探險家攻略 > 城中探秘 / 美食之旅 / 旅遊 > 特色景點 / 博物館 / 餐廳 / 長線旅遊 > 池田。即食麵發明記念館

池田。即食麵發明記念館

由平凡人於 2014-09-17 01:30:00 發表 | 累積瀏覽 1271

分類：長線旅遊餐廳特色景點博物館；地區：大阪,其他

< 大阪﹑京都6天遊 >

第四天

又過左一個舒適的晚上，訓覺時開冷氣，訓醒後開暖氣，感覺特別舒服；今日原本都唔知做咩好，妹妹唔喜歡shopping，對建築風景又冇太大興趣，所以今日就決定去做D無聊野啦，哈哈^^係酒店寄存好行李就出發，先去車站旁邊超級市場買早餐，我買左呢個好好食既壽司

妹妹以為買左豆沙包，其實係朱古力包

又再次去到大阪站，冇計啦去邊都要係大阪站轉車，今次因為唔係轉JR線所以比較麻煩，要先離開大阪站

出到大阪站外面，到處都係差唔多樣既高樓大廈，自己行緊去邊個方向去緊邊道都唔係太清楚，好彩車站指示夠清晰，沿路都有好多指示牌，更重要既係指示牌都用中文表示，跟住行就唔會有問題

跟指示去到阪急電鐵梅田站

今次唔係坐JR線，終於到我都要買車票啦，要坐阪急電鐵去「池田站」

阪急梅田站，又係一個好大既車站

阪急列車好新好有趣，有一種懷舊但又現代化既感覺

坐快速列車，唔洗再轉車好快就去到池田站

如果唔落車，坐到去總站「寶塚」就係漫畫家手塚治虫故鄉，可以去手塚治虫記念館參觀；細過都已經有睇手塚治虫作品，Black Jack﹑小飛俠﹑三眼仔...好多好多，如果有機會都想去記念館參觀一下，可惜妹妹年紀太細，接觸手塚治虫作品機會唔多，所以佢就冇興趣去lu，結果我都冇得去啦，哈哈

出到池田站，感覺有少少鄉村feel，車站旁邊都只係幾層高建築物而冇高樓大廈，同頭先上車既梅田站差好遠

另一邊只有小量高樓

一路行更有鄉村感覺，全部都係平房住宅，就好似叮噹大雄住個種兩層高平房一樣，好有日本feel

去到啦，即食麵發明記念館

好多唔同既即食麵

搵到香港出品

日清隻招牌雞仔

話明係記念館，當然有歷史展品展出，當年即食麵就係係池田市以下呢個咁簡陋既地方發明；除此之多，仲有即食麵相關介紹同有影片比大家更了解即食麵，不過展品就唔係好多，我相信大多數人山長水遠去到池田市都唔只係為左睇展覽，最重要就緊係黎玩啦

記念館有咩好玩？買個杯就有得玩

大家乖乖地排排坐幫個杯扮靚畫公仔

時間關係，我個杯好快就多左三隻鴨仔啦，我既至愛Rubber Duck

又係時間關係，前面都加左顏色啦（右手邊個隻係我既）

都係時間關係，已經完成左啦，全球限量一杯聖誕黃色小鴨特別版杯麵完成

應該話仲未完成先岩，個杯入面都未有麵，仲要去完成最重要既步驟 - 入麵

好多麵等緊我

步驟一：將麵旋轉放入杯；原本個麵上闊下窄設計同旋轉就係想順利將麵入落杯內

步驟二：選擇杯麵湯底或和配料

真係好多配料，平時食既杯麵邊有可能裝到咁滿；我選擇左蕃茄湯底（香港冇架），配料可以選四款，我選左雞仔﹑芝士﹑雞肉﹑牛肉，好豐富

步驟三：封蓋

步驟四：包膠紙

步驟五：加熱等膠紙包緊杯麵

之後杯麵就會跌出來啦

限量版鴨仔杯麵完成

返到香港有日終於忍唔住開左個杯麵食啦，只得一個月食用限期都係食左佢先算；唔知係唔係自己有份親手設計親手整既關係，真係好好食丫！未食過咁好食既杯麵！入面D肉大大舊好足料，牛肉真係有牛肉味，雞肉真係有雞肉味，仲有最愛既蕃茄湯，係我食過最正既杯麵！但整得一個咁少十五分鐘就冇左啦><

