公路返元朗，雖然唔順路，要再喺元朗轉車返錦田,但車比較多。我喺選擇唔多之下，有車嚟都會擠上去，總比喺巴士站無了期咁等好得多。試過有一次，我足足喺巴士站由5點15分等到7點幾。我以前個老細住喺荃威花園，佢食完飯，習慣行落市中心散步，佢見到我好奇怪：咦？乜你放咗工喺荃彎行街呀？我苦笑咁同阿蛇講：我收工等車等到依家，差唔多2個幾鐘！飯都未食呀！阿蛇搖搖頭咁行開咗。

由於荃彎係中途站，大部份巴士嚟到嘅時候，連企位都滿晒，好多時司機都唔會停車，俗稱《飛站》。遇啱啲有良心嘅司機，佢哋會將架車駛過車站約一百米處停一停，跑得快嗰2-3個就會上到車，你話係咪好剌激呢！有啲唔夠人跑嘅就索性唔追，但條氣又唔順，佢哋通常會揸住舊石頭，,不過呢舊就大過頭，拎得起都擲唔得遠喇！嗱，呢啲細細舊嘅就差唔多！知冇？佢哋見到巴士飛站就擲過去，話時話喎，可能工多藝熟，日日係咁擲，好多時都擲中架巴士車身，之但係又唔會擲爛啲玻璃窗，你話佢哋係咪好好技術呢 !所以嗰條線嘅巴士車身，特別多凹凹凸凸,就係咁嘅原因。查實呢種做法好危險，分分鐘做成意外。但係喺嗰個年代真係無王管，市民搵食都唔係手腳，好多盲字唔識多個，邊會好似依家咁，郁吓就話投訴巴士服務呀！

嗰陣時揸巴士都好受氣架，喺元朗有條田廈路，

啲村民唔俾外來車輛駛入，郁吓就喊打喊殺，巴士都唔例外。但係如果巴士唔經嗰條路，就無路入流浮山。九巴喺無選擇之下,被廹同村民達成協議，巴士可以穿過田廈路，不過唔可以設立巴士站，村民可以隨時上車同埋落車，一伸手或者大嗌就搞掂。我諗全香港九龍同新界，都搵唔到一條無巴士站嘅路線。但之後引發咗好多衝突，有啲司機被啲村民話嗌咗都唔停車，最後仲被人打添！大佬呀，嚟揸車啫，唔係嚟俾人打喎！呢條線你揸埋你嗰份喇！好多司機都拒絕揸嗰條線，後尾巴士公司同村民講掂數，最後設立番巴士站，事件先至平息。

我曾經喺大祠堂(即係赤柱監獄)做過，揸嗰條線嘅司機都好受罪。巴士冧把就唔記得咗，不過佢嘅總站就設喺石柱監獄前面。喺嗰度上車不外乎幾類人，監獄處職員，赤柱航海學校同埋聖士提反嘅學生。嗰陣時讀唔成書嘅男仔，小學畢業後，但又考唔到升中試，部份唯有入讀赤航,第日可以做海員,叫做有一技之長同埋收入穩定。但有一啲人，利用呢個機會跳船，跟住非法留低，佢哋多數選擇美國，因為美國到咁上下就會特赦黑市居民 ,我有個小學同學都係咁去咗美國。

而喺聖士提反寄宿嘅學生，多數係有錢子弟，又係讀書唔成嗰類，老豆老母無眼睇，一個唔該將佢哋送去寄宿,等佢哋可以過吓啲獨立生活,轉變吓環境,希望佢哋無屋企人照顧之下，好好反醒，點知班友仔近朱者赤，近墨者黑，好學唔學,成日同班赤航仔霎氣。赤航嘅學生唔係善男順女，好多都有社團背景。嗰陣時有首詩好流行，頭嗰兩句係:赤航原是咕哩竇,咕哩住滿四層樓……由此可以見出赤航喺一般人心目中嘅形象。

我哋喺監獄工作，俗稱《柳記》，你話我唱衰自己友唔啱都係咁話喇！好多師兄都係乞人憎。佢哋收工上咗巴士，等耐少少就會鬼殺咁嘈，指住自己個手錶同個司機講：喂！過晒鐘囉喎，重唔快啲開車？啲司機都買佢哋怕，未夠鐘都要開車。而班赤航同聖士提反學生都學足晒《柳記》啲衰野，郁吓就對啲司機喊打喊殺，你話揸呢條線係咪好大壓力呢！

嗰陣時搭巴士除咗用辛苦嚟形容之外，重好危險架！我有兩次險死還生嘅經驗。話說有一晚收工，架巴士經過荃彎已經嚗晒棚，司機好人喺巴士站過少少停車，

而我早有準備，見到架巴士收慢油，我同另一個男仔即時發足狂奔

，

終於俾我哋上到架巴士。架車塞滿晒乘客，我被廹企喺梯級，查實好鬼危險，如果巴士門突然失靈打開，分分鐘會死無全屍,喂?最多咪斷手斷腳!點會死無全屍呀?嘻嘻!誇張少少得啩?架巴士好似拉牛上樹咁躝上山,有幾段較斜嘅路面,架車慢到幾乎想停低咁滯,當大家以架車會死火嘅時候,點知死吓死吓又捱過,終於到達農林站,大家都鬆一口氣,因為之後全程落山, 就算死火都可以跣落山喇!

