漫遊西貢海岸(1): 天文公園、糧船灣~

上次參加完街坊團之後, 一直心思思想再去地質公園其他部份, 於是參加了團購, 報名去萬宜水庫東壩看「六角柱群」、破邊洲、橋咀洲、以及天文公園~~ 團費比上次街坊團貴, 不過都唔駛2百元, 包一餐海鮮午飯, 決定一試啦~~


晨早就要去西貢新公眾碼頭集合, 已經有好多團友在等船~ 登記完之後都排了一陣, 9時多才上船~ 未上船之前就影吓碼頭周圍的風景~


有段時間冇來過西貢市了~~


上船出發啦~~


颱風走了2日, 於是天氣算不錯~~ 初初都擔心呢日會落大雨~~ 幸好有藍天白雲伴航~~





我們第一個景點是天文公園, 其實自己已經來過幾次, 不過行程包埋, 都要跟大隊看一看, 於是就在公園附近的碼頭下船~ 之前都唔知原來可以坐船去天文公園, 不過當然要有船家肯載, 另外就算由碼頭行起, 都要行15分鐘先到公園, 可能都係坐的士最舒服, 可以喺門口落車~


又見到萬宜水庫西壩, 還有這個亭~~ 之前都曾經介紹, 天文公園隔離就係創興水上活動中心, 呢個"湖"就係俾啲參加者玩水上活動~


烈日當空行15分鐘, 終於來到啦~~


因為之前來過, 都係影了幾幅相, 就行去圓亭入面休息, 因為好熱呀.......不過未來過的團友就參觀得好開心~~


反而公園對出那塊草地似乎更吸引, 影相出來的效果不錯~~


那些參加者終於出來玩水上活動~~ 他們應該涼快好多~~


不過最熱都唔係我哋, 行返去碼頭時, 大家都見到一班著哂迷彩服飾的朋友進行活動 (紅圈), 有些八卦團友就走去問負責人, 原來他們是少年領袖訓練團, 喺度進行訓練, 有興趣都可以入會參加~ 不過30幾度著住長袖衫走來走去, 真係少啲意志都唔得呀......


上船, 預備去食飯, 當時都不知不覺差不多11時~~ 沿岸都有不少有趣的景色, 例如這個海邊瀑布~ 相信要坐船先可以看到, 行山都未必得~


仲有一個個海蝕洞~~ 不過這些不是行程重點, 導遊都冇特別介紹, 只係話下午可以看到更精彩的景觀~~


周圍都係呢啲洞穴和岩石海岸呀~~~


船隻行了一段時間, 終於見到目的地: 糧船灣~~ 咁大個人都係第一次來~~ 反而導遊提起好多年前的"北海漁村"就在附近的廈門灣, 自己好細過的時候就去過, 不過都冇咩記憶了~~


這裡有點似南丫島的海灣, 有不少魚排~~ 遠處寫住"有利" 就是我們吃午餐的地方~


上岸了~~~


又回頭影吓我們架船先~~~


藍天白雲下的魚排~~ 周圍冇咩人~~


很多離島碼頭都有的小燈塔~~


由於大船駛近魚排會引起風浪, 於是架船唔可以泊近酒家, 要大家繞路行去食飯......又要行15分鐘先到......有團友帶了BB車, 又有家人帶了坐輪椅的老人家, 行山路都有點唔方便, 因為幾多樓梯......大家如果想來, 最好都係有自行步行能力的人士會較好......

行過這個寧靜的小海灣, 不過有不少垃圾...


影吓花花先~~~

食飯的相片都係欠奉, 因為同枱又係唔識嘅人, 周圍影似乎不太好......酒家係沒有冷氣, 幸好仲有大風扇周圍吹, 不過大家行到來都好熱, 人人都要買汽水飲, 酒家賣1罐$10, 真係賺到笑......不過村民都係為了生計, 大家各取所需啦~~

至於食物, 份量都很充足, 例如有南瓜蒸排骨、蒸魚、蒜茸粉絲蒜扇貝、炒椰菜、白灼蝦等等, 我們一枱都食唔哂 (可能因為大家都細食~), 不過扇貝好細粒, 魚的味道普通, 較好的是排骨和蝦~~ 似乎那次去吉澳食的海鮮餐比較好味~~


食飽飽就周圍影相~~ 原來酒家後面有個食環處公廁, 對住一個挺美麗的小海灣~~ 那架遊艇的主人仲同佢個女、狗仔一齊喺小沙灘游水~~


呢個就係小沙灘~~ 暫時未有好多團友, 因為我們係好快食完走出來影相, 其他人應該未食完~~


公廁附近有條樓梯, 行十幾級就見到一個涼亭~~


從涼亭望出去, 天氣同風景都很美呀~~ 不過當然又熱又曬啦~~~


這個小沙灘的水很清澈, 藍藍綠綠的海水, 差點就看到海底似的~~


海闊天空, 雖熱, 但很美呀~


之後從涼亭行返去沙灘, 已經有不少人~~ 不過差不多到上船時間, 大家又要行15分鐘回碼頭上船~~


連糧船灣的天后廟都冇時間入去睇添~~ 下次有機會再來啦~~~

下一篇就是萬宜水庫東壩、破邊洲、甕缸群島景區~~ 但就出了一點小意外......

地質公園的官網對地質公園各景點有詳細介紹: http://www.geopark.gov.hk/index.htm

糧船灣有利海鮮漁村:  http://www.openrice.com/restaurant/sr2.htm?shopid=12218&tc=sr1

天文公園: http://www.lcsd.gov.hk/CE/Museum/Space/Astropark/astropark_intro.php

============================================

感謝 helenhlblog 提供以上資料

helenhlblog的網誌: http://helenhlblog.blogspot.hk/

============================================