整完杯麵就有地方比你品嚐杯麵

當然唔會要你即刻食左自己個杯麵咁殘忍，有售賣機賣麵，有D新口味同特別版杯麵都可以係道買到

我就冇係道慢慢食麵，買左呢兩個返屋企收藏，直到而家都唔捨得食左佢地（冇坐JAL都食到JAL杯麵，Yeah！）

發明館二樓仲有地方比人學緊麵，不過呢道要先預約而且係講日文，當然冇我份

好大隻雞仔

出入口旁邊有雞仔相關產品購買，但其實雞仔我都係第一次見，香港唔多見有用佢做宣傳，對佢唔係太熟識，所以都係唔買野lu

出到門口見到好多小學生準備入去參觀，心諗呢D咁有趣既地方都係岩小學生多D，好彩冇係道遇到識人，哈哈^^不過講真畫下畫整下杯麵又幾有趣，有得玩之餘又可以拎個獨一無異既杯麵返屋企，就算係送禮自用都一樣咁開心，坐我對面既女仔就自己畫緊三個杯麵，唔知如果有人收到呢個杯麵做手信會有咩反應呢？（之後發現原本My Cup needles Factory之前都有黎到香港比人整杯麵，點解我個時唔知架><早幾個月都來過！）

沿路兩旁都係住宅，我諗住呢道都幾舒服，環境靚又冇大城市咁濟迫，而且又有鐵路連接出入大阪市區，交通好方便

就算係車站旁邊都唔多人

不過有個唔好既地方就係食野冇咩選擇，車站附近都只係得幾間餐廳，本來想係呢道食午餐但都冇野岩食，唯有坐車返梅田先算

寶塚線唔係市區線，列車班次唔多，大約十分鐘先有車到，但唔洗擔心有好多位可以坐低慢慢等；今日陽光好好，所以坐係道都唔覺凍，要去日本前天氣報告仲話大阪日日都好大機會落雨，好彩太陽伯伯太好人一路都照住我

又係好舒服既暖氣梳化坐位，坐到唔捨得起身

話咁快就再次返到梅田站

返到市區第一時間就緊係搵野食啦，琴日都黎過梅田呢邊，見到既都係大商場，所以今日就嘗試下行出馬路外邊睇下有冇地道一D既餐廳選擇；出到去果然有好多唔同日式餐廳可供選擇，早兩日食過拉麵今次就唔食啦，試下其他美食先

行過一間小店，妹妹比門口既天婦羅吸引就入左去啦

妹妹既天婦羅飯，佢話好好食
（妹妹對飲食要求唔高，好多野都話好食，不過第一晚個碗拉麵連佢都話難食就證明碗野真係好難食）

我既蕎麥麵配蛋飯
日本既蛋唔知點解可以整到咁甜，平時唔鐘意食煎蛋既我都覺得好食；至於蕎麥麵就樣衰啦，一食落口覺得好淡，仲要加左七味粉調味都係咁淡，不過咁岩旁邊有人又係食蕎麥麵，原來蕎麥麵係要放入碗湯入面之後先食，即時變得好食好多，今次真係大鄉里出城連食碗麵都唔識，哈哈

慢慢食，食完就入左地下商店街四圍行

咁多人排隊買麵包？

呢道有好多精品店，岩晒妹妹行

係精品店行左好耐，又係時候返去大阪站；不斷穿過地下街，其實都唔知自己行左去邊

一路跟住指示走

上返地面，大阪站出現係我眼前，終於到啦

就係呢個時候，妹妹突然望到個好正既廣告

嘩...有間Pokemon Center係道，我同妹妹都超級鐘意寵物小精靈，雖然唔知間Pokemon Center係咩東東，都係去左先算，拿拿聲行去Pokemon Center所在地

到樓下啦，原來Pokemon Center係大丸百貨13樓，入到大丸即刻咩都唔理搭lift上去，第一次太心急搭錯lift，部lift都唔停13樓既，又要落返地下排隊搭多次，呢次就冇錯啦

一出lift真係見到Pokemon Center

比卡超好得意丫

佈置好靚

仲有好多好靚好靚好靚既小精靈

最新既寵物小精靈角色，太新唔識佢地tim（而家香港先播呢個，遲左一年！）

呢道賣既野唔貴，好後悔冇帶佢地返屋企，如果去多次我要買晒佢地

好多都好鐘意，點算好

全部都好靚

實在有太多野鐘意，都唔知點揀好，所以買左唔係好多，留返下次去日本時再到Pokemon Center掃貨（好多城市都有分店，好野！）

Pokemon Center旁邊係UNIQLO，話晒當時所著既外套係UNIQLO出品，咁就入去八掛一下啦

價錢都唔係貴，不過平時好少買衫唔知點揀好，咁唔買lu

由13樓搭電梯慢慢落地下，又見到Hello Kitty店，不過日本有太多Hello Kitty店而且四圍都有Hello Kitty產品，睇得多都有少少厭，都係頭先Pokemon Center最吸引

又再次返到大阪站，呢兩日不斷經過呢道；而今次將會係本次旅程最後一次企係大阪站月台啦，再見啦大阪站！

坐火車返難波站途中，見到有位老伯伯冇位坐，咁當然要讓位啦；不過老伯伯背住我，而我又唔識講日文，唯有輕輕拍一拍伯伯示意佢可以坐低；神奇既地方出現啦，伯伯突然除低頂帽向我躹躬，竟然咁有禮貌，但我真係唔好意思唔識日文回應唔到，唯有跟住佢躹躬啦；好多人都知日本人有禮貌，但最估唔到連老人家都一樣，人地既文化﹑教育真係好好，我諗呢個係其中一個點解咁多人鐘意日本既原因

