日日開心日日踩(DAY3)....單車(黑島篇)

由 cowcow 於 2011-06-29 00:00:00 發表 | 累積瀏覽 538

分類：

2011-06 沖繩+外島

日日開心日日踩....單車(黑島篇)

2011年6月29日下午10:59公開累積瀏覽 394 17

嘩.........係沖繩返到o黎真係忙爆, 月尾要埋數真係做極都唔完~

好耐未試過一返工就做到放工~ 仲要開OT, 不過7月就應該上晒手, 再可以無限上網.

繼續繼續講埋沖繩之旅, 再唔寫就會唔記得~!

好~ 開始第3日行程~

話說我唔記得o左10分鐘就可以返到石垣島~ 如果記得就唔洗晨咁早走人啦,

都未趕得切同日本妹講拜拜~

我呢個冇計劃o既人, 其實係唔應該去日本o既, 因為日本無論坐乜交通工具都準時十足, 我呢d盲舂舂, 果然送車尾~ 差3分鐘, 望住架開往川平灣o既巴士開出.我唔急係因為我以為呢個旅遊景點最多咪30分鐘一班車~ 點知要10:50分至有巴士,,,,,,,,,,,即係話我要等1小時15分鐘

本來我打算聽日至去黑島o既, 最後都係改行程, 改係今日去~ 即刻由巴士總站行番去碼頭~

可惜船都係要等, 又要等個多小時~ 如果一早諗住去黑島, 我9:25分到石垣碼頭, 即刻行過隔離就可以坐到9:30分o既船啦,,,,,,,,,依家要等11:00.

唯有行下啦.

買石垣鹽雪糕~ 呢隻雪糕要放2~3分鐘, 再攪到佢一pat pat 咁至好食喎~

唔係老作o架, 佢地係咁教o既~

又係熱到暈o既一日~

25分鐘到黑島~ 咁細o既島仔緊係租單車啦~

黑島外型似個心~

唔知係咪人少又可能我早o黎得滯, 冇乜人租車喎

個日本妹問我打算租幾耐, 我話1:40分有船, 咁就租2個鐘啦, 普通係玩完至比錢, 佢叫我比o左錢先, 間車玩完就咁放番係度就得喎~ (真係唔驚人偷?)

黑島我最大目標就係伊古棧道, 因為係網上見個台灣人個blog影得好靚, 所以我唔係好似其他人咁去仲本岸先.

今次冇尋日小濱島咁多斜路~ 好好踩,

突然間我見到一隻孔雀自由行呀........我以為我眼花.......停低架單車時佢已經入o左草叢,,,,,,,我緊係唔敢一個人行入去搵佢啦.....雖然日光日白

踩o左10分鐘就搵到~

沿途都係得我一條友, 其實再行呢d小路真係有d驚o架~

不過一出到去海邊就嘩o左出o黎好靚呀~

d水又夠清

又想自拍, 不過無幾耐就見到3個人行緊o黎, 2男1女, 有d人氣都冇咁驚~

右邊呢位日本太太同兩個姨甥由東京飛o黎黑島游水, 傾多兩傾佢知道我係香港人就有d意外, 原因日本太太個老公早兩d派o黎駐係香港, 仲住係跑馬地, 咁緊係d賺錢日本公司啦, 咁有米.

佢地3個人因為等緊仲間海岸水退就去玩浮潛. 所以我地傾o左好耐呀~ 日本太太仲問我有冇帶泳衣, 我話有啦, 不過放o左係碼頭小食店入面. 佢叫我一定要去仲本海岸玩~ 佢話好多日本人都唔知個度好正~ 問點解我呢個香港人會識o黎黑島~ 我都係睇人d blog咋~

佢地想係呢度游下水先~ 不過最後都冇~

叫日本太太幫我影一張相~

跟住佢地就走啦, 叫我記得一陣要去仲間本岸搵佢地, 我話我都想游, 不過一個人會驚, 佢話會叫佢兩個姨甥睇住我喎.......聽佢咁講真係想返去碼頭攞泳衣~ 但係個心又想坐1:40分返石垣島. (其實返佢都唔知做乜o既)

佢地走o左我就玩自拍啦~

大風得滯, 特登瞓低架單車, 因為驚佢吹落海就大鑊啦.

今次都幾失敗, 有grd3唔用走去用s95~ 又唔係連環快拍, 但又set到一次影2張~

跳到氣咳都影唔到幾張見得人.

巴斯光年, 一飛沖天~

係呢度逗留太耐啦, 冇可能坐到1:40 o既船, 又唔想走馬看花~ 所以決定坐4:00船~

係伊古棧橋跳飽之後就向仲本海岸出發~

黑島o既牛數量聽講係人o既10倍, 全個島差不多有3000隻牛~ 不過我又唔係見到太多喎, 石垣牛肉咁貴~ 佢地每隻牛都有個係耳仔.

