Weekday通常都好少出夜街, 盡量都會將約會推去星期六,日。因為有時放咗工已經有d攰, 要返去攤屍!尋日放咗工有d野做遲左返去, 就約咗老公響出面等順手一齊食飯。今次去咗香港仔食素,去香港仔食飯可以行埋街因為多嘢買, 而且返屋企又唔洗好耐。呢間齋舖開咗好多年,老土嘢, 但近來剛裝修過,名都改埋, 可能轉咗手,光鮮咗, 仲變咗新派素菜,啱晒我!因為我只喜歡食新派菜啦!
門口有外賣小食位, 但可能有d夜, 已收檔!
店在地庫, 裝修算清雅!
一坐低就上茶同埋小食, 茶係玄米茶, 我最愛!小食係大豆芽, 我最憎!但老公眼發光..haha
有set就最好啦, 唔洗唸, 好肚餓呀!好平喎, 咁多嘢食, 2人餐加埋一, 加埋茶錢, 都係$220!
我好中意食素羊腩, 前菜叫左沙爹羊肉串燒, 好細心, 花生另上, 呢個係我地最讚的!最後一支爭食!
羹我叫咗芝士蟹皇翅, 其實係南瓜濃湯, 有少少素海鮮同埋素翅, 面有芝士脆粒, 好香好好味!
西檸五香骨 - 我其實唔中意食檸檬或者橙既餸, 但呢個酸味少,香味多, 但中間條假骨用咗雞脾菇, 如果用炸左既蓮藕條會好味d!
車仔雜菌炒麵 - 唔知車仔係咩意思, 老公話buy佢多餸, 但我唔lor!!我要食澱粉質呀!
已經食到好飽, 唸住埋單, 老公話見到有糖水送, 我話咁你問下係咪有, 無就埋單啦!佢叫咗人過黎。
佢話:d嘢上晒未呀?
(好明顯上晒兼食晒)侍應: 吓?
頂!我即刻話:係咪有糖水送呀?侍應: 係呀係呀!我而家上丫!
跟住我問老公做咩唔直接講, 好明顯潮州怒漢覺得因為係送既關係唔好意思問,佢剩係話:呢d嘢係女人做架麻!我話我死咗既話,你又唔識叫外賣啦, 唔識講價, 會用好貴既價錢申請上網呀, 電話費呀, 而家仲加多樣,問贈品!死不悔改的潮州怒漢只識笑住話:呢d嘢係女人做架麻!哼哼!死嘢!成日要我做醜人!
回 程上到車, 怒漢又說:你好耐無坐過我車尾啦!早前有次佢話車我收工, 但因為我近來愛上搭巴士既關係, 所以一口拒絕, 受不了被拒絕的人立刻說:唉..個頭盔唔好放響車啦, 都無人用, 不如拎返屋企放啦!今次見到佢因為我幫襯佢架車竟然覺得高興, 其實覺得好窩心呢!但我只係講左句:痴線, 幾個禮拜之麻, 有幾耐jet!haha..秋天的風好舒服, 路面亦無咩車, 超爽!
因為太飽行逛咗一陣, 見到間好細既阿信屋, 貨品無大間的咁多,但都買咗少少嘢, 為愉快的一晚劃上完美既句號^^
香港仔緣來素食
南寧街香港仔中心 1-5 號地下及地庫
感謝 Mary 提供以上資料