架車上山嘅時候，開得慢不突止，個ENGINE重鬼咁勞碌，不斷散發熱氣，跟住吹晒入車廂裡面，都唔知幾咁辛苦。依家落山，架車唔駛俾油，又開得快咗。路傍長滿大樹，加上經已黃昏，啲涼風係咁吹埋嚟，都唔知幾爽！唔通呢啲叫守得雲開見月明？落山嘅時候，望到流浮山嘅黃昏美景，日落餘暉，將晚霞染成金黃色，夕陽無限好！果然無錯！正在陶醉喺咁靚嘅景色中，突然發覺有啲唔對路，點解個司機轉彎都唔收油嘅？架車好似比平時快咗好多喎！唔通車神上身？大佬呀幾十條人命喺你手裡面架，千祈咪玩野喎！

大家正感到奇怪嘅時候，就聽到個司機大聲咁嗌：個《廹力》有問題，殺唔到制，大家要掹實架車！吓？唔係咁大鑊嘛！聽到個司機咁講，你話唔驚就勢係假，都唔知架車會唔會衝落山，咁大個仔第一次感覺到乜野叫做死亡,唯一可以做嘅就係祈求祖先保祐。啲乘客個個都好緊張，原本架車都幾嘈嘅，不過喺嗰個時候突然無人出聲，個個儘力掹實架車，司機即刻入番個低波，將架車拖慢。由於架車太快，霎時間用低波將架車減慢，個引擎負荷驟增，發出好剌耳嘅聲音。但如果長時間咁做會好危險，分分鐘燒波箱，嗰個時候就神仙難救，因為架車會完全失控，愈衝愈快，結果就係車毀人亡！

個司機好彩臨危不亂，重不斷响鞍，等上山嘅車有所警惕。去到老襯亭附近無咁斜，司機想橫過對面線，用右邊車身揩埋塊護土牆嚟整停架車，點知正想斜斜哋<咳>過對面線嘅時候，咁啱有架私家車迎頭駛上山，司機即刻扭番架車返番自己條線，認真驚險。架私家車司機以為巴士司機發夢駛過線，幾乎同佢炒埋一鑊，驚魂稍定之後，擧起咗隻右手，跟住俾隻中指個巴士司機。呢啲叫啞仔食黃蓮，有苦自己知！你估個巴士司機想嘅咩！不過架私家車嘅司機都唔知道架巴士無制嘅！

之後嘅路段好窄同彎多，搵多幅護土牆睇吓都無，個引擎發出嘅噪音好大。我幾驚佢遲早玩完，佢玩完時睇怕我哋都差唔多囉！我嗰陣時反而豁咗出去，無咗開頭咁驚。架巴士一路落，一路落，過咗空軍宿舍，

重有排都未到山腳。假使去到山腳，嗰度係三义路口，交通比較繁忙，都唔知點殺停架車，到時睇吓邊架車唔好彩俾我哋架車撞倒喇！再過咗5分鐘,去到一條斜大直路,個司機見到對面有個小斜坡,佢唔理咁多,即刻行咗過對面線先,就算有對頭車見到咁嘅情形都會閃避,跟住將架巴士剷上個斜坡上面,夾硬將架車衝落啲草叢裡面,架車雖然撞爛咗右手邊一大片嘅車身,好彩無人受傷,嗰次總算不幸中之大幸。

我之後都遇過另一次又係架車無制，嗰次架車揩埋山邊停低，大家都好夠運，除咗架車身損毀之外，得幾個乘客輕傷。但係喺大約1979年左右，我都記得唔係好清楚係咪嗰一年，嗰次有架巴士又係無制，去到山腳嘅時候，直衝入喺三义路側邊嘅一間舖仔，而間舖仔被撞之後引起火警。嗰次無咁好彩，最後造成好多乘客受傷，同埋有3個人死亡。

多謝網友ｃｋｋ提供資料，原來死亡人數係６個先至啱！http://www.youtube.com/watch?v=rDodeb0CJ4U&NR=1&feature=endscreen

自從發生咗咁大鑊嘅意外之後，嗰條路線嘅巴士先至受到關注，運輪署之後嚴格規定，行駛嗰條路線嘅巴士，需要特別構造，

上斜要夠力，唔好行行吓就跪低，同埋必須加裝癈氣殺車系統。自此之後，關於殺車系統引致嘅嚴重意外已經再無發生。

隔咗幾年之後,啲巴士愈出愈夠力,大霧山咁斜嘅路居然可以行雙層巴士,你話係咪好犀利呀!

第一次坐嘅時候,我都有啲驚。諗起以前啲單層巴士都成日唔夠力,落山又無<廹力>,雙層巴士咁大架,容乜易死火同無廹力架!不過坐過之後,發覺架雙層巴士比單層嘅重夠力,新嘅殺車系統設計獨特,巴士無制自此成為絕唱!

泠氣巴士相繼面世,我仲記得第一架泠氣巴士係成架白色嘅，俗稱《白板》。

而舊式無泠氣嘅巴士俗稱《熱狗》。

如果唔趕時間，好多人情願搭泠氣巴士，因為比較舒服。

之後出現嘅係金色嘅泠氣巴士，

啲人又覺得金巴士比較豪華，到依家啲巴士愈出愈靚，搭巴士先至唔係一件苦事。
(完)

============================================

感謝過氣年青人提供以上資料

過氣年青人的網誌: http://philipchutingkai.blogspot.hk/

============================================

鐘意SeeWide的分享，給我們一個Like吧！