探險家攻略 > 城中探秘 / 美食之旅 / 旅遊 > 特色景點 / 餐廳 / 長線旅遊 > 新加坡﹑馬來西亞8天遊

新加坡﹑馬來西亞8天遊

由平凡人於 2014-09-12 02:15:00 發表 | 累積瀏覽 758

分類：長線旅遊餐廳特色景點；地區：新加坡

攻略日期：2014-08-17

是次消費：每人平均約HK$ 5000.00

< 新加坡﹑馬來西亞8天遊 >

一個期待已久既星馬之旅終於要開始啦！呢個旅程真係期待左好耐好耐，由上年一位好朋友邀請，直到出發等左超過半年，所以呢個旅程真係多麼令人期待^^由計劃行程到出發所有野都唔需要我操心，所有準備工作由朋友代勞，十分十分感謝！而我做既就只係準備一個愉快心情，期待呢個又食又玩既愉快旅程到來！

今次我既星馬之旅可以分為兩部份，頭五日由新加坡到吉隆坡有一大班朋友一齊玩，之後會自己一個去檳城，不過檳城亦都有朋友等緊我，所以全個旅程都有朋友照顧，哈哈^^早於14/2已經買好新加坡機票，30/6買好馬來西亞回程機票，再book好檳城來回火車票同住宿，我既準備工作都差唔多啦，安心等出發！新加坡﹑馬來西亞我黎啦！

新加坡﹑馬來西亞（新山﹑馬六甲﹑吉隆坡﹑檳城）8天行程
Day 1：香港 - 新加坡。Maxwell Food Centre﹑聖淘沙島﹑克拉碼頭
Day 2：新加坡。小印度﹑魚尾獅公園﹑牛車水 - 馬來西亞新山。荔園
Day 3：新山。Hello Kitty Town﹑Pulau Kukup(龜喀漁村)
Day 4：新山。Johor Premium Outlet - 馬六甲。雞場街﹑馬六甲古城
Day 5：馬六甲。古城﹑娘惹博物館 - 吉隆坡。雙子塔﹑金三角 - 檳城
Day 6：檳城。姓氏橋﹑張弼士故居(藍屋)﹑天后廟﹑聖喬治教堂﹑海灘
Day 7：檳城。康華利古堡﹑銀行街﹑臥佛寺﹑緬甸廟﹑壁畫 - 吉隆坡
Day 8：吉隆坡。獨立廣場﹑舊火車站﹑國家清真寺 - 香港
   新加坡住宿：The Plot Hostels
   新山住宿：KSL Hotel & Resort
   馬六甲住宿：Hatten Hotel Melaka
   檳城住宿：Ryokan @ Muntri Street

17-8-2014

第一天

今朝乘搭晨早6:55飛去新加坡既航班，半夜未夠三點就出門口，大約四點半已經去到機場啦；半夜機場旅客唔多，難得見到機場咁寧靜

今次乘搭Scoot酷航，如果唔係去新加坡我都未聽過呢間航空公司，佢係上年先有香港航線，價錢好吸引架

酷航係廉價航空公司，由香港飛去新加坡只係$328，真係好廉價呢
而且所有飛機都係B772大機，比起其他大多數廉價航空用細機舒服得多，坐位都更加闊



第一次坐咁大部飛機！

上機啦，愉快之旅正式開始

機上冇電視機，要靠真人做安全示範

三個多小時航程好快就到啦！不過去到新加坡機場感覺比想像差好遠，唔係想像之中咁新咁靚，可能係T2比較舊？而最唔鐘意既就係新加坡關員個個都黑口黑面，好似得罪佢咁，相反進入馬來西亞時關員友善得多，兩個地方第一個感覺差太遠啦



我地有8個人，坐兩部的士就岩岩好；唔好以為坐的士就好貴，如果有四個人坐的士同坐地鐵差唔多價錢，有時候仲會比坐地鐵更平，因為呢道既地鐵好貴架



新加坡綠化做得好好，沿路兩旁都係樹



係新加坡我地住係一間青年旅舍，唔會以為hostel就係好簡陋，呢間hostel設備好豪華，拍得住酒店架，係我住過最靚既青年旅舍

我諗呢道唯一一個唔好既地方就係上格床冇欄杆，搞到我好驚會跌落地


張床又軟又大張，訓得好舒服



洗手間好乾淨；每間房都有洗手間，每層出面仲有三個公用洗手間，真係好多丫，呢道一晚大約$300港幣一個床位覺得好值



放低行李休息一陣就出發啦，行大約10分鐘去到地鐵站


第一次買地鐵飛時有小小問題想請教職員，不過入面個職員勁串又唔想答你咁款


坐一個站去到Tanjong Pagar落車



目的地就係前面既Maxwell Food Centre(斯威爾熟食中心)

