經過我既一輪食藥訓覺,食藥訓覺之後, 我終於趕得切響放假前病好返!
謝謝各位既問候祝福!>3<我唔可以放假攤屍響屋企浪費光陰, 好彩抵抗力強快快好返晒..yeah!!
近 來天氣好鬼乾燥, 係時候要煲一D潤潤既野, 事關我屋企樓下係無咩買, 如果想多D選擇就要搭車去另一區買。我都話我係一隻冷氣狗, 我係唔熱得, 我一熱就會即時好燥底, 去到呢D勁多人既社區, 當前面既人行得非常之慢, 而自己係慣常行得快, 勁炆!成日都幻想反正你行得咁慢不如我抱埋你行...hahahah...跟住又不停咒罵自己, 黎咁鬼遠買野, 又熱, 又有手袋, 又兩隻手拎滿晒好似啦啦隊咁, 做咩唔等老公得閑一齊黎, 跟住又唸等佢得閑黎蚊都訓.....如果當時有人望到我個樣, 一定會認為我剛剛殺完人..hahaha..好不容易返到屋企,我最愛既冷氣啊!一有冷氣即時變回溫柔的我...hahaha
我好中意飲 蘋果雪梨水, 有一日, 無意中見到呢個湯包, 岩晒我呢D唔係成日得閑去買餸既人, 幾時飲都得, 試過一次之後, 覺得好好飲, 於是抄下佢既材料, 自己去買既料靚D, 而且一包份量太少, 自己買呢就可以買大份D, 咁可以飲兩日ma!我另外仲落左無花果,潤潤的岩晒而家天氣!材料既份量我好隨意, 無去量過, 只係其中既川貝唔好落太多, 如果唔係會苦架!
材料 : 桑葉,雪梨乾,乾海底椰,百合,南北杏,玉竹片,川貝,蜜棗,
無花果,冰糖
當然唔少得蘋果雪梨, 我呢度係4個雪梨,3個蘋果
做法 :
1.所有材料洗淨稍浸,蘋果雪梨去掟去芯
2. 凍水放入至滾轉細火煲1.5小時,加入冰糖即可!
我就中意熱飲, 又暖又潤!
感謝 Mary 提供以上資料
