Date: 6 Jun (Fri)
6-8 Jun 一連放3日假, 我地頭2日返左鄉下, 我都成年幾無返囉....
10點出發, 預左塞車塞爆, 7點幾先到, 即刻去探奶奶先...話時話, 我發覺我有少少面盲症, 去療養院探奶奶時居然唔認得佢個樣...佢一路同老公講野既時候我一路望住佢...點解佢個樣都唔似奶奶既??!! 我地傾左一陣, 因為未食飯呀, 所以好快走...然後就去大嫂屋企攞奶奶間屋既鎖匙, 之後就去食飯喇~
今次轉左另一間食漢堡排, 因為佢有鴨漢堡, 我想試呀~
細細碗既豬骨湯
牛+豬漢堡排
鴨漢堡排
生牛肉撈飯
話時話2隻排我食唔出有咩分別, 一樣味道既...同埋都唔係好好食, 仲話開左3間分店...
都係食開間好食好多, 又老實. 點解? 因為當我地叫完排, 佢就問我地食咩主食, 佢就用筆括住拌飯 & 生牛肉拌飯, 叫我地揀, 我都奇怪點解無白飯揀, 我鐘意白飯夾住舊肉一齊食架嘛, 所以又聽佢點每樣叫一碗...落左單之後我就攞張menu 睇, 超~ 個白飯就寫住o係 撈飯下面, o個刻我覺得俾人昆, 即刻叫隻佬取消2個飯, 改叫白飯, 隻佬又覺得唔好意思, 但係我堅持我o個碗一定要係白飯!!! 最後隻佬都改左個白飯~
其實佢地仲有一樣野, 我地落單時佢就話鴨排加左價, 都係加1,000won, 無緊要, 起碼你同我講聲, 但係我發覺就係掛o係 牆上面個menu, 所有漢堡排都係11,000won, 佢只係o係角落位貼左張紙話鴨排加價, 咁點解佢地唔直情改左個價錢寫住12,000won呢? 好鬼祟囉~~
食完9點, 好飽, 要做運動, 就係行超市~
行完返奶奶屋企, 成間屋得我地2個, 荒山野嶺咁, 我唔驚鬼, 反而驚有老虎, 哈哈, 因為佢話佢老豆既時代, 附近山頭真係有老虎架, 而間屋既位置又似足'有老虎出沒'咁既樣...
好啦, 間屋對出條路鬼咁窄, 真係只係僅僅夠一架車過, 架車闊多幾cm都唔掂, 一路行, 聽到d樹枝摑部車, ji ji 聲, 唉~ 大鑊!! 唔行都行左, 頂梗上; 泊車時, 條路又窄, 架車又大, 咁就hi 花左個車頭喇~ 不過好彩車身無事, 原來係摑到車軚...
原來係無最黑, 只有更黑....間屋已經無人住, 所以隻佬要開哂總掣先, 唸住沖涼啦, 熱水喉無水出, 咁我地就唸住煲水, 搵極都揾唔到個gas掣o係邊, 又打鑼打鼓打俾佢呀哥問, 原來o係天台, 開完掣, 有火!! 煲水啦...點知煲煲下無火!!!! 連最後一滴gas都無埋, 即係今晚點沖涼呀??!! 隻佬以前沖慣, 佢沖先. 我?? 正一係公主病, 攞你命!! 佢沖完同我講, 開左個水喉, 深呼吸一口氣, 然後就淋落個身到啦~ 其實原來唔係你要深呼吸就深呼吸, 係當凍水淋上身, 係不奇然深呼吸, 但係都係o個一下, 沖沖下就唔覺凍, 沖完仲好爽添~~
攪掂哂12點幾, 睇一陣video, 瞓覺, 明天早起洗車~
============================================
感謝 ahQ 提供以上資料
ahQ的網誌: http://ahqinkorea.blogspot.kr/
============================================
