「
童年啊！是夢中的真，是真中的夢，是回憶時含淚的微笑！![]()
」童年係每個人成長必經之路。對於童年時嘅生活，有啲人想盡量忘記，皆因佢哋嘅童年生活，過得唔開心![]()
，或者係家庭問題；又或者受到健康困擾。我覺得沒有快樂既童年，係人生一大憾事。童年應該喺人生中最開心既日子，因為當我哋細細個嘅時候，唔識為前途擔心；亦唔會有感情既煩腦。玩飽就食，食飽就瞓，唔知幾過癮![]()
！
我屋企嘅後邊住咗一家六口，最誇張係屋前嗰家人，住咗一家十三口。戶主曾先生，佢生咗十個女，第二第三同埋第七第八個係孖女，佢哋好聽話同埋好乖，見到我都會叫聲：哥哥！我見到佢哋沱住兩淌鼻涕，雖然睇住佢哋大，但都分唔出邊個係大孖![]()
？邊個係細孖![]()
？曾生係潮洲人，佢鍾意仔多過女，最後如願以償生咗個仔。對於佢嗰種有前無後，打死罷就，勇往直前嘅精神，我都唔知佩服定戥佢辛苦。佢呢種想法完全突顯咗中國人既傳統思想，乜都係假，最緊要有仔繼後香燈。嗰陣時無宗緩，佢哋都係靠自已拼手低足咁努力做野，凑大啲仔女，唔似得依家一啲人，郁吓就揾政府攞錢，俾慢啲都話投訴。除咗曾先生一家外，村口嘅周先生都一家八口。我細個嗰陣時住既村叫南廰村,位於錦田吉慶圍側。雖然條村好細，但你計吓有幾細路仔同細路女? 就可以想像得到當年條村有幾熱鬧架啦！
我嘅屋企都有番咁上吓人數，七兄弟姐妹，連埋祖母，一家十口，加埋三隻狗
，尤其係喺食飯嘅時候，嗰幾隻狗成日為咗爭食而打交,唔夠打嗰隻就唯有走去搶啲貓飯食。結果造成貓狗大混戰。呢個兵荒馬亂嘅情況，幾乎無日無之，我已經見怪不怪。
我哋幾兄弟姐妹當然唔會為咗爭食而打交，之但係如果食得慢啲嘅話 ，餸就一定冇架啦，就算連汁都可能無得撈。久而久之，我食飯嘅速度愈嚟愈快，唔似得而家啲家庭得一個小朋友，又哄又氹![]()
先至肯食一兩啖。想當年，我既父母就啋你都儍，話知你唔食，皆因子女多，無咁衿貴。如果呢啲細路生係我哋嗰個年代，好快趣就學會搶食。所謂適者生存，完全唔駛老豆老母擔心。人性就係咁架啦，當你擁有嘅時候，你就唔曉得珍惜；相反，當你無既時候，你就會盡晒力量去爭取。
講番我大哥，佢真係好精打細算，雖然買餸錢唔多，但佢買完餸之後居然有錢剩，啲錢梗係落佢個袋啦，呢啲叫做「打斧頭」。我無揭穿我大哥，因為輪到我嘅時候，可以照板煮碗，呢啲叫共同利益![]()
。查實打斧頭要有心思既，餸菜一定要夠份量。我首先買三毫子貓魚，毫半子荳腐。再買啲豬肉，多啲梅菜，加多舊咸魚，重唔夠嘅話 ？再整多兩斤菜，夠未！四餸一湯。雖然肉少啲，但都算豐富。買餸要負責埋煮餸，餸菜既份量多少唔係大問題，最緊要手勢好。我首先將大條啲既貓魚揀出嚟，去腸洗乾淨哂，煎香嚟滾湯，滾咗之後，再落埋荳腐滾多幾分鐘，當啲湯變成奶白色既時候表示差唔多搞掂，跟住落啲胡椒粉僻吓啲腥味，再加啲鹽同埋莞茜，咁一個香噴噴![]()
嘅漁湯就 大功告成。 細條既魚就煎俾貓大哥做餸，最後人同貓都唔咋形。所以打斧頭都唔係咁易架，因為要加埋識煮先至得！每次買完餸我都有一個幾毫落袋，算係咁啦！
話說我嗰個年代，係無彩色電視嘅，所有節目都係黑白制作，雖然係咁，大家都睇到津津有味。而家嘅亞洲電視，以前叫麗的呼聲，要俾錢先至可以舖條線入屋。所以有錢人家先至可以擁有電視。如果要睇嘅話，我可以去附近嘅舖頭，但係要入場費：斗零一個鐘。斗零即係伍仙。喺嗰個時候，可以食一碗白粥或一條油炸鬼![]( "thumbnailCACVCS7J")
。我每日既零用錢都係得毫半子，試問點捨得駛呢？所以嗰陣時我唯一嘅娛樂就係聽收音機，睇漫畫同埋睇報紙，吓？你識睇報紙![]()
？可能講你都唔信，我讀小學3年班嘅時候已經差唔多可以睇哂全份報紙。我老豆嗰陣時睇開嗰份報叫「晶報」，依家已經執咗笠。嗰份報紙嘅副刋登咗好多寫得非常優美既散文，有好多係寫景既，佢哋形容啲景色形容得好細緻，可謂入木三分。我寫既文章，唔多唔少都受到佢哋勳陶。
....../
============================================
感謝 過氣年青人 提供以上資料
過氣年青人的網誌: http://philipchutingkai.blogspot.hk/
============================================
