根據報章透露,特首辦花費公帑 $902,443元買 293張椅,其中有兩張椅共花費咗$27,398元，即每張$13,699元，結果招來議員狠批窮奢極侈！
我覺得議員咁講就唔啱喇，所謂工欲善其事，必先利其器，張椅坐得唔舒服，邊有心機做野？如果買啲由強國進口嘅貨色，分分鐘會成張散晒，或者啲質料有問題 ,引起皮膚敏感,到時要喺屋企養傷咪重得不償失?一分錢一分貨，貴椅有佢嘅價值，無論用料以及設計，都符合最高要求！坐咗喺張椅度，個腦會靈活好多，做任何事情都會得心應手，所以真係物有所值。
另一方面，呢啲咁貴嘅椅，並非一般平民百姓可以負擔得起，故此政府一定要鼎力支持，先至可以維持銷路。依照港視呢個事例，政府喺簽發牌照時，曾考慮該公司嘅財政同埋巿場嘅消化能力！基於以上原因，就算政府知道啲椅價錢超貴，但為了該公司嘅利潤以及政府嘅威信，所以一定要幫襯。
凸首身為特區之首，坐萬零蚊一張椅，梗係cheap喇!會俾其他元首睇唔起。好似上次同賓仔總統阿灰落會面時，阿灰落咪俾張爛鬼疏化你三條友仔「得」吓囉！反正佢心諗你班友仔喺香港坐慣嘅椅,同呢張都係差唔多啫。如果凸首坐慣嘅係幾十萬嘅大班椅，就名正言順咁對阿灰落講：「唔好意思，我個躉坐慣啲幾十萬一張嘅大班椅，唔慣坐你呢張咁硬嘅疏化，如果貴國連一張似樣嘅椅都無嘅話，我哋今日會面就到此為止！」你話咁講幾有吉屎同自豪感呢！亦唔駛俾傳媒之後猛咁唱，話凸首去到菲律賓俾人矮化喇！
所以我對於用成百萬公帑買椅表示支持，計我話,凸首張椅嘅筆蓆,最低限度唔可以低過五十萬，咁先至唔會俾人睇死，你哋話我講得啱唔啱喇！
============================================
感謝 過氣年青人 提供以上資料
過氣年青人的網誌: http://philipchutingkai.blogspot.hk/
============================================