仲見到一隻羊仔自由地吃草草~

終於o黎度仲本海岸

唔知呢條係乜蟲~

仲本海岸原來係咁o既~

好大~ 但係人唔多~

d水真係好清~ 藍色小魚~

但真係好曬~

d水退得好犀利~ 可以行到好遠好遠,

終於見到日本太太, 我問佢咁大浪, 點解冇人玩滑浪~ 佢話個度o既地形係突然凹入去,

所以d浪一o黎, 經過凹位, 咁d浪就會冇o左~

我真係好想好想行近d睇d浪, 不過我一個人, 而且又冇著救生衣, 所以都唔係咁夠膽, 但係事實上係行到去睇o既

見到d浪就諗起311海潚場面~

雖然呢一刻日本太太都叫我一齊玩浮潛, 但係我都未玩過, 唔知點玩, 所以我都係同佢地講搭4點船走人~ 日本太太話佢地會玩到5點喎. 坐last 一班6:00返石垣島

其實有唔少人玩浮潛o架, 不過個個係水入面睇唔到~

同日本太太拜拜之後我就狂踩去碼頭, 因為仲有黑島研究所未去, 又要聲住搭4點船

踩到屎下屎下熱死辣辣,,,,,,,,,,心態一轉........我好想游水呀. 今日唔游, 咁我帶o黎o既泳衣就冇用, 咁難得有3個人陪自己游, 所以拿拿淋係碼頭小賣店換泳衣,

跟住狂踩番去仲本海岸

點知3點11個字返到到去................冇晒人..............好似變魔術咁. 只不過係半個鐘前o既事o者.............

點算唔見晒d人,,,,,,,,,,,,,,,4點船又趕唔切了, last 一班船就要到4點,,,,,,,,,所以迫於無奈落水啦........都換o左永泳衣~

最起碼浸濕自己至得o架~

生勾勾o既海參真係好得意~

浸o左一個鐘就攪成咁~

原來呢度真係有瀨尿蝦, 我都見到一隻好細好細, 我估只有1cm o既size. 仲以為自己眼花tim

呢d毛蟹仔大約只有3cm, 原來遇到外敵仲會有保護色tim喎~

要拜拜仲本海岸啦~

攞o左架車差不多7個鐘, 但只係比o左2個鐘錢, 原來租5小時以上都只係收1000yen, 所以我補番600yen~

係碼頭終於見到日本太太3個人, 原來佢地係我第一次走之後, 因為水退太多, 所以佢地就冇再浮潛改為四圍遊覽~

我同日本太太講, 如果今日唔係遇到佢, 我係黑島就唔會玩足一日, 就唔會咁開心啦.~

有佢今日我真係過得好開心~!

返去石垣島準備住膠囊酒店~

今朝8點係竹富島民宿食完個豐富早餐之後就一舊o野都冇食到落肚, 依家差不多7點

用500yen 買o左5串串燒~ 話咁快吃晒落肚

返到hostel 趕得切睇日落~

係條大馬路後面, d字又寫到咁細隻,,,,,,,,搵o左我一輪

所講膠囊酒店........

原來係咁............1800yen................不過今晚我想瞓番覺好o既~ 所以我問佢獨立房幾多錢~

獨立房只係3000yen, 即刻補錢住呢間~ 仲有電視任你睇, 我住5晚, 都係得呢一晚有得睇電視~

成身滾熱辣, 又口喝, 原來曬膿o左係要補充番多d水o既,,,,,,因為水份經皮膚蒸發o左喎.........都係沖繩hostel, 台灣老闆娘講o既.

呢間art box hostel其實都唔錯~

今晚晚餐杯麵一個~

仲有一舊魚~

食飽上網再瞓覺~ 88

聽日去川平灣~

亞洲,
旅遊

回應 (17)
引用 (0)
永久連結

訂閱回應RSS摘要

米院友

米院友
2011年7月9日下午1:44

嘩 ! d 水好清好靚又淺水, 我肯定玩到唔捨得走
回覆

cowcow

cowcow
2011年7月9日下午1:54

係呀, 叫得意姐下次攪去登富士山, 之後去沖繩玩~ (現場係仲靚O架............)

YY
2011年7月2日下午4:26

你自拍的跳跳相，真係掂！我Ｄ朋友一個人去旅行，個個去完都話開心。我相信無論幾多人，有得去玩，都開心！
回覆

cowcow

cowcow
2011年7月2日下午4:50

有d人冇諗過一個人去旅行~ 其實一個人真係可以自得其樂~ 一條友係咁跳跳跳, 跳成個鐘都得o既~ 但係某d人眼中就會覺得, 有乜好跳呀~??..............咁囉佢地唔試, 真係唔明箇中樂趣其實獨樂樂一定唔夠眾樂樂..
有d人冇諗過一個人去旅行~ 其實一個人真係可以自得其樂~ 一條友係咁跳跳跳, 跳成個鐘都得o既~ 但係某d人眼中就會覺得, 有乜好跳呀~??..............咁囉佢地唔試, 真係唔明箇中樂趣其實獨樂樂一定唔夠眾樂樂好玩~ 不過搵o岩個伴去旅行都唔係易~