日前往拜年途中，在車上的Road Show睇到一則政府宣傳短片,內容係鼓勵年青人早點結婚生仔。我睇完呢段短片，有啲啼笑皆非，覺得政府高官真係得閒過頭，無野好做，連呢啲個人嘅終生大事都要插手。
近幾十年，世界上好多大城巿嘅結婚同出生率都不斷下降，原因係受教育嘅人多咗，出嚟搵份好工真係唔容易，大家面對嘅生活壓力愈來愈大，你估結婚同生小朋友唔駛洗錢咩？大部份年青人，都係日光一族，即係日日清，邊度重有多餘積畜？
結婚係終生大事，唔同喺街巿買棵菜咁簡單。除非你又靚仔又有錢，加埋有高學歷，否則，你估咁易搵個女朋友乎？
另一方面，依家嘅社會趨勢，似乎女仔學歷同搵錢都優勝過男仔。好多宅男成三十幾歲，但思想仍停留喺十八歲嗰個階段，得閒唔係打機就係上網，錢又搵唔多.重有一啲,可以用無品嚟形容,開口及著脷,初次見面,竟會問對方點解唔拍拖!如果我係女仔嘅話，我都唔會考慮呢啲咁嘅男人,亦唔會捉隻老鼠入米缸咁愚蠢！
呢個政府好有趣，唔知邊位高官諗埋呢啲絕世好簥？唔通佢以為年青人睇咗宣傳短片之後，會立即結婚生仔？不過為咗唔好浪費呢個構思，計我話只要少少改動，就會達到立竿見影之效。
鼓勵係無用嘅，應該係獎勵先至會有效！所有港男或者港女喺三十歲以下結婚，會優先獲配公屋一間，加埋有現金三十萬津貼；如果二年內生小朋友，另加獎金十萬；假如屆乎三十至四十歲先至結婚，則公屋分配不變，但現金津貼減半，小朋友獎金亦會減半。為咗減低難度，只要其中一方係香港永久居民便符合申請資格,無須入息及資產審查。
假如重未夠吸引力的話，可以考慮將津貼同獎金增加一倍,分別去到六十萬同二十萬。重賞之下，必有勇夫！大家覺得我嘅提議有無建設性呢？
============================================
感謝 過氣年青人 提供以上資料
過氣年青人的網誌: http://philipchutingkai.blogspot.hk/
============================================