返到難波站，今次要買齊野返香港啦；去超級市場揀左好多食材﹑零食帶返來，跟住又去到精品店買左D得意野，之後就去到藥房買藥，臨走都仲有好多野買，不過一早已經預左好多時間可以慢慢行慢慢揀；買好晒就返去酒店拎返個喼，pack好晒D野入去就要走lu

去難波站路上又經過好多餐廳既地下商店街，晚餐就係呢道開餐啦；妹妹揀左呢間比較多人既餐廳，座位比較闊坐得好舒服，不過暖氣好勁除晒外套都覺得熱

妹妹既定食，佢又話好好食
佢覺得好食就得啦，我食咩都冇所謂，最重要係妹妹食得開心，哈哈

呢個係我啦，第一次食甜既豬扒，食落又幾得意，唔錯既一餐
而家諗返起我每次食飯都飲好多水，因為日本買枝水好貴，所以都係等到食飯時先飲；有時都會買下飲品，不過一向都唔敢飲太多，都係飲水最好

食完飯就出發去機場啦，其實最近最方便係坐南海電鐵，難波就有車直到機場而且仲平

不過我有JR Pass就冇計啦，行遠少少去返JR難波站，坐JR線去天王寺站轉機場列車

去機場唔平丫

關空快速列車上有英文廣播，又有電視顯示去到邊，唔需要擔心坐錯車；平時搭既其他列車車長只會用日語廣播，每個站之間都會好似唱歌咁講一大段野，最衰係唔知佢講咩

唔洗一個鍾就去到機場，都係先去check in，唔洗再拖住個喼周圍行

機場好大，不過差不多深夜已經冇咩人啦，下層除左24小時營業既店鋪之外其他店鋪都已經關門，都冇野好行啦唯有早D入去禁區坐下等上機

就係係呢道入去啦，不過我仲未要入去住，我既日本之旅都未結束點可以咁快就走；今日只係妹妹返香港，而我會係道留多日明天先離開，望見妹妹順利入去之後就要繼續我既旅程

去返下層，一樣冇咩人

而家夜媽媽我都唔出返去市區啦，出到去都唔知去邊好，都係返去我最熟悉既位置最好；好多人已經先一步到，個個都霸晒靚位訓晒覺，只係見到個大背囊而見唔到人

而我當然冇咁早訓，機場呢道有wifi上網要上返夠本先得，仲要幫相機電話差電（但唔知點解明明見到係著燈但就好似差唔到電），見有時間順便寫下postcard，又唔知搞到幾多點；呢道既位好舒服，訓低左就好快訓著左lu，明天行程好豐富，最後一日當然要玩盡佢

鐘意SeeWide的分享，給我們一個Like吧！

檢舉

攻略日期：N/A

攻略地點：大阪,其他
攻略時間：1日以上

是次消費：N/A

共0人比"掂"

stellaluk 於2014-09-17 08:16:49 留言
老實講，食咗咁耐公仔麵，真係幾厭了！
舉報回覆
No.1

EEChan 於2014-09-17 12:32:56 留言
即食麵雖則話唔健康，但我覺得都係偉大發明之一
舉報回覆
No.2

Melo 於2014-09-17 12:44:13 留言
行程好豐富！我都好想玩整杯麵，但係去左幾次大阪都的唔起心肝為個杯麵去咁遠，真係好懶。。。
舉報回覆
No.3

特搜總編E 於2014-09-17 18:34:23 留言
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！
舉報回覆
No.4

平凡人於2014-09-17 22:33:23 留言
原文由 stellaluk 於 2014-09-17 08:16:49 發表
老實講，食咗咁耐公仔麵，真係幾厭了！

記得以前試過一丁特價買左一箱返來，自始之後就食怕左不過間中食下都ok既
舉報回覆
No.5

平凡人於2014-09-17 22:35:44 留言
原文由 EEChan 於 2014-09-17 12:32:56 發表
即食麵雖則話唔健康，但我覺得都係偉大發明之一

即食麵都有佢既存在價值，只要唔好食太多就得啦
舉報回覆
No.6

平凡人於2014-09-17 22:39:01 留言
原文由 Melo 於 2014-09-17 12:44:13 發表
行程好豐富！我都好想玩整杯麵，但係去左幾次大阪都的唔起心肝為個杯麵去咁遠，真係好懶。。。

多謝整杯麵唔洗去到遠，香港有時都會有，早幾個月就來左香港係鑽石山有得玩，唔知下次幾時來呢？
舉報回覆
No.7

平凡人於2014-09-17 22:39:50 留言
原文由特搜總編E 於 2014-09-17 18:34:23 發表
恭喜！經過「SeeWide評審團」一致通過，你的發佈已被選為推薦攻略！你不但可以獲得200經驗值，更能累積200探險里數作為開展下次探險之旅的旅費！

Thanks
舉報回覆
No.8