當海倫知道呢件事之後，心中暗自高興，因為呢個對佢嚟講係一個可以整到我雞毛鴨血嘅難得機會。佢第一時間走埋嚟同我講，話收到投訴，要我喺二個星期內以書面解釋！呢單CASE自己都無得點拗，個客嘅做法明顯有誤導成份，但總部唔會考慮呢一點，最緊要係令到個投訴人滿意，俾警告信我就係最佳解決方法！所以我就有碗話碗，照事實寫，第二日已經交卷。
但令我感到氣憤的，就係會計主任竟然唔需要解釋！不過,唔公平嘅事情，喺呢個部門已經見慣晒，所以我唔覺得奇怪！
如是者又過咗一個星期，有一日下晝，海倫行埋嚟我個位度，話收工之後，成team人要留低開會，幾位大老爺有野同我哋講，到時大主管都會列席！
我知呢場戲嘅導演肯定係海倫，我相信今晚個會同嗰單投訴有關，所以預先同班下屬講，今晚呢個應該係批鬥大會，大家要有心理準備！到咗5點20分，大主管林先生從佢房裡面行出嚟，跟住走埋我個位度，問我知唔知今晚開乜會？我話乜你唔知咩？林先生重好輕鬆咁話，唔知啲官想講乜，怕且半個鐘頭可以完喇啩？因為佢約咗人食飯。我心諗，今晚係批鬥大會，點會半粒鐘搞得掂？
我同班下屬及林書記喺五點半準時入到會議室，只見海倫同佢嘅頭馬已經喺會議室裡面，會議枱上放咗約莫三四十個快佬，全部都係我哋負責嘅檔案。我哋坐低無奈，狗品官首先進場，面露不悅之色，剛坐低，兩位女官就一齊入嚟，二品官還沒有坐下，一品官就拍枱大鬧，話今晚被廹同我哋開會，浪費晒佢啲時間！跟住無坐低就向林書記咆哮：「你身為呢度嘅主管，但就無做好你嘅管理工作！容許一啲下屬一再犯錯，你有乜野解釋？」
海倫嘅助手跟住將枱上面嘅檔案，全部搬到我同林書記面前，原來過往幾年經我處理過嘅檔案，好似漏蓋日期，蓋錯或蓋漏印鑑等雞毛蒜皮事，今日竟成為罪証！一品官更以最近單投訴，嚟支持佢話我哋工作馬虎嘅言論！一輪咀咁話我不適宜再喺呢個巡理府工作！喺調走前嘅過渡期，已經安排咗我到會計部，由明天開始！
我心中奇怪，人事安排，一向由大主管負責，今次連大主管都蒙在鼓裡，可以見得到海倫已經大權在握，大主管嘅權力已被架空！
至於嗰單投訴，支票由會計部退回俾被告人，但成個會計部都唔需要負責？連開會都無需列席？但我最後想通了，因為明天開始，當我成為會計部主管的時候，那麼，那單投訴，豈不是又由我負責？一品官不分青紅皂白，助紂為虐，用狗官嚟形容佢，絕不為過！
呢次美其名叫開會，實是批鬥大會！最後由狗品官，好像庭上宣讀犯人罪狀一般，將所有檔案的錯處，逐個讀出！然後一品官問我有沒有解釋？我見到幾個下屬俾佢鬧到眼濕濕，我知道保持沉默係上上之策！結果個批鬥大會開咗兩個幾鐘，喺我離開前，海倫俾咗張紙我，由狗品官簽發，要求我對其中幾件案件嘅錯誤作出解釋！
![]()
![]()
![]()
散會後，在前往搭車途中，林書記向我解釋，佢事先完全唔知調 我去會計部呢個安排！我同佢講，你剛才俾一品官鬧到成面屁，我都知唔關你事架喇！始作俑者嗰個係海倫，我話自從我無再參加佢搞嘅飯局之後，佢已經想整走我！我無乜所謂，如果唔係先前大主管梁書記挽留我，我早已離開呢個沒有司法嘅地方！
到咗第二日返工，我愈諗條氣愈唔順，終於寫咗封信俾大提督，我有意想將呢件事揭出嚟，等班官煩吓！我借故問一般衙差調職安排，究竟係大主管負責定一品官負責？大提督兩邊都無得失，話呢啲人事安排存在灰色地帶！重話世界上沒有一部防止出錯嘅機器，錯誤一定會有，只要盡力減到最低就是了！由於工作量增加，大家在壓力之下工作，要彼此容忍咁話！我清楚衙差仔調職應該唔關一品官事，不過作為大提督，佢表面上一定會咁撐，但私底下一品官俾佢嘅印象就會打咗節扣！大提督話佢將我呢單CASE俾咗總書記跟進，如果我再有問題，可以聯絡總書記。
過咗唔夠三日，一品官就透過海倫問我，可唔可以俾我較早前傳真俾大提督嗰一封信佢睇睇？我嘅估計無錯，大提督肯定曾就呢件事，同一品官溝通過！我明白官場文化，無論你做乜野事都好，千祈唔好煩親老闆，否則到有位進升時，你唔駛旨意佢俾機會你！一品官肯定俾大提督醒完，所以佢好想知道我封信嘅內容，篤咗佢啲乜？我寫信嘅目的已達，所以我好大方咁同海倫講，「佢想睇封信之嘛，無問題！」。自此以後，呢班大官見到我都側側身！
呢件事發生咗約莫一個星期，五短高官話嚟作例行探訪，實際係想見我。佢知道我寫咗封信俾大提督，又驚動埋總書記，驚我繼續玩落去，唔放過佢契女海倫，我諗呢個應該係接見我嘅原因！
佢同我講關於投訴嗰件事，海倫做得唔係十分妥當，會計部要負大部份責任，因為張支票由佢寄出！佢特意同我講，已經責成咗海倫，喺我嘅考勤報告裡面，唔可以提呢件事！可能呢個就係佢想我唔好再跟進嘅交換條件喇！
我估唔到嚟到沙田巡理府，又再見返五短高官，莫非我同佢真係咁有緣？而我同老細對抗嘅形象，又再重新豎立，莫非真係命中註定？我會喺計部等調走，但有無其他衙門肯收我呢？下一站又會去邊度呢？我嘅前路，只可以用茫茫嚟形容！
============================================
感謝 過氣年青人 提供以上資料
過氣年青人的網誌: http://philipchutingkai.blogspot.hk/
============================================
