28-6-2014 (農曆六月初二)
乖孫洋洋黎咗我度幾日，噚日番咗屋企，今晚見得閒，又去主場踎番陣先；18:00落到主場，埋好位就開竿落餌，一落就有魚接，食得好精，食咗成分幾兩分鐘先至震震吓咁拉竿，一抽即中，上黎係手板大金古，解鈎落生籠，即刻換餌繼續，一路釣到20:00前後中咗四條金古，都係手板大；今日嘅天氣都幾熱吓，抹汗條毛巾都濕哂，呢個時候魚訊疏咗，諗住起身去攞樽水飲吓，點知呢頭飲緊水，果頭枝竿比魚拉咗兩吓，跟住就成枝竿頭彈起，經驗話我知呢Ｄ係大金古嘅食法，右手仲揸住樽水，左手就執起枝竿一抽，中咗！好聚手，一路頂一路放低樽水，磅頂又發出刺耳嘅叮叮聽，當條魚慢落黎，即刻就連攪五六吓，因為釣得淺水，所以就好快見魚喇，睇住佢喺度高速打圈，因為絲幼鈎細，唔敢同佢力搏，就佢幾秒，跟手再收，金古好得意架，當喺水裏點飛都好，一上水面就咋死唔郁架啦，睇落條魚都有斤頭，為安全起見，用撈箕上水，解鈎落生籠，換餌睇仲有冇至得，點知釣多個幾鐘，都係一吓魚訊都冇，一於見好就收，未夠十點就執架生走人番屋企喇！
今季斤頭金古終於出現喇。
又揾到餐餸。
感謝 白果魚神 提供以上資料
白果魚神的網誌: http://a991952.blogspot.hk/