呢道號稱「五大最佳熟食中心」之一，吸引左好多人來到，遊客更加係必來


當中最出名就係天天海南雞飯，睇下條人龍就知有幾受歡迎，唔排返一個鐘都唔洗旨意有得食



得一個師傅負責切雞，切都切到手軟

好多人都話呢檔海南雞飯好食，但之前屋企人食過又話唔掂，信邊個好呢？

等左好耐隻雞終於出場啦，一食落口真係好滑好滑
不過我同朋友覺得呢隻雞係冇雞味，就好似食軟林林既冰鮮雞一樣，唔覺得有幾好食！同馬來西亞食既雞比較呢道差太多啦，有點名過於實；如果唔係見到自己食緊雞，憑味道我諗食唔出自己食緊咩...

其他野食不過不失啦，我比較鐘意食芽菜，呢道既芽菜肥肥矮矮幾好食架


叫左隻半雞咁多食唔晒tim！食飽後就坐地鐵去下一個目的地--聖淘沙島



地鐵唔係直接去到聖淘沙，要先係HarbourFront站落車，呢道可以選擇行過去定坐車去；另外仲可以坐纜車過去，不過就好貴啦

我地想坐Sentosa Express就要上去L3

坐列車入島每位SG$4，坡幣$1大約港幣$6.2，即係呢程車成25蚊港幣都唔平架；係島上列車係可以隨意坐唔收費



入站啦

就係坐呢啲小小既單軌列車

上左車啦！旁邊係貨櫃碼頭


可以坐車入島

亦都可以坐纜車

幾分鐘車程就去到啦

環境唔錯丫



見到環球影城，不過冇興趣入去


賭場都冇興趣入去



繼續四圍行



呢隻魚尾獅好得意丫


呢隻都好可愛

不過真呢隻就唔係咁like啦


今朝飛機太早啦，太家都冇點訓就出門口，所以而家先返去hostel休息一陣


我地坐的士返去仲平過坐地鐵，而且又快又唔洗轉車唔洗行


Hostel大廳好靚，職員都好好人



夜晚我地係hostel旁邊既餐廳晚飯，有唔少人揸車來食飯我諗呢間一定唔會差既，好彩朋友已經訂好枱唔怕冇位



今晚仲有另一個新加坡朋友加入我地一齊食飯，叫左超多好野食(太多好餸啦冇影晒出來)！大家都話海鮮好正，可惜我唔食海鮮啦，不過其他餸都係好正！而且今餐價錢唔係好貴，比起香港更抵食呢！

飯後坐地鐵去Clarke Quay站，遊覽克拉碼頭﹑新加坡河夜景；呢道夜晚五光十色多姿多采，一定好岩喜歡夜遊既朋友



有時間既話可以坐船遊覽，我就冇坐啦


珍寶海鮮係新加坡好出名，呢間就坐滿人！我估佢一定好貴好貴好貴

克拉碼頭有好多酒吧，環境氣氛都唔錯架！可惜我唔飲酒，如果唔係一定唔捨得走！

有機動遊戲可以玩bor

克拉碼頭咁豐富既夜生活都係唔適合我架啦，行左一圈之後就跳上的士返hostel，總算係見識過新加坡夜晚一面；琴晚冇訓過教，而家最想就係跳上張床訓一個靚教，呢張床咁舒服今晚當然好好訓啦

晚安啦！

鐘意SeeWide的分享，給我們一個Like吧！

檢舉

攻略日期：2014-08-17

攻略地點：新加坡
攻略時間：1日以上

是次消費：每人平均約HK$ 5000.00

共1人比"掂"

stellaluk 於2014-09-12 07:41:18 留言
只係$328，是單程？未連稅？未加燃油費？
行程很豐富！睇見都戥你開心
舉報回覆
No.1

小龍於2014-09-12 09:09:57 留言
我都見依家廉航去星加坡真係好抵呀，心郁郁想去，不過又諗，當地食、玩、住都好貴
舉報回覆
No.2

平凡人於2014-09-12 21:58:41 留言
原文由 stellaluk 於 2014-09-12 07:41:18 發表
只係$328，是單程？未連稅？未加燃油費？
行程很豐富！睇見都戥你開心

$328係單程，已經包晒稅&燃油費scoot成日都有特價架，上星期先試過$348，有時又會$398，經常都會平多謝，今次去左好多地方，好好玩呢
舉報回覆
No.3