日日開心日日跳....竹富島-上篇

由 cowcow 於 2011-06-26 00:00:00 發表 | 累積瀏覽 397

分類：

2011-06 沖繩+外島

日日開心日日跳....竹富島-上篇

2011年6月26日下午10:00公開累積瀏覽 196 11

去完小濱島坐1:35分直航船到竹富島~ 如果搭唔到呢一班, 就要返番去

石垣島至可以去竹富島~

速度快得緊要~

竹富島位與石垣島o既西面, 出名o既係用珊瑚碎做成o既路. 面積5.42k㎡、島周9.2km、人口約280人~

個個都走晒去冷氣房~ 得我一個坐外面~

睇呢張相又令我諗起沖繩o既太陽, 真係好勁~

入去冷氣房參觀下先~

20分鐘就到竹富島啦.

本來想坐巴士~

後來醒起用pass 參加新田觀光o既水牛車可以有9折 (原價1200yen)

所以我就上o左佢地o架接送車啦. (碼頭有唔同公司o既接送車)

戴住帽 (右邊) 個位員工都幾風趣, 最初對佢o既推介有d保留.

今日有32度, 唔知點解熱過香港o既32度~

要等半個鐘至有得玩~ 所以順便問下我今晚想住o既民宿地點係邊~

原來就係隔離~ 新田工作人員叫我先去睇下有冇房出租,,,,,事關我冇book , 諗住o黎度應該有得住~

點知去到泉屋真係full晒，，，，大鑊～！　點算？？　又唔知住邊間，　咁咪要返石垣島？？

後來返去新田觀光同員工講，　真係冇房ｔｉｍ，　佢地介紹ｏ左一間叫做新田莊ｏ既民宿比我，　但我用小人之心度君子之腹．　驚死人介紹Ｄ唔知乜Ｏ既民宿比我，　所以我冇即刻決定留宿係竹富島定係返石垣島，　先參觀ｏ左先，　但心裡面其實真係唔想返石垣．

先去睇下nagomi 塔~

1953年已經起o左呢座塔

呢條梯直到無麟, 一定要兩隻手扶住兩邊, 唔係真係sir番落o黎都幾係o野~

睇風景都幾唔錯~

http://youtu.be/U5BBEd96MNo

竹富島有兩個特色~ 就係紅色屋頂~ & 白色珊瑚砂路, 屋頂上都有隻shi-sa-獅子

好啦, 夠鐘坐水牛車啦,

本來我坐最前, 不過反正我都唔識聽佢講故仔, 咁不如讓比其他日本人坐

http://youtu.be/TbSUl9xrKqw

司機亞佰會一路講故仔, 又唱歌仔~ 仲彈三味線~

頭上有歌詞的.

大約坐30分鐘

睇完仲未決定住係邊~ 所以先租單車遊覽下竹富島先~

300yen一個鐘, 其實新田員工有同我講有一個地方可以用1000yen租5個鐘.

但係我又唔信人啦, 諗住踩o左2個鐘先, 到時至決定留唔留底

係台灣人個blog知道呢度有一間叫做竹之子的拉麵店好好食, 所以見到就即刻入去食~

八重諸島就係緊係八重山soba啦, 驚死食唔晒,,,,叫o左碗細o既, 諗住夜d再食晚飯~

麵o黎啦, 個樣普普通通~

少少肉 + 芽菜蔥

估唔到胡椒粉係竹富島名產, 後來我都用500yen買o左一樽

點知碗麵好味到震~!!!!!!!!!!!!!!!!!!!!!!!!!!!!!!!一滴都冇剩~!!

後悔叫碗細~ 就係因為呢碗麵, 我決定留係竹富島過一晚,

即刻去新田員工介紹個間民宿問下有冇吉房~

好彩有~! 一晚獨立房3150yen, 包埋早餐就4200yen, 食埋晚飯就5250yen, 不過我諗住夜晚再去食麵, 而且民宿冇多餘飯餸整比我. (因為其他人都係預約的)就咁決定, 只吃早餐.

放低行李再去踩單車啦~ 問過日本人, 今晚要7點多至睇到夕陽. 所以都仲有少少時間

知道島上有得執星星沙, 所以先去執星星~

d路好鬼難行o架, 凹凸不平~

皆治濱

只可以帶走星星沙, 但唔可以帶埋其他沙走喎,,,,,,其實唔多唔少都帶少少o架啦.

個太陽猛到唔識講, 但都要試下搵o架, 好似人地淘金咁.

星砂其實唔係砂, 只係一種有孔蟲貝殼類o既生物死o左之後, 淨番d穀被沖上岸而被人叫做星砂~

咁熱O既天氣, 我又冇帶樽仔裝, 所以只係係咁易玩下~

記起行友叫我記得跳跳跳, 見呢度人少少咪試下跳囉.........

