My 4th Sprint Distance Triathlon
日期：2014年6月1日（星期日）
地點：科學園
時間：6am
賽程：Course A (Sprint) Swim 750m, Bike 20.3K, Run 5K
原本5月11日在新娘潭的三項鐵人賽因天氣關係取消了，結果這場變成了本年度的第一場三鐵賽！
五點幾來到，在轉項區如常地擺好個陣，跑鞋、lock鞋、帽、頭盔、太陽眼鏡、號碼帶... 心想ok了吧？教練經過，幫我將個陣由單車的左邊搬去右邊，又係順D喎！到時穿好鞋，單車在左邊一拎就走得！:)
Swim 750m (2 laps)
比賽要在深水區出發，即是要踩水！敝莊主一直不太懂踩水，但試過在海中郁郁下都可以踩到一陣，在泳班也試過在25米踩水，模擬比賽mass start，心想今次應該沒問題了吧！
和同學們一起落水，起初都沒什麼問題，但越踩越覺得不對勁！仲未開始既？仲要踩幾耐？我不能無止境咁踩落去的！o.O
嚴格來說，我是在海裡亂咁郁郁下，這樣可以維持到幾秒的，平時這個持久度夠我跟在旁的救生艇講野的了！但現在好像過了1分鐘，甚至更長？其實頂到咁耐已好勁的了！哎呀！我就唔得喇！點算好呀？救命呀～！>0<
多麼希望有人可以給我扶一把，但當然這只是妄想，大家都說：「唔好捉住我呀！」「你放鬆啦！放鬆個人就會浮架喇！」鬼唔知阿媽係女人咩？！~>.<~
![]()
唔得！冷靜！自救！唔識定係度啫！可以去後面飄游架嘛！所以我企圖去後面搵個位慢漂，不久，「咇！」了一聲，Yeah！不用煩了，可以游了！^_^!
可以游比踩水舒暢得多，之後其實我都放鬆，盡量做好動作，又4下手便向前望，免得游偏了！其實覺得自己比以前有進步的，以前在視線範圍已不見有賽員，現在我還見到一堆泳帽的方向，還有... 過程中竟然還可以過到幾個賽員！哇哈哈！
游第二個圈時忽然大浪，冇事冇事！當見唔到，拋拋下都可 繼續游！
明明覺得都不是太差啫！一上水未經樓梯後的sensor就按錶，24:36？Errr... 咁上下呱？雖然跟在泳池游的20分有些距離，可能游多了呢...
Bike 20.3K (7 laps)
踏上單車，起初沒什麼目標可以跟，後來有些零零星星的出現過，直至見到一個女仔，我勾著她車，然後大家很有默契地輪著帶車，超前帶車時大家都會望望後面是否仍勾住，這種感覺真好！這使我忽然充滿了力量，很有幹勁和目標去保持著速度！可惜，2 laps後她在我後面甩了，跟唔番！我回頭望她，她笑著搖搖頭！雖然拍擋沒有了，但多謝她陪了我一段，幫我燃起了那團追車火！:)
我繼續找其他目標地去勾，忽然很開心女子組是最早出發那批，因為賽道上有很多車，這架勾不到還會有很多機會勾另一架！:D
今次頭腦勁清晰，肯定沒數錯圈，加上見到最後一圈要出時，老公已去了另一個位影相，那更肯定我沒數錯了！:P
Run 5K (2 laps)
游和踩感覺都幾好，跑原來才是最痛苦，因為我根本就跑唔郁！:'(
由在轉項區開始已經覺得自己發不到力，但那時會以為是未適應，過多1-2K應該會好點吧？但事實是，2K後仲慢，3K後橫隔膜痛，好辛苦才完成那5K！時間...... 真的很慢！>_<
以前最後幾百米一定會奪命狂奔，今次？已經already冇命，如何能狂奔？連跑快少少都有難度！Ginny在終點前50米還說：「喂！你呢D叫跑步呀？！」=___=
唉！從前跑步是自己在三項中比較好的一項，現在淪落到是最雞的一項！T_T
完成了！有完成獎牌，還有些贈品！^.^
時間
Swim 24:52 / T1 4:33 / Bike 40:11 / T2 4:19 / Run 32:40 (Total 1:46:38)
我踩過這條賽道咁多次，次次都是44:xx，今次竟然快了4分鐘，好雀躍呀！教練說：「今次冇風呀嘛！......不過，你都有進步既！」嘻！
賽後花絮
今次大會準備了幾個「水池」，有些驚喜！嘩！好舒服、清涼呀～！我們是第一批使用人士，水又清澈又清涼！聞說第N批使用者說水又黃又不涼！嘻嘻！早起的鳥兒有蟲吃，早出的賽員有靚水！:P
我們這邊廂在浸水，但另一邊廂玩Fun distance的賽員就出發，大家來張大合照！
恭喜仁兄在「娘親」和9隻救生獨木舟的護航下完成人生第一個三項鐵人賽！（太過份！我當年都係得7隻，他竟然有9隻？！XD）
「德成同學會」大合照！
優秀教練與優秀學員！XD
同學們向教練「舉報」我未出發先浸死及差點殃及池魚的偉蹟，教練說：「游水堂時踩番15分鐘水囉！」唔好嚇我！我覺得他真的會做得出，但我會浸死架！唔好呀！>.<
不過，同學們都很helpful，說要幫我練踩水，鼓勵我要克服，有人同行和支持真窩心！多謝你們呀！^0^
今場比賽Dashing Iron Ladies有豐收！大家好勁呀！:D
我的三鐵小檔案：
第1次：
2011.8.28 2xTri：科學園（繽紛組）
第2次：
2011.9.25 Sportsoho：科學園（繽紛組）
第3次：
2012.5.6 BOC體育節：新娘潭 （半奧）
第4次：
2012.6.3 香港人壽三項鐵人賽2012：科學園（半奧）
第5次：
2012.9.23 爽浪三項鐵人挑戰賽2012：新娘潭（半程）
第6次：
2012.10.14 香港ITU三項鐵人亞洲盃2012（半奧）
第7次：2014.6.1 香港人壽三項鐵人賽2014（半奧）
============================================
感謝 荔枝莊 提供以上資料
荔枝莊的網誌: http://laichili.blogspot.hk/
============================================
