禽日有個老友同我傾訴，話好唔開心 ，幾晚無瞓過好覺。我問佢：何解 ？你想我點幫你？不過老老實 對於感情嘅嘢，我攪唔掂，你最好揾白姐姐；至於錢銀嘅嘢咯喎………你可以揾慌信兄弟…..我老友即刻截住唔俾我再估落去。
佢同我講 ：唔好意思，你估嘅嘢無樣啱。老友記！咁唔該你快啲講，唔好嘥晒啲網友時間。
我老友話上兩個禮拜，佢睇完戲，啱啱轉出街角，見到有個婆婆喺度賣恐龍蛋 ，二十蚊五隻。我閘住佢唔俾佢講落去先，我覺得有必要喺度澄清，恐龍蛋係一種生菓嚟嘅，味道同布冧差唔多，唔係真係恐龍生嘅蛋。
跟住佢話恐龍蛋平時買二十蚊四隻，依家賣多一隻，係咪好扺先？所謂執輸行頭，慘過敗家！佢驚住番轉頭俾人買晒，拿拿聲即刻買咗四十蚊，總共十隻。因為執到平嘢，所以心情都靚啲。點知轉出大街， 見到另一檔竟然賣二十蚊六隻，晒士都係咁大咁細，咁即係買貴咗嘢，原本好開心嘅心情一吓子消失晒。
所謂福無重至，禍不單行。返到屋企，佢同老婆講起呢件事嘅時候,佢老婆話：有無咁啱呀!我都買咗恐龍蛋喎!二十蚊七隻。我老友即刻將佢老婆買嘅恐龍蛋，同佢買嘅比較一吓，二十蚊七隻?佢心諗,斷估應該細好多啩？點知一比之下，佢發覺老婆買嘅重大隻過佢買嗰啲，我老友話呢次真係晴天霹靂，蝕得好慘，跟住腳步浮浮，幾乎暈咗喺度，結果幾晚瞓唔著覺。
查實喺呢個世界上，有好多好似我老友呢類人。佢哋活得唔開心，皆因佢哋鐘意凡事作比較，唔識得滿足，更加唔知道乜嘢叫做價? 同埋乜嘢叫做值?
雖然價值呢兩個字成日黐埋一齊，不過好多時《價》唔係等於《值》嘅。就以恐龍蛋為例，如果賣二十蚊四隻，啲農民同埋小販都可以得到合理嘅利潤；但如果賣二十蚊五隻，啲農民同埋小販得到嘅利潤可能已經減少咗；去到賣二十蚊七隻，啲農民同埋小販可己經能血本無歸。簡單講句，如果恐龍蛋賣五蚊一隻，就有利潤;如果賣到四蚊，已經無乜利潤；如果賣低過四蚊，啲農民就要蝕本體!
如果我老友明白呢個道理，二十蚊買到五隻恐龍蛋已經係好著數嘅時候，佢就唔會唔開心，更加唔會因此而瞓唔著覺。好多人就係俾佢自已嘅貪婪，唔曉得滿足嘅心態累死。
知足者常亦樂也！ 你哋話我講得啱唔啱喇?
============================================
感謝 過氣年青人 提供以上資料
過氣年青人的網誌: http://philipchutingkai.blogspot.hk/
============================================