點知跳O左10幾跳都唔得, 因為我冇帶腳架仔. 算啦, 有機會再跳~

繼續趁未天黑再踩去其他地方~

又想係度跳, 但都係失敗o既

我唔知呢個沙灘係咪叫做 kondoi灘, 冇乜人, 但風景都係好靚

呢條係西殘橋~

我估到呢度係睇日落o既地方, 所以決定今晚帶埋頭燈腳架再o黎~

租車租到5點9, 所以要急急返去還車~

未夠鐘睇日落, 又未肚餓, 所以四圍行下~ 其實都係得個幾條街仔行. 有d係食o野 & 民宿

返去民宿睇下先~

3150YEN淨住宿係唔包冷氣, 呢度比沖繩新惠莊貴呀, 呢度100yen得一個鐘咋~

日本水喉水係可以就咁飲o既~

諗住走去再食麵啦~ 點知晴天霹靂,,,,,今日佢地收4點, 即係話我正話食完碗麵佢地就收工啦...........慘, 我都係為o左食佢碗麵先決定留係竹富島~

竹之子麵店叫我去呢間, 因為附近好似淨係得番呢一間收10點~

叫O左天婦羅定食~900yen~

超大碗飯~

依家只係6點左右咋~ 唔食得落都要食,,,,我驚一陣冇得食~ 又驚夜麻麻盪失路搵唔番

沖繩好多人都飲泡盛酒, 我唔知係乜, 不過陣味好似白酒, 齋酒好似有30度, 我緊係要溝果汁啦. 做人除o左吸毒, 真係乜都要試一次呢~ 哈哈哈.

呢杯要600yen

慢慢食, 因為好飽但又唔想剩低d飯, 因為食剩飯餸對廚師係一種不禮貌

返民宿坐一陣就行路去西殘橋, 大約要行7分鐘. 去到搵個位坐下睇定d先~

等到日落啦

試下自拍一張~ 正~! 睇唔到cow樣~

趁只係得幾丁友~ 就試下玩跳跳跳~

掂啊~!! 跳o左幾張已經掌握到時間跳起~

但係其實部相機放得咁低, 係好難睇到個位置. 跳完又要番埋位睇相, 又再跳, 所以跳多幾跳已經腳軟~ 跳唔郁~

坐下睇下, 又再跳下, 當時已經開始人多了. 但還是忍不住跳跳跳, 希望多跳幾張見得人o既作品~

再繼續跳

睇番d相至知已經跳o左90幾次

跳到星星出o黎至停腳~ 哈哈哈, 都係走人啦, 走剩我同前面個個霸頭位o既男仔

好彩有帶頭燈

影到一粒星星, 你地見唔見到?

返到民宿, 老細同佢個女攞住三味線出o黎邊彈邊唱, 同住客邊飲酒邊傾計.

佢地叫我一齊玩~ 所以我沖完涼就出去聽佢地傾計啦. 當然我都有同佢地講, 我由香港o黎, 相中橫條衫日本妹就o黎過香港玩過2次啦, 所以我地都有話題傾

30度酒精o既泡盛~

歌詞呀~ 我地可以一齊唱的~

唱完之後, 我地5個住客行出去睇星星, 唔知點個天唔係黑麻麻o既, 好似就快天光咁, 不過冇帶相機, 所以冇影到相, 星星比我想像中少~

早d瞓啦, 聽朝4點半起身睇日出~

亞洲,
旅遊

回應 (11)
引用 (0)
永久連結

訂閱回應RSS摘要

米院友

米院友
2011年7月9日下午1:29

<<又想係度跳, 但都係失敗o既>> set 2 秒/10秒 delay 都影唔到呀嘩! d 水好清好靚喎, 妳有冇忍唔住想落水游吓日落唔錯, 跳得好靚呀, 好似跳緊舞咁樣 <<返到民宿, 老細同佢個女攞住三味線出o黎邊彈邊唱, 同..
<<又想係度跳, 但都係失敗o既>> set 2 秒/10秒 delay 都影唔到呀嘩! d 水好清好靚喎, 妳有冇忍唔住想落水游吓日落唔錯, 跳得好靚呀, 好似跳緊舞咁樣 <<返到民宿, 老細同佢個女攞住三味線出o黎邊彈邊唱, 同住客邊飲酒邊傾計.>> 妳識日文, 咁樣就好玩 la
回覆

cowcow

cowcow
2011年7月9日下午1:38

有腳架至可以抄底影上去效果會好似跳得好高咁. 日落個D就係有腳架向上影, 所以就到囉. 我緊係想游啦, 呢個沖繩之旅, 我其實好想去玩"體驗潛水"O架,,,,,,最後都冇, 所以下次去沖繩一定要玩耐D玩多D水上活動識日..
有腳架至可以抄底影上去效果會好似跳得好高咁. 日落個D就係有腳架向上影, 所以就到囉. 我緊係想游啦, 呢個沖繩之旅, 我其實好想去玩"體驗潛水"O架,,,,,,最後都冇, 所以下次去沖繩一定要玩耐D玩多D水上活動識日交咁樣好玩D..............係O既, 不過都要睇人啦, 人家唔想同你傾都冇計,,,,,正如識國語, 識英文去玩.....都未必有人同自己傾計呢~又或者有D人根本就唔多鍾意同陌生人傾.