[沙巴旅遊攻略推介2014] 交通住宿篇

沙巴KK旅遊交通安排及上網電話卡攻略 

機場<-->市中心交通

Terminal 1距離市中心~8公里, Terminal 2距離市中心~6公里

的士 ~RM30-40 時間~15min 可載4人

統一設有的士售票處於Arrival Hall內，唔駛擔心呢個服務會收貴你，自己出去截的士都係呢個價。大家領取行李後可到櫃台購買車飛，機場到市中心酒店大約收費RM30-40。買飛付款後，俾張單門口的士司機，佢地就會車你去目的地。

 

機場巴士 ~RM5/person

公共巴士 ~RM1.5/person

 

市內景點交通

徒步 - 如果你係住o係市中心內酒店，大部份市區內主要景點、超級市場、夜市、食肆、買手信等，步行時間每程大多少於15分鐘(少於1公里距離)。其本上事先安排好想去既地方，順住行，都唔會覺得好辛苦。

 

的士 - 如果想舒適D(畢竟沙巴氣候都係潮濕而炎熱)，又或者想去比較遠既地方，可以選擇搭的士。一般RM10起錶，之後每公里RM1，如果有3, 4個朋友一齊去旅行，基本上唔駛太大考慮。

 

公共巴士 - 沙巴公共巴士費用大概RM0.5-1.5。以沙巴市中心景點黎講，我地唔太建議坐公共巴士。第一，大部份目的地距離唔太遠，好多地方徒步都可以去到。第二，的士收費唔算太貴，而你需要搭既機會又唔多，唔駛周圍問路搵巴士站。

 

上網電話咭

沙巴最多人推薦既電話卡應該都係DiGi，無論係Terminal 1或者Terminal 2，arrival hall入面都有佢地櫃台。

 

Hello Malaysia Traveller’s Pack - 售價RM10.8，可用金額RM6。開咭日起計有兩天每天150MB免費上網quota。2013年7月用過，張咭仲可以用tethering share wifi俾幾個人一齊用tim。不過要注意以下兩點：第一，每日截數時間係00:00，如果你用唔晒150MB，你都無得帶落下一日嫁。如果夜機去到，可以考慮下第二朝先activate張咭。第二，如果用晒免費o個150MB，佢會照扣你可用金額等你可以繼續上網，如果你有電話需要打時，要留意下仲有無可用金額先好呀。如果想充值，你見街邊有Digi logo既地方入去買充值咭就可以喇。上網用量唔夠可以自己top up，佢有d plan可以揀，會平個佢逐kb同你收費。詳情可以睇下佢地網頁。

 

Prepaid Card:

https://new.digi.com.my/cs/Satellite/ecomm_C/prepaid_plans/default/hello_malaysia_traveller_pack

Internet Top Up Plan:

https://new.digi.com.my/cs/Satellite/Page/plan_service/default/digi_prepaid_mobile_internet_main

 

酒店地區推介

由於每間酒店各有特色、平貴各有所好，我地一般都唔會指名介紹酒店。取而代之，我地會列出各熱門酒店住宿既優點同缺點，等大家可以更方便咁搵倒自己既心水酒店。(大家有心水酒店既話都可以搵我地報下價，一般沙巴酒店都會平過大家自己上網book。)

 

A.     機場附近渡假村系列

 

距離機場比較近，但呢個唔係佢既優點，反而係佢缺點。主要原因係因為就算你住市中心酒店，佢地都唔係離機場好遠(少過10公里)，但問題係如果你住機場附近而想出去市中心行街食野，你需要坐車先去到。雖然大多酒店有提供接駁巴士服務，但始終要預佢班次時間都有D唔方便，當然大家可以選擇搭的士啦，打錶到市中心大約RM20。

 

雖然交通唔夠市中心酒店方便，但係佢地都有唔少賣點嫁。第一，佢地都係D比較大型既酒店，酒店內唔單止設施齊全、而且花園夠大，飲下野o係樹底下曬太陽好快就一個下午嫁喇。第二，大部份酒店都位於於海邊，而部份酒店更設有私人碼頭及沙灘，佢地有私人既水上活動中心，大家可以去租借水上電單車、參加香蕉船、wakeboard等刺激既水上活動。

 

o係呢區住宿無論情侶、一家大細、三五知己都好適合嫁。我地推薦大家o係沙巴旅行最後一兩晚可以考慮入住。試諗下之前幾日吃渴玩樂過後，係咪更想有個更舒適既環境好好relax下先返香港呢? 記得買齊手信先去checkin呀~

 

B.     市中心系列

一句講晒，超級方便。市中心只係離機場8公里左右，大約15分鐘車程。而周邊食肆、地標、買手信等地方相距唔遠。如果計劃得好，順住行，每個景點唔會超過1公里，步行大約少於15分鐘。另外，黎到沙巴，多數人都會Join返一兩個local tour，差唔多所有既local tour都會包來回市區酒店接送，如果想玩local tour o個幾日，住市中心既酒店會適合D。

 

如果去沙巴行夜市、食地道美食、買手信、join local tour對你係必須既話，大家不妨考慮下住o係市中心，佢既方便程度一定係你想要既野。

 

C.     愛好自然及寧靜系列

 

到沙巴旅行，部分遊客會考慮入住Nexus或Shangri-La's Rasa Ria。KK機場到Nexus或Shangri-La's Rasa Ria距離約40公里，時間約40-45分鐘，的士收費大約RM90。市中心距離呢兩間酒店35公里左右，車程大約30分鐘。

 

鍾意黎呢兩間酒店既客人，大多數因為佢地鍾意寧靜、酒店遠離市區，可以好好享受一個悠閒既假期。

 

D.    島上住宿系列

 

沙巴KK呢個地方，熱門主要有兩個島可以住宿。佢地分別係馬努干島(Manukan Island)及伽亞島(Gaya Island)。呢兩個島分別距離沙巴KK約10分鐘及15分鐘船程。一般大家book島上住宿時，要留意是否包水陸交通接送或詢問有關價錢。

 住o係島上有咩好處? 首先當然係環境啦。酒店周邊既環境同市區酒店比較，相信都唔駛多講喇。第二就係私人沙灘，多數島上住宿都會有私人沙灘並順勢設有infinity pool，大家玩完水上活動之後，行兩步就可以返房沖身，係咪好爽呢? 咁當然，島上住宿既價錢同市中心酒店價錢都有一段距離啦。沙巴KK住o係呢類島上酒店，大家想join浮潛、潛水等水上活動local tours一般都唔成問題。但如果想參加沙巴其他特色活動，例如螢火蟲、激流、神山等local tours就盡量避免喇。一來交通時間比較長(仲可能要加錢接送)、二來會浪費左o係resort嘆世界既時間。所以，我地建議大家可以考慮安排最頭或最尾既時間入住呢類酒店好好享受，其餘時間可以stay市中心酒店，方便explorer下沙巴其他特色旅遊活動同o係市中心大吃大渴兼且買手信。

 

其他相關沙巴旅遊攻略:

沙巴KK local tour推介 - 浮潛及水上活動篇 

 

 

============================================

感謝 TravelFever 提供以上資料

TravelFever的網誌: http://travelfever.mysinablog.com/

============================================