來到年尾，依時依候來一餐年夜飯，身兼組版部、影印部、包裝部、維修部，兼任釘裝部、切紙部、運輸部多職自然有份，原先還以為在北角炮台山食，怎知話唔好食得太多唔係唔得矜貴，於是改為鯉魚門，主攻食魚。
先去油塘買海鮮。話說有一種魚，連小朋友都懂得蒸，咁應該係難蒸還是易蒸？全部九個人，只得兩個三人吃過，唔使諗，今趟一於試試，十幾兩要五百元，都咪話唔貴。另外一條成四斤幾，可以一魚兩味，還有一條兩斤唔到，呢條小朋友一定唔識蒸，可以比較。
來到鯉魚門，除了幾車遊客，唔知點解連星期日都無乜人。咁老張又講一次：「以前日本仔來香港，或者鬼佬來香港，必定來鯉魚門食海鮮，點解現在不見日本人？因為自從一本國際旅遊雜誌選出了香港兩處地方專門騙遊客的，其中一處便是鯉魚門，自此生意一落千丈，這叫自取其咎。」
唔好講咁多，開始食啦。
龍蝦
老鼠斑
龍蝦唔使多講，魚才是主打，聽聞老鼠斑點蒸都唔會老，所以小朋友都識蒸。老鼠斑聽得多，都係第一次食，肉質鮮嫩幼滑，的確名不虛傳，別的蒸魚，可能有較濃的魚香，肉滑明顯不同，好味是好味，價錢同樣和味。另一條蒸魚很實在，同樣鮮味，不過有了老鼠斑在前，自然給比了下去。
炸燜
椒鹽瀨尿蝦
一條四斤幾的魚，炒球啖啖肉，炸燜酥香，喜歡魚骨的是至愛。另外還有椒鹽瀨尿蝦，椒鹽香口，始終不及清蒸鮮甜美味，難忘的是有海水味。來到尾段，薑葱煀蠔和兩碟清菜押陣，個個好像有點失落，話飽唔係，話唔飽當然更加唔係，可能年紀大，係都要有碗飯落肚先叫飽，食到廚房洗碟個阿嬸都話食得乾淨，你話幾滿足。
真係有點激氣，明知今日唔飲得酒，竟然飲藍帶。唔緊要啦，都係掛住清蒸瀨尿蝦，麵包蟹，鮑魚……今年繼續努力，明年再飲過。
============================================
感謝 MK110 提供以上資料
MK110的網誌: http://mk110.blogspot.hk/
============================================
