好耐好耐以前，喺一間老人院舍其中嘅一間房之內，有位伯伯叫老人甲，佢天生失明，但為人樂觀。佢瞓嘅床位對正個窗口。佢雖然睇唔到嘢，但習慣每朝坐起身，對住窗口，聞吓窗外面嘅新鮮空氣，已經好滿足。
有一日，另一位伯伯老人乙搬入嚟，住喺另一張床，嗰張床同個窗有一段距離，由於角度緣故，佢睇唔到窗外面嘅景物。加上老人乙患有一種罕見嘅腰骨痛証，須長期卧床，每日除咗睇住天花板之外，真係無乜勢藝。
過咗無幾耐，兩位老人開始變得熟絡。老人乙對老人甲非常羡慕：你就好喇，可以睇到窗外面嘅景色；我就慘喇，每日除咗瞓著覺，所有時間都係對住個天花板,真係悶都悶死。
老人甲聽完之後，覺得老人乙真係幾慘喎，跟住安慰佢話：雖然你睇唔到窗外面嘅景色，但係我可以形容俾你聽，咁你就唔駛咁悶喇！
自此以後，老人甲每朝望出窗外，將睇到嘅景物，好細緻咁形容俾老人乙聽。老人乙先至知道原來出面有片好大嘅草地，遠處有個美麗嘅湖泊。
![]( "lake")
夏天鮮花盛開，
![]( "summer")
綠草如茵，野鴨悠閒地喺湖中游玩；
![]( "wild goose")
秋天嚟到嘅時候，所有樹葉喺一夜之間變成金黃色，景色怡人；
![]( "autumn")
到咗嚴寒嘅冬日，大地鋪上厚厚嘅白雪，非常美麗；
![]( "winter")
冬去春來，樹枝開始長出綠葉，部份更開滿花朵。
![]( "spring")
松鼠經過漫長嘅冬季，都趁機走出嚟搵嘢食，大地充滿生機，朝氣勃勃。
![]( "squirrel")
老人乙雖然唔係直接睇到窗外面嘅景色，但透過老人甲嘅描述，亦深深感受到窗外面美好嘅世界。
所謂天下無不散之筵席。有一朝，老人乙瞓醒，照往常一樣，同老人甲叫聲早晨 ，但叫咗好多聲，老人甲都無作出回應。老人乙心感不妙，立即按動緊急鐘通知老人院。其後發覺老人甲氣若柔絲，經過幾小時嘅搶救不果，最後返魂乏術。
老人乙知道呢個消息之後，感到非常難過。除咗冇咗一個好朋友之外，以後再冇人形容窗外美麗嘅景色俾佢知。
過咗一個禮拜，個床位依然無人搬入嚟住。老人乙於是問姑娘可唔可以調過去嗰張床。姑娘話冇問題，老人乙覺得好開心， 因為佢有機會坐起身，自己親自睇睇窗外面嘅景色。
調咗床位嘅第一日朝早，老人乙用盡氣力坐起身，懷住興奮嘅心情，因為佢係第一次自己親自睇窗外嘅景色。但當佢望出去嘅時候，整個人呆晒，因為佢乜都睇唔到，只係見到一幅磚牆，
![]( "wall")
佢好失望同埋好奇怪，心諗：點會喺一個禮拜之內，咁快就起好一幅磚牆？ 而出面啲風景咁靚，唔應該起幅牆擋住晒喎？佢非常失落，於是趁姑娘巡房嘅時候，問過究竟。
姑娘笑住回答：老人院不嬲都係有圍牆圍住，恐防老人家走失。而老人甲係盲個喎，就算風景點靚佢都睇唔到喇！
老人乙聽過姑娘呢番話之後，有啲難以置信，因為老人甲將外面嘅景色形容得真嘅一樣。而相處咗咁耐，佢都唔知原來老人甲係盲嘅！佢不斷反思，最後恍然大悟，兼且得出以下結論 ：當你懷住樂觀嘅態度，就算面對困境，亦會處之泰然。對於降臨喺自己身上嘅不幸，千祈唔好怨天尤人，要積極面對，所謂《樂乎天命復奚疑！》樂天安命呢句說話講得好啱，無可置疑！
各位網友，唔知你哋有冇另一類高見呢？
（完）
============================================
感謝 過氣年青人 提供以上資料
過氣年青人的網誌: http://philipchutingkai.blogspot.hk/
============================================
